Wekiraja sünain tü Wiwüliakat na achekakana tü rewiisütakalüirua
1. ¿Kasapülajatü waküjüin pütchi süka tü rewiisütakalüirua?
1 Aküjawaishii waya pütchi saawanoʼu süka tü rewiisütakat La Atalaya otta ¡Despertad! Akatsaʼa tüü, shia tü waainjakat palajana süpüla wekirajüin na wayuu atüjaweekana saaʼu tü shiimainkat. Tü pütchi ashajünakat suluʼu pütchi 2 sükaaliinjeena waya süpüla waapüin tü karalouktakat Kasa shikirajaka wouyantapa wachikuaʼa otta süpüla woʼttüin sünain ekirajaa sünain tü Wiwüliakat. Eesü süpüla waküjüin shia sükajee wanüiki otta wanaapünaa sümaa nakuwaʼipa na waküjakana amüin pütchi jee eesü süpüla waküjüin pütchi süka wanee naata.
2. ¿Jamüsü süpüla woʼttüin sünain ekirajaa sünain tü Wiwüliakat sükajee tü karalouktakat Kasa shikirajaka, süpana 2-7?
2 Wekiraja süka süpana 2 sünainmüin 7. Eesü süpüla müin wanüiki süka tü rewiisütakat: «Tü rewiisüta tapütakat püpüla suluʼujeejatü tü Wiwüliakat. Jülüjapa paaʼin jamüin choʼujaaka saashajeʼennüin.» Waashajeʼera Isaías 48:17, 18; Juan 17:3, NM, jee shiale waneeirua pütchi anaka maʼin. Süchikijee weeʼiyatüin otta waapüin tü karalouktakat Kasa shikirajaka eeshii süpüla wamüin:
◼ «Süküjüin wamüin tü Wiwüliakat tü eeinjateetkat mapeena.» Weeʼiyata nümüin chi wayuukai süpana 4 otta 5, otta wasakira nia: «Sünainjee tü aküjünakat yaaya ¿jarat püchekaka süpüla shikeraajüin?». Wachajaa tü ekirajaaya aashajaakat süchiki tü nüneekakat otta waashajeʼera motsoʼo wanee jee piamasü pütchi, nücheküle shia.
◼ Eeshii süpüla wamüin: «Süsouktüin tü Wiwüliakat tü nasakitkat maʼin anain na wayuukana.» Wojutala tü karalouktakat suluʼu süpana 6 otta wasakira nia sünain nüsakirüirüle anain tü asakiraa sünainkat süpana 6. Wachajaa tü ekirajaaya asouktakat tü asakiraa nüneekakat otta waashajeʼera motsoʼo wanee jee piamasü pütchi.
◼ Eesü süpüla weeʼiyatüin süpüshi tü pütchi suluʼukat süpana 2 otta wasakira jaralüin nikirajaweein anain. Süchikijee, weeʼiyata tü ekirajaaya nüneekakat otta weeʼiyata nümüin jamüin sukuwaʼipa ekirajawaa sünain tü Wiwüliakat.
3. ¿Jamüsü süpüla woʼttüin sünain ekirajaa sünain tü Wiwüliakat wapütüle wanee rewiisüta aashajaaka süchiki (1) sümojujaain maʼin tü mmakat? (2) tü apüshiikat? (3) pansaain sünüiki tü Wiwüliakat?
3 Wasakira nia süpüla wasouktüin wouyantapa. Wanee kasa eeka süpüla waainjüin shia waküjüle tü waashajaainjatkat achiki wouyantapa. Nücheküle tü rewiisütakalüirua, wasakira nia sünain wanee kasa otta wasoukteetka shia wouyantapa. Waküja tü kaʼi wouyantüinjatkat oʼu otta wouyanta soʼu kaʼikat tia (Mat. 5:37). Wouyantapa, wasoʼira naaʼin sünain tü asakiraa wasouktüinjatkat, wekirajaa sünain süsouktia asakiraakat tia sükajee tü karalouktakat Kasa shikirajaka otta waapa wanee karaloukta nümüin süpüla naashajeʼerüin shia wanaa wamaa. Anüü wünaapünaa waneeirua asakiraa eeka süpüla washatüin:
◼ Saashajaale tü rewiisüta wapütakat süchiki sümojujaain maʼin tü mmakat, eeshii süpüla wamüin: «¿Pütüjaa aaʼu tü kasa naainjeetkat Maleiwa saaʼu tü Mmakat? Touyantapa, wasoukteerü asakiraakat tüü sükajee tü Wiwüliakat.» Puuyantapa piiʼiyata süpana 4 otta 5. Eesü süpüla wasakirüin: «¿Nia kasitka Maleiwa tü kasa mojusü alatakat sümüin wayuu?». Wouyantapa, waashajeʼera ekirajaaya 1, pütchi 7 otta 8.
◼ Saashajaale tü rewiisütakat süchiki tü apüshiikat, eeshi süpüla wasakirüin nia: «¿Kasa naainjüinjatka na wayuukana süpüla talatüin naya sümaa napüshi?». Wouyantapa wekirajaa sünain ekirajaaya 14, pütchi 4.
◼ Saashajaale tü rewiisütakat süchiki pansaain sünüiki tü Wiwüliakat, eeshi süpüla wasakirüin nia: «¿Pansaasü sünüiki tü Wiwüliakat sümaa tü namakat na atüjüshiikana maʼin?». Wouyantapa, wekirajaa sünain ekirajaaya 2, pütchi 8.
4. ¿Kasa waaʼinrajatka nnojorüle nücheküin wanee wayuu tü karalouktakat Kasa shikirajaka?
4 Keraapa tü wekirajaakat anain wasakireechi nia sünain wanee kasa süpüla wasouktüin shia wouyantapa. Nikirajaapa kojuyatua wamaa, eesü süpüla wekirajaain nümaa suʼttiajee jee sajaʼttiamüinreʼeya tü karalouktakat. ¿Jama nnojorüle nücheküin tü karalouktakat Kasa shikirajaka? Ayatüinjatia weʼikajaain tü rewiisütakalüirua nümüin otta waashajaain süchiki tü shikirajakat tü Wiwüliakat. Wakaaliinjüle nia süpüla nütüjaweein saaʼu tü shiimainkat, eeshi süpüla nikirajaweein mapeena sünain tü Wiwüliakat.
5. ¿Jamüshii nnojoliinjanaka weitajüin neʼe tü rewiisütakalüirua?
5 Eesü süpüla sütütüleʼerüin naaʼin na wayuukana tü rewiisütakat La Atalaya otta ¡Despertad! sünain atüjawaa saaʼu tü shikirajakat maʼin tü Wiwüliakat. Makalaka weʼitaainjatüin waaʼin sünain woʼttüin sünain ekirajaa sünain tü Wiwüliakat na achekakana tü rewiisütakalüirua. Müle shia watuma, oonoojeena waya sümüin tü nuluwataakat anain Jesús: ‹Jikiraja naya süpüla nayainjanain na tekirajüinkana› otta ‹jikiraja naya sünain tü taluwataakat anain› (Mat. 28:19, 20).