Atüjüinjana waya aküjaa pütchi: sukuwaʼipa shikirajia wayuu süka tü karalouktakat Kasa shikirajaka

¿Jamüsü waaʼinrüinjatka tia? Wainma na wayuu nnojoliikana atüjaain saaʼu kasain sünainpünaain ekirajawaa sünain tü Wiwüliakat. Waküjüle namüin nekirajaainjanain sünain tü Wiwüliakat, eesüjaʼa süpüla jülüjüin naaʼin koleejiainjanain naya. Anasü weeʼiyatüle namüin jamüin sukuwaʼipa ekirajawaa sünain tü Wiwüliakat suulialeʼeya waküjüin neʼe shia namüin. Weeʼiyata namüin mapüleein ekirajawaa sünain tü Wiwüliakat otta aneerüin nakuwaʼipa sutuma. Motsomüin neʼe tia otta eesü süpüla waainjüin shia yalaʼaya soʼuluʼu tü nepiakat.

Anuu tü paaʼinrajatkat:

Püküjapa pünülia sümüin tü wayuukot, püsakira shia müleka shapaale saaʼin sutuma tü kasa alateetkat mapeena.
Püküja sümüin nnojoluin shiain neʼe sümüiwaʼa müin akuwaʼipa. Piiʼiyata sümüin tü pütchi suluʼukat tü karalouktakat Kasa shikirajaka, süpana piama. Püküja sümüin wainmain tü ekirajaaya akaaliinjeetkat shia süpüla sütüjaain saaʼu jamüin sünüiki tü Wiwüliakat süchiki tü kasa alateetkat mapeena otta süpüla sütüjaain saaʼu waneeirua kasa. Püsakira shia sünain tü ekirajaaya kamalainkat sümüin.
Paapa sümüin wanee karaloukta Kasa shikirajaka otta piiʼiyata tü ekirajaaya kamalainkat sümüin. Püküja sümüin suusüteerüin anain yalaʼaya susouktia tü pütchi asakinnakalü anain suʼttiajee tü ekirajaayakat.
Püma sümüin müleka eere süpüla saashajeʼerüin tü pütchi palajatkat. Paashajeʼera sümüin tü asakiraakat jee yootiraa pia sümaa süchiki tü susouktiakat. Paashajeʼera jee püküja jamaluʼuluin tü wersiikulo ashajünakat yala.
Süchikijee, pikiraja shia sünain tü wanee pütchikat. Püma sümüin susouktai shiʼipajee tü asakiraakat.
Pipelisitaaja shia. Püküja joujainjachin püleʼejüin püchikuaʼa süpüla pujuteʼerüin tü ekirajaayakat.
Anashiire saaʼin pümüin, püma sümüin eein wanee video suluʼu jw.org kanüliaka: ¿Kasa sünainpünaaka ekirajawaa sünain tü Wiwüliakat?

Puuʼulaka tüü süpüla wanee kashi:

Puchunta nümüin Jeʼwaa nükaaliinjai pia süpüla puʼttüin sünain ekirajaa (Filip. 2:13).
Püküjapa pütchi, piiʼiyata namüin na wayuukana jamüin suʼttia shikirajia wayuu sükajee tü karalouktakat Kasa shikirajaka jee piiʼiyata tü videokot ¿Kasa sünainpünaaka ekirajawaa sünain tü Wiwüliakat?