Wekiraja na wayuu weʼikajaʼawaikana amüin tü rewiisütakalüirua
1. ¿Jamüshii suluwataaka waya tü nupueulosekat Jeʼwaa sünain weʼikajaʼawaliinjanain tü rewiisütakalüirua?
1 Kakaliainna suluwataain waya tü nupueulosekat Maleiwa sünain weʼikajaʼawaliinjanain tü rewiisütakalüirua namüin na wayuu kamalainkana amüin naashajeʼerüin shia mayaainjeʼe nayouktüin nekirajaain sünain tü Wiwüliakat. ¿Jamüshii weʼikajaʼawaliinjanaka tü rewiisütakalüirua namüin? Süka eein süpüla naapaain sümaa tü pütchi suluʼukat tü Wiwüliakat (1 Ped. 2:2). Eeshii eeka sujutuuin suluʼumüin naaʼin tü pütchi naashajeʼerakat otta nacheka müsia nekirajaain sünain tü Wiwüliakat.
2. ¿Kasa waaʼinrajatka süpüla naapaainjatüin amaa tü pütchikat na wayuu weʼikajaʼawaikana amüin tü rewiisütakalüirua?
2 Wakaaliinja naya süpüla nayaawatüin saaʼu tü pütchikat. Weʼikajaʼawaipa tü rewiisütakalüirua namüin na wayuukana, wasakira naya süchiki wanee kasa süpüla yootuin naya wamaa. Waainjüle tia, watüjaweerü saaʼu nakuwaʼipa, kasain kamalain namüin otta kasain nanoujüin anain. Otta müsia watüjaweerü aaʼu kasain wayuu tü eekat süpüla waashajaain achiki namaa otta jamüinjatüin sukuwaʼipa watuma (Prov. 16:23). Wounteerü tia waashajeʼerüle tü rewiisütakalüirua. Waashajaa namaa süchiki wanee pütchi ashajünaka suluʼu tü rewiisütakat otta waashajeʼera tü wersiikulo sünainpünaakat tia pütchikat. Mayaa, wakaaliinjeena naya süpüla nayaawatüin saaʼu tü pütchikat (1 Cor. 3:6). Washaja suluʼu karaloukta kasoʼulawalin woʼunüin nepialuʼumüin, jaralüin tü karaloukta wapütakat napüla, tü pütchi waashajaakalü achiki namaa otta tü wersiikulo waashajeʼerakat namüin.
3. ¿Jeʼratuainjatü wakua nepialuʼumüin na wayuu weʼikajaʼawaikana amüin tü rewiisütakalüirua?
3 ¿Jeʼratuainjatü wakua nepialuʼumüin? Uatuainjatü wakua kashiwai nepialuʼumüin na wayuu weʼikajaʼawaikana amüin tü rewiisütakalüirua. Aluʼusaʼa jaʼyale naaʼu kamalain namüin tü pütchikat jee anashiire shia namüin, eesü süpüla kojuyatuain wakua namaʼanamüin. Sülatapa wanee jee piama semaana süchiki wapütüin napüla tü rewiisütakat, eeshii süpüla woʼunüin nepialuʼumüin otta müin wanüiki namüin: «Taashajeʼereein pümüin wanee pütchi kamalainka tamüin suluʼujee tü rewiisüta taapakalüinkat pümüin». Waainjüle tia, eesü süpüla sujutuuin suluʼumüin naaʼin tü pütchi ashajünakat suluʼu tü rewiisütakat. «Taashajeʼerüitpa tia pütchikat», namüle wamüin, eeshii süpüla wasakirüin naya jamüin kamalainka namüin tia pütchikat otta yooteenaka waya namaa süchiki tia. Eesü süpüla waapüin tü karaloukta weitajakat soʼu kashikat tia namüin na wayuu kamalainkana amüin tü karalouktakalüirua.
4. ¿Kasa waaʼinrajatka süpüla wekirajüin sünain tü Wiwüliakat na wayuu weʼikajaʼawaikana amüin tü rewiisütakalüirua?
4 Wachajaa sukuwaʼipa süpüla wekirajüin maalü na wayuukana sünain tü Wiwüliakat. Mayaainjeʼe nayouktüin nekirajaain sünain tü Wiwüliakat, eesü süpüla waküjawalin namüin tü pütchi ojuʼitakat süsapoʼujee tü rewiisütakat Aapiria Wayuu otta wekiraja naya sünain tia. Eeshiijaʼa süpüla woʼttüin sünain ekirajaa wayuu soʼuluʼu tü nepiakat. Nayouktüle nekirajaain na wayuukana, ayata weʼikajaʼawalüin namüin tü rewiisütakat otta wakaaliinja naya süpüla naapaain sümaa tü pütchikat.