Weeʼiyata nünüikin Maleiwa tü Wiwüliakat
1 Sainküin tü mmakat wainma wayuu mojuka anüiki süchiki tü Wiwüliakat, akanasaʼa na anoujushii shiimainshiikana neeʼiyatüin nünüikin shia Maleiwa. Süka watüjaain aaʼu ‹saapünüin wamüin nutuma chi naaʼinkai Maleiwa› wanouja anainrü tü nümakat Jesús nümüin Jeowa: ‹Tü pünüikikat shia tü shiimainkat› (2 Tim. 3:16; Juan 17:17). Akatsaʼa ¿kasa waaʼinrajatka süpüla weeʼiyatüin nünüikin Maleiwa tü Wiwüliakat?
2 Watüjaa saaʼu tü pütchi suluʼujeejatkat tü Wiwüliakat. Ekirajaapuʼushi maʼin Jesús sünain tü Wiwüliakat, müsüjeseʼe nüküjüin pütchi namüin na wayuukana sükajee (Luc. 4:16-21; 24:44-46). ¿Jamüsü süpüla sotuinjatüin waaʼin wanee pütchi suluʼujeejatü tü Wiwüliakat? Waashajeʼerüinjatü weinshi otta wasakireʼerüinjatü waaʼin sünain tü wersiikulo anakat süpüla atütüleʼeraa naaʼin na wayuu waküjakana amüin pütchi. Wanaa sümaa wekirajaain süpülapünaa tü outkajawaakat, waashajeʼera tü wersiikulo suluʼujeejatkat tü Wiwüliakat otta waküja jamaluʼuluin shia. Waashajeʼera süpüshuaʼa tü wersiikulo naashajeʼerakat chi wawala ekirajakai sünain tü outkajawaakat. Watüjaale saaʼu tü pütchi suluʼujeejatkat tü Wiwüliakat, yapeena waya süpüla ‹lotüin wakuaippa sünain ekirajaa tü shiimüinkat› (2 Tim. 2:15).
3 Wooʼulaa saashajaain tü Wiwüliakat. Wanaa sümaa waküjüin pütchi waashajeʼerüinjatü tü Wiwüliakat. Müleka eere süpüla, waashajeʼera wanee wersiikulo namüin na wayuu waküjakana amüin pütchi. Wasakinnüle sünain wanee kasa, anasü wasouktüle shiʼipajee süka tü Wiwüliakat. Nnojorüle süpüla naashajaain wamaa na wayuukana eesü süpüla waashajeʼerüin wanee wersiikulo sümaa wamüin: «Süpülapünaa toʼunuin taashajeʼereein pümüin wersiikulokat tüü». Müleka eere süpüla, waashajeʼera shia sünainjee tü Wiwüliakat otta wooʼulaa naashajeʼerüin shia wanaajiraa wamaa.
4 Wanaa sümaa naashajeʼerüin wanee aküjüi pütchi kojuyasü wersiikulo nümüin wanee wayuu süpüla niiʼiyatüin nnojoluin apünüinshin sümaa waneeshiain Maleiwa, müshi chi wayuukai: «kakaliaichi taya oʼunuin suluʼumüin tü iküleesiakat, nnojotsü tatüjaain aaʼu müin sünüiki tü Wiwüliakat». Sutuma tia, nücheküin ekirajawaa sünain tü Wiwüliakat. Naashin Jesús saapeerü nünüiki tü naʼanneetsekalüira (Juan 10:16, 27). Süpüla nayaawatüin na wayuukana tü shiimainkat, choʼujaasü neʼrüinjatüin shia suluʼu tü Wiwüliakat. Sutuma tia, weeʼiyata nünüikin Maleiwa tü Wiwüliakat.