¿Nayaawata aaʼu watuma tü waküjakat namüin?
1. ¿Kasa analeejeetka atuma aküjaa pütchi?
1 ¿Kasa analeejeetka atuma aküjaa pütchi, woʼotule naaʼu na wayuukana tü pütchi waküjakat? ¿Shiataapa wakaaliinjüin naya sünain ayaawataa saaʼu süpüla pansaain shia namüin? Nükaaliinjüin Pablo na judío chajanakana Tesalónica sünain ayaawataa saaʼu tü pütchi nüküjakat namüin, müsüjeseʼe ‹eein nanoujain noʼuluku› (Aluw. 17:2-4). ¿Kasakaʼa sünainpünaain tia?
2. ¿Kasa waainjüinjatka süpüla washatüin nukuwaʼipa Pablo sünain aküjaa pütchi?
2 Kojutü wamüin tü namakat na wayuukana. Kojutüinjatü wamüin tü jülüjakat naaʼin na waküjakana amüin pütchi süpüla wakaaliinjüin naya sünain ayaawataa saaʼu tü pütchi waküjakat. Soʼu naashajaain Pablo namaa kojuyashii griego manoujüinsalii jutkatakana eekai wanee Areópago, shia naashajaaka achiki palajana tü neʼraajakat otta tü anashiikat namüin (Aluw. 17:22-31). Müinjatia neʼe shia watuma yapajapa waya süpüla aküjaa pütchi (1 Cor. 9:19-22). Eere wanee kasa mojushiika namüin na wayuukana, wachajaainjatü kasain anain süpüla waashajaain achiki namaa.
3. ¿Jamüsü nayaawateetka saaʼu wanee kasa na wayuukana müleka wasakirüle naya?
3 Ana maʼin wasakiria. Nnojorüle watüjaain aaʼu jalaichin wanee wayuu, iseerü wachiki waküjüin nümüin tü wopu naapaainjatkat süpüla nüsitujain. Müshiʼiya na wayuukana, iseerü wachiki wakaaliinjüin naya sünain ayaawataa saaʼu wanee pütchi nnojorüle watüjaain saaʼu kasain jülüjüin naaʼin. Süpülapünaa nayaawatüin saaʼu wanee kasa na wayuukana nutuma Jesuu, nüsakirawalin naya süpüla nütüjaain saaʼu tü jülüjakat naaʼin. Wanaa sümaa nümünüin Jesuu: «¿Kasa taainjüinjatka süpüla katüin toʼu waneepia?», nüsakirüin chia wayuukai süpülapünaa nüsouktüin (Luc. 10:25-28, NM). Wanaa sümaa nnojoluin pansaain tü nümakat Pedro, nüsakirüin nia Jesuu süpüla nünoukteʼerüin tü nümakat (Mat. 17:24-26). Makalaka wasakirüinjanain na wayuukana süpüla nayaawatüin saaʼu tü nnojotkat pansaain namüin otta tü nnojotkat nayaawatüin aaʼu.
4. ¿Jamüshii wakaaliinjüinjana na wayuukana sünain ayaawataa saaʼu wanee kasa?
4 Wakaaliinjüle na wayuukana sünain ayaawataa saaʼu wanee kasa, washatüin nukuwaʼipa Jesuu chi Atüjakai maʼin Ekirajaa otta na aküjülii pütchi atüjakana maʼin eejanaka nükalioʼu. Otta kojuteena wamüin na wayuukana (1 Ped. 3:15). Waainjüle tia, eesü süpüla keeʼireejeerüin naaʼin wawaraijaain naaʼu.