Atüjüinjana waya aküjaa pütchi: wanüikinjatka neʼipajee na kanüikiyaakana wamüin

¿Jamüsü waaʼinrüinjatkat tia? Jülüjataa waaʼin eeinjatüin wanee wawai otta sukutkujaainjatüin mmaka. Watteerü saalin wayuu oukteetka nnojorüle saapinnüin. Awataa müshiijaʼa waya nipialuʼumüin wanee wayuu sünain aapiraa nia suulia tia. «Nnojo pikeʼejüin taaʼin», nümüle pümüin. ¿Kaseerü paainjaka? Püchajaweerü sukuwaʼipa süpüla jaa müinjachin pümüin, ¿aashimüin? Wainma na wayuu nnojoliikana aaʼin shiiʼiree aapajaa wanüiki saaliijee nnojoluin natüjaain saaʼu eein süpüla noʼttaain sutuma tü wamakat. Eesüjaʼa shiale sutuma wanee kasa alataka namüin (Mat. 24:37-​39). Jee shiale sutuma süküjünüin namüin alawaa wachiki (Mat. 11:​18, 19). Eesüjaʼa süpüla nayouktüin naapajüin wanüiki saaʼujee tü kasa mojusü naaʼinrakat na wayuu suluʼukana tü iküleesiakalüirua (2 Ped. 2:​1, 2). Nnojorüle saaʼin wayuu sünain aapajaa wanüiki, ayata wachajaain sukuwaʼipa süpüla kamalain namüin tü pütchikat.