Wekirajaainjatka sünain tü outkajawaa miyoʼu piamakat kaʼi
¿Jamüshii süpüla eejiraain waya namaa na ayouktakana tü anoujaa shiimainkat? ¿Kasa waaʼinrüinjatka süpüla wayamülüin tü kasa mojusü oʼunireekat waya wachikuaʼa naʼakamüin na wayuu ayatakana aainjüin kasa mojusü? Asouktüneerü asakiraakat tüirua sünain tü outkajawaa miyoʼu piamakat kaʼi, soʼu tü juyakat 2009. Sünülia tü pütchikat: ‹Ayata wayamülüin tü kasa mojusükat süka tü kasa anasü waaʼinrakat›, suluʼujeejatü Roma 12:21. Tü wekirajaainjatkat anain shia tüü.
Chi wawala ayaatakai soʼu outkajawaakat tia aashajaweechi süchiki tü pütchikalüirua: «Katsüin waaʼin süpüla wayamülüin tü kasa mojusükat süka tü kasa anasü waaʼinrakat», «Nnojo piʼitaain paaʼin sünain tü pütüjaakat aaʼu», «Alüʼütsü süpüla sajaʼlajaain tü kasa mojusükat» otta «Katsüin wanoula watuma süpüla wayamülüin na manoujuinsaliikana». Chi waraittakai waaʼu eere woutkajaain nikirajeena waya sünain tü pütchikalüirua: «Eeja waaʼin maaʼutpünaa», suluʼujeejatü Roma 13:11-13, otta «Nnojo matsüin waaʼin wanaa sümaa weʼrüin müliaa», suluʼujeejatü Proverbios 24:10. Otta müsia waapajeein maʼin tü pütchikat: «Wanoʼuteʼerüinjatka eere woutkajaain». Aküjüneerü wanee pütchi anasü maʼin sünülia: «Waʼyataa nümüin Maleiwa sünain aküjaa pütchi waneepia». Aküjünajatü piamasü pütchi eeinjanale nekirajüin kojuyashii wawalayuu sünülia tü palajatkat shia: «Ayata ichein waaʼin süpüla wayouktüin tü kasa mojusü nimeejakat aka wayuu chi Yolujaakai». Sükaaliinjeena waya süpüla wayaawatüin tü naainjakat chi Yolujaakai süpüla nimeejüin na wayuukana sükajee tü Interneekat, telewisoot otta ekirajawaa maʼin suluʼu tü ekirajaalee miyoʼusükat. Sünülia tü chiiruaajatkat pütchi shia: «Katsüin waaʼin süpüla wayouktüin tü kasa mojusü waaʼinreekat nutuma Satanás» pütchikat tüü, sükaaliinjeena waya süpüla weʼitaain suluʼu wakuwaʼipa tü sümakat Éfeso 6:10-18.
Tü aküjaakat pütchi süchiki nuluwataaya Maleiwa sünainpünaasü wajaʼttiraleʼeinya tü kasa mojusükat (Alat. Map 12:17). ¡Müsüjeseʼe müliain na aküjüliikana pütchi nüchiki Jeowa nutuma Satanás! (Isaías 43:10, 12). Akaisaʼa chi Yolujaakai nnojoleena niyamülüin waya süka «wayamülüin tü kasa mojusükat süka tü kasa anasü waaʼinrakat». Yapa waya süpüla wekirajaain maʼin sünain tü outkajawaa piamakat kaʼi.