Choʼujaasü maʼin ekirajawaa sünain tü Wiwüliakat sümaa wapüshi otta wamüiwaʼa
1. ¿Jamüshii jülüjaka waya naaʼin maaʼulu Nekiipuʼu na aküjüliikana pütchi nüchiki Jeowa? ¿Jamüsü naaʼinraka shia?
1 Maʼaka soʼu nakalia na nikirajüinkana Jesús, na Laülaayuu Nekiipuʼukana na aküjüliikana pütchi nüchiki Jeowa jülüjüshii naaʼin na aʼyataakana nümüin Jeowa (Aluw. 15:6, 28). Weʼrüin sülüʼülüin tü müliaa miyoʼusükat sutuma tü alatakat maaʼulu, sutuma tia choʼujaashaatasü maʼin aleewain waya nümaa Jeowa. ¿Kasa waaʼinrajatka süka tü kaʼi wayuʼlakat süpüla Ekirajawaa sünain wanee Karaloukta? Anasü wayuʼlale shia süpüla wekirajaain sümaa wapüshi. Müle shia watuma ekirajaweena waya sünain tü shikirajakat maʼin tü Wiwüliakat otta wousüteerü tü wüin eekat atuma kataa oʼu (Sal. 1:1-3; Rom. 11:33, 34).
2. ¿Kasa waaʼinrajatka süpüla wekirajaain aipa sümaa wapüshi?
2 Ekirajawaa sümaa wapüshi aipaʼa. Wachuntuin namüin na tooloyuukana süpüla naaʼinrüin tü nuchuntakat Jeowa, nekirajaainjanain waneepia sümaa napüshi (Deu. 6:6, 7). Na maʼwayuusekana eesü süpüla nekirajaain namüiwaʼa otta nachajaain sooʼomüin tü pütchikat. Choʼujaashaatasü maʼin «akatalaa tü kaʼi apütaakat» süpüla wekirajaain otta wasakiraajiraain waaʼin. Müle shia watuma katsüinjeerü tü wanoulakat «süka wainmain kasa mojusü maaʼulu» (Efe. 5:15, 16, NM).
3, 4. ¿Kasa wekirajaainjatka anain? ¿Kasa apüla?
3 Kasa wekirajaainjatka anain. Sutuma Índice de las publicaciones Watch Tower otta CD-ROM Watchtower Library anashaateerü maʼin ekirajawaa sümaa wapüshi süka wousüteerüin sooʼomüin pütchi süchiki tü wekirajaakat anain. Eeshi süpüla wekirajaain sünain tü pütchi suluʼukat La Atalaya, maʼaka saaʼin: «Pütchi namüinjatü na apüshiikana», «nekirajia na kachonshiikana» otta «pütchi napülajatü na tepichikana. Eesü süpüla wekirajaain wachikuaʼa sünain tü pütchi suluʼukat ¡Despertad!, maʼaka saaʼin: «Tü nasakirakat anain na jimaʼaliikana otta na majayünnüükana» jee shiale süchiki tü kasa nukumajalakat Maleiwa.
4 Jiattaʼale watuma saashajeʼeria tü Wiwüliakat makateerü suluʼu wekii otta waaʼin tü shikirajakat anain waya otta tü pütchi anakat atuma wakuwaʼipa (Heb. 4:12). Wanee kasa eeka süpüla waainjüin shia eʼrajaa otta aashajawaa süchiki tü alatinnakat suluʼu telewisoot natuma na wawalayuukana. Eesü süpüla wainmain sukuwaʼipa tü ekirajawaakat watuma. Wasakira na wapüshikana süchiki tü nekirajaweekat anain.
5. ¿Jamüsü choʼujaaka maʼin wekirajaain wamüiwaʼa otta sümaa wapüshi?
5 Jamüsü choʼujaaka maʼin shia. Katsüinre wanoula yapeena waya süpüla keraainjatüin watuma pütchikat tüü: «Jüchechera jaaʼin otta jiʼra kateerüin joʼu nutuma Jeowa» (Éxo. 14:13, NM). Choʼujaasü nakaaliinjünüin na kachonshiikana nutuma Jeowa süpüla nekirajüin nachonnii süka naʼakain naya «wayuu eekai manoujain» (Fili. 2:15). Choʼujaasü nakaaliinjünüin na tepichikana süpüla eejiraain naya sümaa tü kasa yarüttüsü aainjünakat suluʼu tü koleejiakat (Efe. 6:4). Na kaʼwayuuseshiikana nachecherüinjatü tü «jiiku apünüintuasü» naainjakat nümaa Jeowa (Ecl. 4:12, NM). Makalaka wayuʼluinjatüin kaʼi süpüla katsüinjatüin watuma ‹tü wanoula wulesükat maʼin› (Jud. 20).