Süpüla anain wakuwaʼipa sümaa wapüshi

1. ¿Jamapuʼusü nakuwaʼipa na israeliitakana sümaa napüshi sutuma naainjüin tü aluwataanakat anain saawanoʼu?

¹ Tü nuluwataakat anain Jeowa na israeliitakana saawanoʼu shia wanee kasa anaka atuma nakuwaʼipa sümaa napüshi: eemeraapuʼushii naya suulia tü naʼyataainkat, nasakirapuʼuin naaʼin sünain kamaneein maʼin Jeowa namüin otta anain nakuwaʼipa nümaa. Otta müshiʼiya na kachonshiikana nekirajapuʼuin nachonnii sünain tü nuluwataakat anain Jeowa (Deu. 6:​6, 7). Makalaka jülüjapuʼuin naaʼin na israeliitakana saawanoʼu weinshi tü sünainpünaakat nanoula.

2. ¿Kasa shikirajaka anain waya nüchiki Jeowa tü nuluwataakat anain saawanoʼu?

² Shiimain nnojoluin aluwataanüin na anoujüshiikana sünain tü aluwataanakat anain na israeliitakana. Akatsaʼa eesü tü shikirajakat anain waya nüchiki chi Wamaleiwasekai: shiain nücheküin maʼin anain nanoula na aʼyataakana nümüin (Isa. 48:​17, 18). Otta niiʼiyatüin tia maaʼulu sükajee tü Ai Waʼwaajakat oʼu Maleiwa sümaa Wapüshi.

3. ¿Kasapülajatü tü Ai Waʼwaajakat oʼu Maleiwa sümaa Wapüshi?

³ ¿Kasapülajatü tü Ai Waʼwaajakat oʼu Maleiwa sümaa Wapüshi? Soʼujee eneeroʼu 2009, aainjünüsü tü Outkajawaakat eere palitchon wayuu sümaʼaleʼeya tü Ekirajawaakat süpüla Aküjaa Pütchi otta tü Outkajawaakat süpüla Aʼyatawaa nümüin Maleiwa. Tü suʼwanajaanakat anainjee shia süpüla nakatalüinjatüin na wayuukana sümaa napüshi wanee ai soʼu tü semaanakat süpüla naʼwaajüin Maleiwa otta süpüla katchinjatüin nanoula. Makalaka süküjünüin namüin naʼwanajaainjatüin tü kaʼi nekirajaapuʼukat oʼu sümaa napüshi süpüla naainjüin shia soʼu tü ai noutkajaapuʼukat oʼu müleka eere süpüla naainjüin shia, süpüla nekirajaain sünain tü Wiwüliakat sümaa nnojoluin nashapajaain otta waneeirua kasa nanoukteʼerüinjatka na napüshikana.

4. ¿Waneeinjatü neʼe oora tü ekirajawaakat? ¿Jamüsü makaʼa pünüiki?

⁴ Akatsaʼa woutkajaaiwaʼaya, choʼujaapuʼusü kaʼi wamüin süpüla waʼanaain washeʼin, süpüla woʼunüin otta süpüla waneeirua kasa. Eeshii wawalayuu aleʼejaka kaʼlepa aika mayaapejeʼe waneein neʼe oora tü outkajawaakat. Süka suʼwanajaaitpain sükalia tü outkajawaakat eeichipa süpüla waʼwaajüin Maleiwa sümaa wapüshi soʼu kaʼikat tia. Sutuma tia, nnojotsü waneeinjatüin neʼe oora tia ekirajawaakat. Shia jülüjüinjatka waaʼin tü choʼujaakat sümüin wapüshi otta tü nakuwaʼipakat waneekapa jetsüinjatüin sümaa.

5. ¿Kottiraainjana naya waneepia sünain tü ekirajawaakat? ¿Jamüsü makaʼa pünüiki?

⁵ ¿Kottiraainjana naya waneepia sünain ekirajawaa? Wanaa sümaa nekirajaain na wayuukana sümaa napüshi otta na paʼwayuuseewashiikana sümaa machoin naya, atütüleʼerajiraashii naaʼin (Roma 1:12). Paaʼinwajiraashii maʼin naya. Tü ekirajawaakat sünain tü sümakat tü Wiwüliakat shiainjatü aainjünaka maʼin soʼu tü Ai Waʼwaajakat oʼu Maleiwa sümaa Wapüshi. Akatsaʼa eeshi chi akatalakai kaʼi süpüla nikirajaain nümüiwaʼa. Jamüsüjaʼa kettaapa nekirajaain eeshii süpüla ayatüin kottiraain naya akatsaʼa nekirajaain namüiwaʼa maʼaka saaʼin yapain natuma tü outkajawaakat jee shiale aashajeʼeraa tü rewiisütakalüirua. Soʼu aikat tia yokutüsü natuma waneeinnua wawalayuu tü telewisootkat.

6. ¿Jamüinjatü sukuwaʼipa tü ekirajawaakat?

⁶ ¿Jamüinjatü sukuwaʼipa? Nnojotsü shiainjatüin asakiraa jee asouktaa waneepia. Eeshii na wawalayuu ashatakana sukuwaʼipa tü outkajawaakat süpüla anain maʼin natuma sukuwaʼipa tü aʼwaajaakat Maleiwa, shiʼipawaisü natuma otta naatawaisü sukuwaʼipa. Eeshii na aashajeʼerakana tü Wiwüliakat sümaa napüshi, yapasü natuma süpüshi tü ekirajaanajatkat anain sünain tü outkajawaakat otta nooʼulaküin tü nanüikinjatkat sünain aküjaa pütchi. Aküjünüsü sooʼomüin tü sukuwaʼipainjatkat sünain süpana 6.

7. ¿Kasa akuwaʼipaa eeinjatka sünain natuma na kachonniikana?

⁷ ¿Kasa akuwaʼipaa eeinjatka sünain? Atüjamaatüshii na tepichikana eere neʼrüin kamanewaa otta aijirawaa. Eere süpüla jikirajaain anooipaʼa, jaainja tia. Otta eeshii süpüla jeemeraʼawaliin müleka choʼujaale shia. Eeshii na wawalayuu aainjakana eküülü neküinjatka sajaʼttapa. Mayaapejeʼe nnojoluin süpülajatüin aʼülüjaa otta achiawaa natuma na kachonshiikana tü Ai Naʼwaajaakat oʼu Maleiwa sümaa Napüshi eeshii süpüla nakatalüin waneeirua minuuto süpüla naashajaain süchiki wanee kasa neʼraka nanain na nachonniikana. Naainjüle chi nüchonkai wanee kasa nnojotka süpüla sütüjaanüin aaʼu, anashi naashajaale nümaa süchiki tia soʼu wanee kaʼi naata otta nümüiwaʼa suulia naapülijüin nia noʼupala na nuwalayuukana. Sünain tü Ai Waʼwaajakat oʼu Maleiwa sümaa Wapüshi shia jaʼyainjatka nukuwaʼipa chi Maleiwa talatakai aaʼin, nnojoliinjana akulajaain aaʼin otta jashichin naya sünain (1 Tim. 1:​11, NM).

8, 9. ¿Kasa naainjüinjatka chi aʼwayuuseekai süpüla yapain nia?

⁸ ¿Kasa naainjüinjatka chi aʼwayuuseekai? Aneerü sukuwaʼipa nüpüshi wanee wawala yapale nia süpüla nüküjüin tü shikirajaainjatkat anain nüpüshi sünain tü Ai Naʼwaajakat oʼu Maleiwa sümaa Napüshi otta jamüinjatüin sukuwaʼipa (Pro. 21:5). Anasü nüsakirüle tü nuʼwayuusekat süchiki tia (Pro. 15:22). Otta müsia, anashii jüsakirawaire na jüchonniikana süchiki tü eekat süpüla jaainjüin. Jaainjüle tia, jütüjaweerü aaʼu tü kamalainkat namüin jee tü shapaakat atuma naaʼin.

⁹ Eesü nnojoluwaire choʼujaain nülatirüin wainma kaʼi chi toolokoi sünain yapajaa. Eesü anale namüin na nüpüshikana waneepiain naya sünain wanee kasa semaanawai, müsüjeseʼe nnojoluin choʼujaain naainjüin pejeewa tü nekirajaainjatkat anain. Eesü niyaawatüle anain yapale nia mayaasü sajaʼttüin tü nikirajaakat anain sümaa nüpüshi süka jülüjayülüinya naaʼin tü kasa choʼujaakat sümüin sunoula. Eeshii aʼwayuusee ashajaka soʼutku tü naashajaainjatkat achiki sümaa napüshi otta niʼitaain eere jaʼyashiin, maʼaka sünain soʼu tü neweerakat. Sutuma tia, talatüshii maʼin otta naʼatapajüin tia kaʼikat na nüpüshikana otta eeshii süpüla yapain naya müleka choʼujaale shia.

10. ¿Kasa eeka süpüla naainjüin na namüiwaʼakana sünain anoujaa otta na maʼwayuusekana?

¹⁰ ¿Kasa eeka süpüla naainjüin na namüiwaʼakana sünain anoujaa otta na maʼwayuusekana? Na namüiwaʼakana sünain anoujaa otta na maʼwayuusekana eeshii süpüla nekirajaain namüiwaʼa soʼu tü Ai Waʼwaajakat oʼu Maleiwa sümaa Wapüshi. Tü anakat maʼin süpüla nekirajaain anain shia naashajeʼerüin tü Wiwüliakat, yapain natuma tü outkajawaakat otta naashajeʼerüin La Atalaya sümaa ¡Despertad! Eeshii na ekirajaakana sooʼomüin wanee pütchi jee wanee kasa süpüla natüjaain saaʼu. Otta eeshii eeka ounejaʼawalin wanee aküjüi pütchi jee niale wanee wawala sümaa nüpüshi süpüla nekirajaain sünain tü Wiwüliakat namaa.

11, 12. Püküja waneeirua kasa eeka sutuma weinshiwaire tü Ai Waʼwaajakat oʼu Maleiwa sümaa Wapüshi.

¹¹ ¿Kasa eeka sünainjee saainjünüle weinshi? Arütkaashii maʼin waya nünainmüin Jeowa wanaa sümaa waʼwaajüin nia süka süpüshuaʼa waaʼin. Na wayuu ekirajaakana sümaa napüshi aijiraashii maʼin naya. Müsü nanüiki wanee kasaatshii süchiki tia: «Pürekutsoot waya piamaleʼeya otta machonsalii waya makalaka wachuntaain maʼin tü Ai Waʼwaajakat oʼu Maleiwa sümaa Wapüshi. Arütkaajiraashii waya otta arütkaashii waya nünainmüin chi Washi iipünaajachikai. Maaʼulu, majiraashii waya wachijiraapa sükalioʼu tü ekirajawaakat: ‹¿Sotusü paaʼin kasa eeka soʼukai? ¡Waʼwaajüinjachi Maleiwa!› ».

¹² Eere wanee kaʼi natuma na wayuukana süpüla naʼwaajüin Maleiwa sümaa napüshi aneerü nakuwaʼipa jaʼitairü wainmain kasa naainjaka. Müsü wanee wawala pürekutsoot otta epijasü sümüiwaʼa piamashii süchonnii tooloyuu: «Sümaiwa paala müshii mekirajaainkai waaʼin. Süka mapüsain maʼin taya ekirajaʼawaishii waya soʼu wanee kaʼi. Isasü tachiki takatalüin wanee kaʼi süpüla. Ashajüsüjeseʼe taya jümüin süpüla taapüin jümüin tü analuʼutkat saaʼu tü Ai Waʼwaajakat oʼu Maleiwa sümaa Wapüshi. Ekirajaainnapa waya weinshiwai otta eesia weʼrüin kasa anasü sünainjee».

13. ¿Kaseerü anaka atuma nakuwaʼipa na wawalayuukana sümaa napüshi?

¹³ Tü Ai Waʼwaajakat oʼu Maleiwa sümaa Wapüshi nüsülajala shia wamüin otta süpülajatü anain wakuwaʼipa namaa wapüshi, müsia aka saaʼin tü aluwataanakat anain na israeliitakana saawanoʼu (Sant. 1:17). Süpüla anain nanoula na israeliitakana waneʼewai nakua sümaa napüshi, anainjatü sukuwaʼipa natuma tü saawanoʼu aluwataanakat anain naya. Müsia maaʼulu, süpüla anain wanoula anainjatü sukuwaʼipa watuma tü ai aapünakat wamüin süpüla waʼwaajüin Maleiwa sümaa wapüshi (2 Cor. 9:6; Gal. 6:​7, 8, NM; Col. 3:​23, 24). Anale maʼin jutuma sukuwaʼipa tia sümaa jüpüshi, jüküjeerü tü nümakat chi eeʼirajüikai: «Aluʼusaʼa tayakai anasü tamüin arütkawaa nünainmüin Maleiwa. Nia taneekaka süpüla tounjulaayain Jeowa chi Senyot Miyoʼushikai» (Sal. 73:​28, NM).

[Epiikürape suluʼu süpanaka 5]

Sünain tü Ai Waʼwaajakat oʼu Maleiwa sümaa Wapüshi shia jaʼyainjatka nukuwaʼipa chi Maleiwa talatakai aaʼin, nnojoliinjana akulajaain aaʼin otta jashichin naya sünain

[Epiikürape suluʼu süpanaka 6]

NNOJO PUJUTÜIN

Süpülajatü tü Ai Waʼwaajakat oʼu Maleiwa sümaa Wapüshi

Wiwüliaka:

• Jaashajeʼera süpüshi tü kapiitulo aashajeʼennakat semaanawai. Müleka eere süpüla saainjünüin eeshi süpüla eein wanee aashajeʼerakai tü aküjünakat achiki otta wanee aashajeʼerakai nanüiki na aashajaanakana achiki.

• Jüshata sukuwaʼipa wanee aküjalaa jaashajeʼeraka.

• Süpülapünaa juutkajaain, jaashajeʼera süpüshuaʼa tü kapiitulo jaashajeʼerüinjatkat otta jüshaja waneesia jee piamasü asakiraa süchiki. Süchikijee, jüchajaa süsouktia.

• Jüshaja wanee pütchi suluʼujeejatü tü Wiwüliakat suluʼu wanee karalouktachon, jütüjüinjatü shia otta jüküjüinjatü jamaluʼuluin. Jüniija tü karalouktachenkat otta jaashajeʼerawai shia semaanawai süpüla jütüjaain saaʼu jeʼrairüin pütchi jütüjakat.

• Jaapaja tü akürawaajünakat suluʼujee tü Wiwüliakat otta puʼunira shia suluʼu tü Piwiwüliasekat.

Outkajawaaka:

• Yapa jutuma süpüshi tü ekirajaanajatkat anain sünain tü outkajawaakat.

• Juuʼulaka tü jayeechi eeʼirajünajatkat soʼu tü wanee semaanakat.

• Müleka nikirajüinjachire wanee jaʼakajee sünain tü Ekirajawaakat süpüla Aküjaa Pütchi jee niiʼiyatüinjatüle shiyaawase wanee kasa sünain tü Outkajawaakat süpüla Aʼyatawaa nümüin Maleiwa, jüküja jamüinjatüin sukuwaʼipa jee juuʼulaka shia.

Choʼujaaka sümüin jüpüshi:

• Jikirajaa sünain tü karalouktakat Los jóvenes preguntan jee shiale Aküjalaa suluʼujeejatü tü Wiwüliakat.

• Juuʼulaka kaseerüin naainjüin jüchonnii sülatüle wanee kasa namüin sünain koleejiaa.

• Juuʼulaka jamüin jiayaale tepichin otta na tepichikana jiayaale jiakana. Ekirajaashi na tepichikana sünain wanee pütchi otta nayaawatirüinjana jia saaʼu.

Aküjaa pütchi:

• Juuʼulaka jamüinjatüin jünüiki sünain aküjaa pütchi saawanoʼu jee rimiinkoʼu.

• Jikirajaa sünain tü eekat süpüla jüsaʼwatüin sümaa jüpüshi süpüla kooʼomüinjatüin jiʼyataain nümüin Maleiwa soʼutpünaa sükalia Sotuin Waaʼin ouktüin Jesuu jee wakasionpa jia.

• Jükatala minuuto waneʼewai jukua süpüla jikirajaain sünain süsouktia tü asakinnakat anain jia sünain aküjaa pütchi, otta juuʼulaka shia.

Waneeirua sukuwaʼipa:

• Jaashajeʼera wanee pütchi suluʼujee tü rewiisüta jekennuukat.

• Jüneeka waneʼewai jukua süpülapünaa tü Ai Waʼwaajakat oʼu Maleiwa sümaa Wapüshi wanee pütchi kamalainka jümüin suluʼujee tü rewiisüta eekat maaʼulu otta jüküja süchiki tü jaashajeʼerakat sünainjee.

• Juunejaʼawai wanee aküjüi pütchi jee nayale wanee paʼwayuuseewashii sünain aʼwaajaa Maleiwa sümaa jüpüshi jee eeshii süpüla jüsakirüin naya.

• Jiʼraja otta jikirajaa sünain tü peliikula wamaʼanakalüirua.

• Jikirajaa suluʼujee ¡Despertad! tü pütchikat «Los jóvenes preguntan» jee «Actividades para la familia».

• Jikirajaa suluʼujee La Atalaya tü pütchikat «De padres a hijos» jee «El rincón del joven».

• Jaashajeʼera otta jikirajaa sünain shiʼipa tü Anuario jeketkat jee shiale tü karaloukta ojuʼitakat sünain tü chiiruaajatkat outkajawaa miyoʼu apünüinka kaʼi.

• Jikirajaa jüchikuaʼa sünain tü pütchi jaʼyakat maʼin sünain tü outkajawaa miyoʼu waneekat kaʼi, piamaka kaʼi otta apünüinka kaʼi.

• Jünanaja tü kasa nukumajalakat Jeowa otta jaashajaa süchiki tü shikirajakat anain jia Nüchiki.

• Jukumaja sukuwaʼipa shiyaakua wanee kasa suluʼu joʼuuchoin shia, jaainja shiyaakua mma otta ayaakuaairua.