Jeketü sukuwaʼipa tü outkajawaakat
1, 2. ¿Jamüinjatü sukuwaʼipa tü outkajawaakat soʼujee tü kashikat eneeroʼu 2009?
1 Soʼujee tü semaana oʼttakat 21 sünainmüin 27 tü kashikat apüriit soʼu 2008 aküjünüsü wanee pütchi anashaatasü maʼin namüin napüshuaʼa na wawalayuukana sainküin tü mmakat. «Soʼujee eneeroʼu 1 tü juyakat 2009 tü Ekirajawaakat sünain wanee Karaloukta eeʼiratünajatü sünülia süka tü anülieekat: Ekirajawaa sünain tü Wiwüliakat namaa na Wawalayuukana aainjünajatü wanaa sümaa Ekirajawaa süpüla Aʼyatawaa nümüin Maleiwa otta Waʼyataain nümüin Maleiwa».
2 Apünüinsü outkajawaa. Süpüshuaʼa tü outkajawaakat aainjünajatü soʼu wanee oora otta pienchi shikii jaʼralimüin minuuto sümaa weeʼirajüin otta waashajaain nümaa Maleiwa. Tü outkajawaakat oʼttajatü sümaa weeʼirajüin otta waashajaain nümaa Maleiwa (5 min.) süchikijee ekirajaweena waya sünain Ekirajawaa sünain tü Wiwüliakat namaa na Wawalayuukana (25 min.). Sajaʼttapa shieerü Ekirajawaa Süpüla Aʼyatawaa Nümüin Maleiwa (30 min.). Süchikijee eeʼirajeena waya (5 min.) süpüla wekirajaain sünain Waʼyataain Nümüin Maleiwa (35 min.). Süpüla sajaʼttüin tü outkajawaakat eeʼirajeena otta aashajaweena nümaa Maleiwa. Tü wekirajaainjatkat sünain tia apünüinsükat outkajawaa anteerü kashiwai suluʼu Waʼyataain nümüin Maleiwa».
3. ¿Jameerü sukuwaʼipa Ekirajawaa sünain tü Wiwüliakat namaa na Wawalayuukana?
3 Ekirajawaa sünain tü Wiwüliakat namaa na Wawalayuukana. Müinjatü aka saaʼin ekirajawaa sünain La Atalaya. Nnojotsü wekirajaainjatüin anain süchikuaʼa tü wekirajaakat anain soʼu tü semaana alatakat. Sutuma tia nnojoleena kamaʼain waya süpüla woʼttuin sünain ekirajawaa. Nashateerü tia na jutkatüshiikana, nnojoleena kamaʼain sünain asouktaa tü asakinnakat anain. Na ekirajüinjanakana naya na laülaashiikana suluʼu tü outkajaaleekat. Chi aaʼinmajakai tü aainjünakat suluʼu tü outkajaaleekat nüshajeerü nanülia otta pachikuatüinjana naya sünain ekirajaa.
4. ¿Kasa eeʼiratüneetka sünain tü outkajawaa süpülajatkat Waʼyataain Nümüin Maleiwa?
4 Outkajawaa Süpüla Waʼyataain Nümüin Maleiwa. Shiainjatü neʼe aʼwanajaaka tü pütchi aküjünakat wamüin, aküjünajatü soʼu 5 minuuto, keraasü tia süpüla saashajeʼennüin tü karaloukta sümaajatkat tü pütchi aashajeʼennajatkat saashin Weteet otta pütchi eeka choʼujaain süpüla süküjünüin. Tü aküjünakat waneepia maʼaka saaʼin tü kaʼi wojuʼitakat oʼu sünain aküjaa pütchi, na epitajüinjanakana tü outkajaaleekat, tü karaloukta sümaajatkat tü nneerü nejitakat na wawalayuukana otta tü waneeirua karaloukta suluwataakat Weteet, nnojoleerü aküjünüin soʼu tia jaʼraikat minuuto eʼitaaneerü shia sünain tü süpülajatkat karaloukta. Na ekirajüinjanakana yapainjana süpüla nekirajüin soʼu tü minuuto eʼitaanakat otta jülüjüinjatü naaʼin nekirajia.
5. ¿Jameerü sukuwaʼipa tü outkajawaakat nuwaraijaapa chi wawala waraittakai waaʼu?
5 Wanaa sümaa waraittüin waaʼu chi wawala waraittakai waaʼu. Nnojoleerü aʼwanajaain sukuwaʼipa tü outkajawaakat wanaa sümaa nüntüin chi wawalakai sünain awaraijawaa waaʼu. Maatteoʼu aainjüneerü tü outkajawaakat: Ekirajawaa Süpüla Aʼyatawaa nümüin Maleiwa otta Waʼyataain Nümüin Maleiwa. Süchikijee eeʼirajeena waya otta chi wawala waraittakai waaʼu ekirajeechi soʼu apünüin shikii minuuto. Ayateerü ayuʼnnuin wanee kaʼi soʼu semaanakat tia süpüla Ekirajawaa sünain tü Wiwüliakat namaa na Wawalayuukana süchikijee eeʼirajeena waya otta ekirajeechi chi wawala waraittakai waaʼu. Süpüla sajaʼttüin tü outkajawaakat eeʼirajeena otta aashajaweena waya nümaa Maleiwa
6. ¿Kasa naaʼinrajatka chi ekiipuʼukai sünain aküjaa pütchi?
6 Outkajawaa süpüla ojuʼitaa sünain aküjaa pütchi. Na laülaayuukana suluʼu tü outkajaaleekat neʼitaajeena wanee nekiipuʼu na wawalayuukana sünain aküjaa pütchi otta jülüjeena naya naaʼin. Naaʼinrajatüle shia wanee wawala akaaliinjaka na laülaashiikana, «akaaliinjüi na ojuʼitakana sünain aküjaa pütchi» müneechi.
7. ¿Kasa sükaaliinjeenaka anain waya tü outkajawaa aainjünajatkat semaanawai?
7 Maʼaka weʼrüin talateena maʼin waya sutuma tü wekirajaainjatkat anain sünain tü outkajawaakat, sükaaliinjeena waya süpüla watüjüinjanain maʼin aküjaa pütchi, ekirajaa otta sunoujuin wayuu watuma (Efe. 4:13, 14; 2 Tim. 3:17).
8. ¿Jamüsü anaka ekirajawaa süpülapünaa oʼunaa sünain tü outkajawaakat?
8 Wekirajaale palajana sünain tü wekirajaainjatkat anain sünain tü outkajawaakat, wayaawateerü aaʼu tü pütchi anakat maʼin. Wayalereerü wajapü süpüla wasouktüin otta watütüleʼerüin naaʼin na waneeinnua (Rom. 1:11, 12; Heb. 10:24). Keeʼireesü waaʼin ‹shiyaawatünüin wanoula› süpüla tia choʼujaasü ‹lotuin wakuaippa sünain ekirajaa tü shiimüinkat› (1 Tim. 4:15; 2 Tim. 2:15).
9. ¿Kasa waaʼinrajatka? ¿Jamüsü waaʼinrajatka shia?
9 Talatüshii maʼin waya sutuma suʼwanajaain sukuwaʼipa tü wekirajaainjatkat anain semaanawai sünain tü outkajawaakat. Müsüjeseʼe waainjeein tü nümakat ‹chi achepchiee oonookai otta kekiikai maʼin› otta ayatüin waya nümaa chi «Anneetpüʼü Anashaatashi[kai] maʼi» jee yapaka atuma waya süpüla tü «müliaa müleʼoshaata» alüʼütkat (Mat. 24:21, 45; Heb. 13:20, 21; Alat. Map. 7:14).