Waaʼinra «kasa süpüshuaʼa süpüleerua aküjaa pütchi anasü»
1. ¿Kasa naaʼinrajatka wanee aküjüi pütchi napüleerua na wayuukana? ¿Jamüsü naaʼinraka shia?
1 Süka keeʼireein naaʼin chi aluwataaushikai Pablo katüin noʼu na wayuukana waneepia, niyaawatüin choʼujaain maʼin nüküjüin pütchi namüin (1 Cor. 9:16, 19). Tia shia tü oʼunirakat maʼin waya sünain aküjaa tü pütchi anasükat sümüin wayuu.
2. ¿Kasa weiratüinjatka wanaa sümaa waküjüin pütchi? ¿Jamüsü weiratüinjatka?
2 Tü kaʼi anakat süpüla aküjaa pütchi. Wanee wayuu atüjaka olojoo nnojotsü nujutüin tü kulirakat eere anain nümüin, nujutüin shia eeinjachire kasirüin nia. Müshia wayakana ‹na olojuliikana wayuu› eesü choʼujaale weiratüin sukuwaʼipa nachajaaya na wayuu waküjakana amüin pütchi süpüla wousütüinjatüin wainma «jime eekai shikaajünüin ooʼulaka eekai mekaajuuin» (Mat. 4:19, NM; 13:47). Eeshii süpüla waküjüin pütchi suluʼu wopu watta maalü otta motsopa tü kaʼikat. Washata nukuwaʼipa Pablo süka nüküjüin pütchi eepünaale nia süpüla ‹nikeraajüin tü aküjaakat süchiki tü pütchi anasükat› (Aluw. 17:17; 20:20, 24).
3, 4. ¿Kasa waaʼinrajatka süpüla weeʼiratüin wanüiki sünain aküjaa pütchi? ¿Kasa eejeetka sutuma?
3 Waashajaa süchiki tü anakat namüin na wayuukana. Na olojuliikana jime neeʼiratüin sukuwaʼipa nejimejia wanaapünaa sümaa tü jime nolojuinjatkat. Jama wayakana, ¿kasa waaʼinrajatka süpüla anainjatüin wanüiki namüin na waküjakana amüin pütchi? Palajana, waashajaa süchiki wanee kasa anaka namüin na wayuukana otta süchikijee jülüja waaʼin tü naashajaakat achiki (Sant. 1:19). Süpüla naashajaain na wayuukana wasakira jamüin nanüiki süchiki wanee kasa (Pro. 20:5). Sutuma tia, aashajaweena waya namaa na wayuukana süchiki wanee kasa eeka anain namüin. Naaʼinrüin Pablo waneeirua kasa süpüla ‹nükaaliinjüin wayuu süpüshua› (1 Cor. 9:22). Jülüjüsü naaʼin tü anakat namüin na wayuukana, wanee akuwaʼipaa choʼujaaka süpüla wantüin suluʼumüin naaʼin na wayuukana.
4 ¡Talatüsü maʼin waaʼin sutuma waküjüin pütchi «süchiki kasa anasü»! (Isa. 52:7; NM.) Süka waküjeein pütchi sümüin wainma wayuu, waaʼinra «kasa süpüshuaʼa süpüleerua aküjaa pütchi anasü» (1 Cor. 9:23; NM).