Wanoukteʼera sukuwaʼipa waʼyataain sünain aküjaa pütchi
1. ¿Kasa waaʼinrajatka süka suʼwanajaʼawalin nakuwaʼipa na wayuukana?
1 Suluʼu tü karalouktakat 1 Corinto 7:31, NM, aashajaasü süchiki «süʼwanajaain sukuwaʼipa tü kasa aainjünakat mmapaʼa». Müsia neʼe nakuwaʼipa na wayuukana, aʼwanajaʼawaisü. Sükajee suʼwanajaʼawalin nakuwaʼipa na wayuukana choʼujaasü wanoukteʼerüin sukuwaʼipa waʼyataain sünain aküjaa pütchi otta tü kaʼi waneekakat süpüla aküjaa pütchi. ¿Eesüche süpüla waainjüin tia?
2. ¿Kasa waaʼinrajatka süpüla ayatüin waya wojununtaain süchiirua tü sukuwaʼipakat nupueulose Jeʼwaa?
2 Sukuwaʼipa waküjia pütchi. Nanoukteʼerawaliin na anoujüshiikana sukuwaʼipa naʼyataain sünain aküjaa pütchi. Wanaa sümaa nuluwataain Jesuu na nikirajüinkana sünain aküjaa pütchi, müshi nia namüin palajana sünain nnojoluinjatüin nachisein nakattoʼuise jee nalüʼüjüin nneerü (Mat. 10:9, 10). Nütüjaa aaʼu Jesuu müliainjanain na nikirajüinkana atumawaa otta wattakuwalinjatüin süküjünüin tü pütchikat sainküin tü mmakat, müsüjeseʼe nünouktüin tü nümakat paala namüin (Luc. 22:36, 37). Soʼu tü 100 juya alatüitpakat, tü nupueulosekat Jeʼwaa sunoukteʼerawalin sukuwaʼipa shiʼyataain sünain aküjaa pütchi wanaapünaa sümaa nakuwaʼipa na wayuukana. Wanee sukuwaʼipa shia süka wanee karaloukta eere nashajüin waneeirua pütchi suluʼujeejatka tü Wiwüliakat, yootushii suluʼupünaa raawia otta süka kemion kanainka emiyoʼujia pütchi. Maaʼulu yaa, wainma wayuu nnojotka wantüin anain shipialuʼu wanaa sümaa waküjüin pütchi sainküin miichi; makalaka süküjünawalin wamüin waküjüinjanain pütchi eere jouluin wayuu jee eepünaale waya. Süpüla wantüin nanain na wayuu aʼyataakana kaleʼupalain, aküjünüsü wamüin anain waküjüle pütchi aliikawai. Ojununtawaisü tü sukuwaʼipakat nupueulose Jeʼwaa chaka iipünaa meemataka aka saaʼin wanee kareeta. ¿Ayatüshiiche waya ojununtaain süchiirua tia? (Ezeq. 1:20, 21.)
3. ¿Kasa eeka süpüla waaʼinrüin süpüla süntüin suluʼumüin naaʼin na wayuukana tü pütchi waküjakat namüin?
3 Sukuwaʼipainjatka wanüiki. Shapaasü maʼin naaʼin na wayuukana sutuma nnojoluin nneerü, nnojoluin anain nakuwaʼipa sümaa napüshi otta sutuma jouluin maʼin tü atkawaakat. Watüjaale saaʼu tü shapaakalü atumaa naaʼin na wayuukana, mapüleejeerü wamüin wanoukteʼerüin sukuwaʼipainjatka wanüiki sünain aküjaa pütchi süpüla süntüin suluʼumüin naaʼin (1 Cor. 9:20-23). Naküjüle wamüin na wayuukana tü shapaakalü atuma naaʼin, nnojotsü shiainjatüin waküjüin namüin tü pütchi yapakat watuma wepialuʼujee, shia anaka wanoukteʼerüle wanüiki wanaapünaa sümaa nakuwaʼipa naya wayuu waküjakana amüin pütchi.
4. ¿Jamüsü wanoukteʼeramaatüinjatka sukuwaʼipa waʼyataain sünain aküjaa pütchi?
4 Alüʼütsü tü kaʼi eere nnojoluin suʼwanajaakuʼu sümüinjatüin sukuwaʼipa tü kasa aainjünakat mmapaʼa otta alüʼütsü tü mülia miyoʼusükat. «Palitchon tü kaʼi apütaakat». (1 Cor. 7:29, NM.) Müsüjeseʼe choʼujaain maʼin wanoukteʼerüin sukuwaʼipa waʼyataain sünain aküjaa pütchi. Müle shia watuma, wounteerü wakaaliinjüin wainma wayuu sünain tü kaʼi apütaakat.