Yapa waya süpüla tü kaʼi Asoʼirakat waaʼin ouktüin Jesús
Süka woʼunüin nüchiirua Cristo, talatüshii waya süka yapain watuma süpüshuaʼa tü kasa sünainpünaakat outkajawaakat tia (Luc. 22:19). ¿Kasa yapainjatka süpülapünaa tü kaʼi Asoʼirakat waaʼin ouktüin Jesús?
◼ Jalainjatüin otta jalapüshinjatüin shia. Natüjaainjatü aaʼu napüshuaʼa na wayuukana jalainjatüin otta jalapüshinjatüin outkajawaakat tia. Anashii wantüle maalü otta walaüleʼerüle waaʼin wojuʼitapa. Jülüjüinjatü waaʼin tia maka pachikuatüinjatüle tü outkajaaleekalüirua suluʼu tü Piichi Outkajaaleekat otta suʼttamaatüinjatüle wanee sajaʼttapa tü palajatkat. Nnojo jutkatüin jia soʼuluʼu tü outkajaaleekat, tü wopukot, tü süpüleekat kemion otta wisiküleeta.
◼ Ounejia. ¿Eeitpa namaʼana na aküjüliikana pütchi tü karaloukta ounejiakat otta natüjaaitpa aaʼu tü pütchi naküjüinjatkat? ¿Puuʼulaküitpa tü pünüikinjatkat süka tü ounejiakat? ¿Jara paapüinjatka amüin shia? Piitaja süpüshuaʼa tü ounejia pümaʼanakat.
◼ Eʼejenaa. Soto paaʼin eein wayuu choʼujaaka amüin kemion otta waneeirua kasa süpüla antaa sünain tü outkajawaakat. ¿Kasa aainjünaka süpüla eeinjatüin tia?
◼ Pan otta wiino. Jülüjüinjatü naaʼin na laülaashiikana sülatinnüinjatüin tü pankat otta tü wiinokot nikerotapa chi Kaʼikai. Eʼikajaanajatü tü pankat otta tü wiinokot namüin na wawalayuu aluwataainjanakana nümaa Cristo isaka achiki antaa süka ayuulin naya. Anainjatü tü pan otta wiino süpülajatkat outkajawaakat tia (paashajeʼera La Atalaya ojuʼitaka pewüreeroʼu 15, 2003 süpana 14 pütchi 14).
◼ Piichi Outkajaalee. Choʼujaasü wulein maalü tü piichi outkajaaleekat, keraain tü iita süpülajatkat pan otta wiino otta wanee meesa sümaa tü saajunakat. Nnojoluinjatüle saainjünüin suluʼu tü piichi outkajaaleekat, eeinjatü wanee raawia anaka atuma aapajaa tü pütchi aküjünajatkat. Jiyuʼla kaʼi süpüla jüneeküin na jülüjüinjanakana aaʼin na antüshiikana otta na alatirüinjanakana tü pankat otta tü wiinokot süpüla jüküjüinjatüin namüin jamüinjatüin sukuwaʼipa natuma otta anainjatüin naʼanaaya.
Kojutüsü maʼin tü kaʼi Asoʼirakat waaʼin ouktüin Jesús suulialeʼeya waneeirua kasa aainjünaka juyawai. Yapeeshi waya waneʼewai wakua otta namaa na wawalayuukana süpüla kaʼikat tia. Naapeerü Jeowa wainma kasa anasü namüin na eeʼiyatakana kojutüin namüin tü naainjakat Jeowa napüleerua na wayuukana, naapüin chi Nüchon aikai nüpüla süpüla naapajiraain nikii.