Katchinsü wanoula sutuma waküjüin pütchi
1. ¿Kasa anasü eeka sutuma waküjüin pütchi?
1 Süka talateein Jeowa watuma ayatüshii waya sünain waküjüin pütchi süchiki kasa anasü, ¿aashimüin? Akatsaʼa eesü kasa anasü sutuma oonowaa sümüin tü pütchikat: «Püküja pümata waneepia tü nünüikikat Maleiwa» süka katchin wanoula otta talatüin waya (2 Tim. 4:2; Isa. 48:17, 18). ¿Jamüsü süpüla katsüin wanoula otta talatüin waya sutuma waküjüin pütchi?
2. ¿Jamüsü süpüla katchinjanain waya sutuma waküjüin pütchi?
2 Katchinsü wanoula otta anasü wakuwaʼipa. Sutuma waküjüin pütchi, jülüjüsü waaʼin tü kasa anasü eeinjatkat sutuma Nuluwataaya Maleiwa suulialeʼeya tü kasa mojusü alatakat weinshi (2 Cor. 4:18). Wanaa sümaa waküjüin namüin na waneeinnua tü shikirajakat tü Wiwüliakat, katchinsü wanoula otta kojutüsü wamüin tü shiimainkat (Isa. 65:13, 14). Otta taasia ayatüsü keeʼireein waaʼin naatain wakuwaʼipa noulia na manoujüinsaliikana wanaa sümaa wakaaliinjüin na waneeinnua süpüla anainjatüin nanoula otta ‹nnojoluinjanain süpüshin naya tü manoujainsatkalüirua› (Juan 17:14, 16; Rom. 12:2).
3. ¿Jamüsü süpüla anainjatüin wakuwaʼipa sünain anoujaa sutuma waküjüin pütchi?
3 Tü aküjaakat pütchi sükaaliinjüin waya süpüla anainjatüin wakuwaʼipa sünain anoujaa. Nnojotsü pülain waaʼin wanaa sümaa ‹wakaaliinjüin wayuu süpüshua› (1 Cor. 9:19-23). Wanaa sümaa waashajaain sümaa wayuu eeka «müliain saaʼin atümaa otta walakatüin shia maa aka saaʼin anneerü eekai marüleejuuin», wamüliajeein otta wakaaliinjeein naya süka süpüshuaʼa waaʼin (Mat. 9:36). Otta müsia wachecherüin waaʼin sünain waküjüin pütchi jaʼitaina müliain waya atumawaa otta nnojoluin kamalain namüin na wayuukana tü pütchi waküjakat. Talatüsü maʼin waaʼin wanaa sümaa waainjüin kasa anasü napüleerua na waneeinnua (Aluw. 20:35).
4. ¿Jamüsü pünüiki süka püküjüin pütchi?
4 ¡Anakatche maʼin tü alatakat wamüin! Sükajee tü aküjaakat pütchi yaletüsü naaʼin watuma chi anakai süpüla waʼwaajüin. Katchinsü waaʼin sutuma waküjüin pütchi. Watta saalii kasa anasü eeka namüin na jülüjakana aaʼin ‹ekeraajaa tü aküjaakat süchiki tü pütchi anasükat› (Aluw. 20:24).