Kojuta wamüin waʼyataain sünain aküjaa pütchi
1. ¿Jamüsü sünüiki wainma wayuu süchiki waküjüin pütchi?
1 Naashin na nuluwataakana aaʼu Satanaa shiʼyataain wayuu kekeʼerat otta malasü tü aküjaakat pütchi (1 Cor. 1:18-21, NM). Nnojorüle eejüin waaʼin suulia pütchikat tüü, eesü süpüla sümalajeʼerüin waaʼin otta nnojoliin waküjeein pütchi (Pro. 24:10; Isa. 5:20). ¿Kasakaʼa kojutüin maʼin atuma wamüin waküjüliin pütchi nüchiki Jeowa? (Isa. 43:10.)
2. ¿Jamüsü shiaka wanee aʼyatawaa wulesü tü aküjakat pütchi?
2 «Aʼyatawaa wulesü.» Tü aküjaakat pütchi shia wanee «aʼyatawaa wulesü» naashin Pablo (Roma 15:15, 16, NM). Jee müsia sutuma waküjüin pütchi aʼyataashi waya nümüin chi Wamaleiwase wuleshikai otta wakaaliinjüin nia süpüla wulein tü nünüliakat (1 Cor. 3:9, NM; 1 Ped. 1:15, NM). Niʼrüin Jeowa waʼwaajüin nia sutuma waküjüin pütchi, müsüjeseʼe sünainpünaain maʼin shia tü aʼwaajaakat nia (Heb. 13:15, NM).
3. ¿Jamüsü shiaka wanee aʼyatawaa anaka maʼin tü aküjaakat pütchi?
3 Aküjaa pütchi shia wanee aʼyatawaa anasü maʼin otta paliʼirü na aaʼinrakana shia. Naaʼinreein maʼin shia na aapieekana (1 Ped. 1:12, NM). Anasüje maʼin sukuwaʼipa natuma. Nuluwataapajaʼa waya Jeowa sünain tia aʼyatawaa anakat maʼin mayaainjeʼe müin waya aka saaʼin iita akumajuushi süka pootshi (2 Cor. 4:7, NM).
4. ¿Kasa weeʼiyataka aka kojutüin wamüin waküjüin pütchi?
4 Palajana shia watuma. Kojutüle wamüin aküjaa pütchi shieerü wanee kasa anasü maʼin wamüin otta wakataleerü kaʼi semaanawai süpüla waʼyataain sünain (Fili. 1:10). Jülüjataa waaʼin weeʼirajüliire nümaa wanee eeʼirai eʼraajünüshi maʼin. Süka kojutüin tia wamüin, ekirajaʼawaishiije waya süpülapünaa weeʼirajüin otta wanoukteʼerüinje maʼin weeʼirajia. Müsüjaʼaya neʼe sukuwaʼipa waküjüinjanapa pütchi ekirajaainjana waya süpüla ‹pansaain watuma shikirajia tü pütchi shiimainkat› otta waʼyataa achiiruat wanoukteʼerüin wekirajia (2 Tim. 2:15; 4:2, NM).
5. ¿Jaralii kojutüka amüin tü waʼyataainkat?
5 Nnojo wooʼulaain sümalajeʼerüin waya sünüiki wayuu. Eeyülia wainma wayuu eere waküjüin pütchi kojutüka amüin wawaraijaain naaʼu. Nnojotpejeʼe shiain keeʼireein waaʼin anain sünüiki wayuu wamüin, shia analeeka wamüin tü nümakat Jeowa. Watüja aaʼu kojutüin maʼin nümüin Jeowa tü waʼyataainkat (Isa. 52:7).