Weeʼiyatüin alin wapüla Maleiwa süka tü aküjaakat pütchi
1. ¿Kasa naainjaka Jesús sutuma aipüralin nia?
1 Naainjüin shia Jesús süka aipüralin nia. Jaʼyasü maʼin naaliin Jeowa nüpüla Jesús sünain süpüshuaʼa tü naainjakat sünain aküjaa pütchi. Niiʼiyatüin tia wanaa sümaa nümüin: «Chi toonookai amaa waneepia, nia chi Tashikai. Je jooluʼu saaʼu taaʼinrüinjatüin tü nuluwataakat anain taya, atüjaaneerü aaʼu sütüma wayuu sainküin mma sünain alin maʼi nia tapüla» (Juan 14:31). Müshiʼiya wayakana na oʼunakana nüchiirua Jesús eesü süpüla weeʼiyatüin alin wapüla Maleiwa sükajee waküjüin pütchi (Mat. 22:37; Éfe. 5:1, 2).
2. ¿Jamüsü wakuwaʼipa sünain aküjaa pütchi süka alin wapüla Jeowa?
2 «Kojuta pia [pünülia, NM] sütüma wayuu». Wanaa sümaa waashajaain namaa na wayuukana nüchiki Jeowa otta tü Nuluwataayakat, weeʼiyatüin alin wapüla Maleiwa otta kojutüsü nünülia sünainjee tia (Sal. 83:18; Eze. 36:23; Mat. 6:9). Maka nutuma Jesús, aküjüshii waya pütchi süka keeʼireein waaʼin kojutüin nünülia Jeowa otta saainjünüin tü keeʼireekat naaʼin (Mat. 26:39).
3. ¿Jamüsü wayamülaka tü mojukat atuma waaʼin süka alin wapüla Jeowa?
3 Wayamülüin tü mojukat atuma waaʼin süka alin wapüla Jeowa. Alanaʼaleesia suulia waneeirua kasa tü naaliinkat Jeowa wapüla (1 Cor. 13:4, 7). Wainma kasa mojusü ooʼuleʼereeka Jesús suulia aküjaa pütchi. Akaisaʼa eejiraain nia sümaa tia süka alin nüpüla Jeowa otta naaʼinreein tü keeʼireekat naaʼin (Mar. 3:21; 1 Ped. 2:18-23). Müshiʼiya wayakana wainma kasa alataka wamüin akatsaʼa, maʼaka nutuma Jesús wayamülüin shia süka alin wapüla Maleiwa. Washatüle nukuwaʼipa Jesús nnojoleena mmoluin waya sünain aküjaa pütchi. Shiimain mojuin waaʼin sutuma wapüshi, ayuulii, laülawaa otta nayouktüin na wayuukana tü pütchi waküjakat. Akatsaʼa tia, nnojoleena suuʼuleʼerüin waya suulia eeʼiyataa alin wapüla Jeowa wanaa sümaa waküjüin pütchi.
4. ¿Kasa eeka süpüla waainjüin wayakana na aikana apüla Maleiwa?
4 Katchinshii waya sutuma tü aipüralüükat otta weeʼiyatüin alin maʼin wapüla Maleiwa sükajee tü aküjaakat pütchi (1 Cor. 13:13). Süka sülüʼülüin maʼin tü kaʼi kojutüinjatkat oʼu nünülia Jeowa, ‹kooʼomüinjatü waalinjiraa› (Fili. 1:9; Mat. 22:36-38).