¿Yapashi pia süpüla koleejiaa?
1. ¿Kasa eeka süpüla paainjüin pikerotapa sünain koleejiaa?
1 ¿Jekechi pia koleejiain jee kakaliaichitaale pia sünain? Jaʼitaichi jekechin jee kakaliaichin pia sünain koleejiaa ooʼulaküneerü paaʼin süka jimaʼalin otta majayülüin pia sünain anoujaa. Akatsaʼa soto paaʼin eein ‹süpüla piiʼiyatüin tü shiimüinkat› (Juan 18:37). ¿Yapashi pia süpüla tia?
2. ¿Jamüshii wamaka yapain pia süpüla tü koleejiaakat?
2 Püsakireʼerüle paaʼin, nnojotsü süpüla shapaainjatüin paaʼin süka pikirajünüin nutuma Jeowa, na püshikana otta nutuma chi achepchiee oonookai otta kekiikai maʼin (Pro. 1:8; 6:20; 23:23-25; Éfe. 6:1-4; 2 Tim. 3:16, 17). Eesü pütüjaaitpale saaʼu tü kasa eejiraainjatkat amaa pia sünain koleejiaa. Pütüjaale saaʼu nakuwaʼipa na waneeinnua suluʼu tü koleejiakat, pikirajaa sünain tü pütüjaaitpakat aaʼu suluʼujee tü Wiwüliakat otta yapa pia süpüla püküjüin pütchi (Pro. 22:3). Pikirajaa püchikuaʼa sünain tü pütchi ekirajünakat otta tü sümakat tü Wiwüliakat suluʼu tü piamasükat karaloukta Los jóvenes preguntan, otta tü pütchi aküjünawaikat suluʼu ¡Despertad! namüin na wayuu wanaawakana amaa puuyase.
3. ¿Jaralii na eekana süpüla püküjüin amüin pütchi?
3 Soto paaʼin anain maʼin süpüla püküjüin pütchi suluʼu tü koleejiakat süka eein süpüla naatain sukuwaʼipa süküjia putuma. Jülüjüsü naaʼin na waneeinnua anain sukuwaʼipa püsheʼin, paʼanaaya, pünüiki otta tü paainjakat. Neʼrüin kojutüin pümüin na ekirajüliikana, na koleejiakana pümaa otta anain pukuwaʼipa sünain koleejiaa. Neʼrüin pütüjaain saaʼu tü keeʼireekat paaʼin. Saaʼin pümüin, ¿nnojoleerü asakinnüin jamüin naataka pukuwaʼipa? (Mal. 3:18; Juan 15:19.) Sutuma tia, eesü süpüla püküjüin tü pünoujakat anain (1 Tim. 2:9, 10). Soʼu tü juya koleejiakat oʼu pia, eejeerü miʼiraa aainjünaka sümüin tü wanteerakat otta tü kaʼi kojutükat atumawaa. Jameerü pünüiki püsakinnüle: ¿jamüshi nnojoika sünainpünaain pia tia? ¿Meechi pia? «Shia sutuma tü iküleesia kaluʼukat taya, aküjüi taya pütchi nüchiki Jeowa.» ¿Aküjataajeechipa pia pütchi nüchiki chi Püshi aipüraikai? Sutuma yapain otta nikirajüin pia Jeowa yapeechi pia süpüla püküjüin pütchi sümüin wayuu eeka eein maʼaka na koleejiakana pümaa otta na ekirajüliikana (1 Ped. 3:15).
4. ¿Jamüsü pütüjaaka saaʼu aneerüin pukuwaʼipa sünain tü koleejiaakat?
4 Eeshi mmorüle pia suluʼu tü koleejiakat, akatsaʼa soto paaʼin wainmain na wayuu keeʼireekana aaʼin aneein pukuwaʼipa. Otta müsia anasü jülüjüle paaʼin eein süpüla püküjüin pütchi sümüin wainma wayuu suluʼu tü pükoleejiasekat. Makalaka ¡nnojo mmoluin pia! ¡Yapashi pia süpüla koleejiaa!