¿Yapashii jüchonnii?

1. ¿Jamüshii yapainjanaka jüchonnii?

¹ Alüʼütsü süpüla nekerotüin sünain koleejiaa na tepichikana. Mayaainjeʼe apüleeruaaneerüin naaʼin otta eejeerüin tü eejiraainjatkat amaa naya, eeshii süpüla ‹neʼraajirüin tü shiimainkat› (Juan 18:​37, NM). ¿Jama jüchonnii? ¿Yapashii naya?

2. ¿Kasa natüjaainjatka aaʼu jüchonnii süpüla yapain naya?

² ¿Natüjaa aaʼu jüchonnii jaralüin tü kasa yaletakat atuma wanee maa otta mojuka nümüin Maleiwa? ¿Nayaawata aaʼu jamüin mojuka shia? ¿Yapashii naya süpüla eejiraain sümaa oʼunaʼairee suluʼumüin eʼikülee miyoʼu? ¿Natüjaa aaʼu kasain naainjüinjatüin napüleeruaanüle aaʼin shiiʼiree kamüraajüin naya, nasüin yootshi jee nakamüjüin? ¿Naküjüin neʼe nnojoluin süpüla naainjüin wanee kasa süka nanoujüin? ¿Natüjataapa naküjüin tü nanoujakat anain? (1 Ped. 3:​15.)

3. ¿Jamüshii süpüla yapain jüchonnii soʼu tü Ai Juʼwaajakat oʼu Maleiwa sümaa Jüpüshi?

³ Jikiraja naya soʼu tü Ai Juʼwaajakat oʼu Maleiwa sümaa Jüpüshi. Eeshii jaashajaweenale namaa süchiki wanee kasa sülatapa namüin. Akatsaʼa nnojoleerüin shapaain naaʼin jaashajaale namaa süchiki tia süpülapünaa nekerotüin. Jükatala waneesia jee piamasü Ai Juʼwaajaka oʼu Maleiwa sümaa Jüpüshi süpüla jaashajaain süchiki. Jüsakira jüchonnii kasain maʼin shapaain atuma naaʼin. Anasü jaashajaale jüchikuaʼa süchiki tü jaashajaakat soʼu juyakat tiainka süka eein süpüla nayaawatüin joo saaʼu (Sal. 119:​95). Eeshii süpüla juuʼulaküin jiayaain ekirajüliin, akaaliinjüliin na tepichikana süpüla naneeküin wanee kasa jee nayale na koleejiakana namaa. Jikiraja jüchonnii sünain asouktaa sükajee tü Wiwüliakat otta tü karalouktakat Razonamiento sümaa Los jóvenes preguntan. Nekerotüinjanapa süchonnii wanee wawala, suuʼulakawalin namaa tü nanüikinjatkat namüin na ekirajülii jekennuukana süpüla naküjüin naküjüliin pütchi nüchiki Jeowa. (Paashajeʼera La Atalaya ojuʼitaka tisienpüroʼu 15, 2010, süpana 3-5.)

4. ¿Kasa naaʼinrajatka wanee wayuu kachonshi eejaka aaʼin?

⁴ «Kapüleesü maʼin» maaʼulu yaa tü kasa eejiraainjatkat amaa na tepichi anoujüshiikana (2 Tim. 3:​1, NM.) Akatsaʼa nachajaain sukuwaʼipa na wayuu eejakana aaʼin süpüla yapain nachonnii (Pro. 22:​3). Müsüjeseʼe jükaaliinjüinjanain jüchonnii süpüla yapain naya süpülapünaa nekerotüin sünain koleejiaa.