Waküja maʼin pütchi namüin na tooloyuukana
1. ¿Kasa choʼujaaka maʼin sünain tü aʼyatawaa sünainpünaakat Nuluwataaya Maleiwa?
1 Maaʼulu kooʼomüinsü tü aʼyatawaa sünainpünaakat Nuluwataaya Maleiwa makalaka choʼujaain tooloyuu shikiipüʼüinjanaka (Mar. 4:30-32; Aluw. 20:28; 1 Tim. 3:1-13). Akatsaʼa, nayain kamalain amüin na jieyuukana tü pütchikat noulialeʼeya na tooloyuukana. Eeshii wayuu apütaka napüla na jieyuukana tü anoujaakat otta ekirajaa nachonnii nüchiki Maleiwa. ¿Kasa waaʼinrajatka süpüla neʼrüin na tooloyuukana choʼujaain Maleiwa namüin otta naʼwaajüin nia wamaa?
2. ¿Kasa nainkaka Pablo otta Pedro naküjapa pütchi namüin na tooloyuukana?
2 Wachajaa naya. Nünoujüle chi laülaakai saaʼu nüpüshi anoujeena na waneeinnua. Weʼra wanee shiyaawase, wanaa sümaa püreesain Pablo nümaa Silas aküjüshii pütchi nümüin wanee kaatsetpüʼü. Sutuma tia, woutiisashi nia namaa na nüpüshikana (Aluw. 16:25-34). Chaaʼaya Corinto aküjüshi pütchi Pablo nümüin «Crispo, wane sülaülashi tü ekirajüleekat, anoujashi nünain chi Senyotkai sümaʼaleʼeya süpüshuaʼa tü eekat nümaa nipialuʼu» (Aluw. 18:8). Otta aluwataanüshi Pedro nutuma Jeowa sünain aküjaa pütchi nümüin Cornelio chi shikiipüʼükai surulaat wanee «wayuu keisalashi sümüin nükuaippa nuʼupala Maleiwakai». Woutiisaka nia sümaa nüpüshi otta na naʼaleewainkana (Aluw. 10:1-48).
3. Maʼaka naaʼin Felipe, ¿eesü süpüla püküjüin pütchi namüin na ‹laülaakana saaʼu wayuu›?
3 Waküjüle pütchi namüin na ‹laülaakana saaʼu wayuu› eesü kasa anasü sünainjee (1 Tim. 2:1, 2). Süka noonooin Felipe nümüin chi aapieekai, nüküjaka pütchi nümüin wanee «wayuu kajapuluʼushi wane miyoʼu aʼyatawaa, süpüʼüyashi suwashirüin Candace, tü aluwataasükat suluʼu Etiopía». Niʼrüin Felipe ‹sünain naashajeʼerüin tü ashajuushikat nütüma Isaías, chi nünüikimaajachikai Maleiwa› otta nikirajaka nia nüchiki Jesús. Nünoujaka otta eeshi nüküjüle tü pütchi anasükat nuuyantapa nuumainpaʼamüin. Otta eeshi nüküjüle pütchi sümüin tü aluwataasükat otta na aluwataakana shiʼipajee, wayuukana naainnua nnojotsüjee süpüla naapajüin tia pütchi anasükat (Aluw. 8:26-39).
4. ¿Kasa waaʼinrajatka süpüla naapajüin na tooloyuukana tü pütchi anasükat?
4 Jalainjana wousütüin. Süka naʼyataain na tooloyuukana soʼukai, ¿eesü süpüla püchajaain sukuwaʼipa süpüla pujuʼitüin maʼin sünain aküjaa pütchi aliika, saawanoʼu jee rimiinkoʼu otta soʼu tü kaʼi kojutükat atumawaa? Püküjüle maʼin pütchi suluʼupünaa tü oikkaaleekat eesü süpüla püntüin nanain na tooloyuu nnojoliikana nepialuʼu. Na wawalayuu tooloyuukana eeshii süpüla naküjüin pütchi namüin na naʼyataajiraakana amaa. Pejeewale wakua sünain aküjaa pütchi shipialuʼupünaa wayuu eeshii süpüla wasakirüin nanain na tooloyuu sülaülakana napüshi.
5. ¿Kasa saaʼinrajatka wanee wawala süküjüle pütchi nümüin wanee toolo otta nikirajaweere sünain tü Wiwüliakat?
5 Süküjüle pütchi wanee wawala nümüin wanee toolo otta nikirajaweere sünain tü Wiwüliakat, nnojotsü sümüiwaʼainjatüin suuyantapa süchikuaʼa ouyantüinjatü shia nümaa suʼwayuuse jee niale wanee aküjüi pütchi otta aküjüt pütchi. Kooʼomüinre nünoula, anashi niale ekirajüin wanee wawala atüjaka ekirajaa.
6. ¿Jamüsü süpüla washatüin nukuwaʼipa Pablo süpüla wakaaliinjüin «wayuu süpüshua»?
6 Kemeʼeriainjatü wanüiki. Jülüjüshii naaʼin Pablo na aapajakana nünüiki otta nünoukteʼerüin sukuwaʼipa nikirajia süpüla nükaaliinjüin «wayuu süpüshua» (1 Cor. 9:19-23). Müshiʼiya wayakana, yapainjana süpüla waashajaain namaa na tooloyuukana süchiki wanee kasa eeka anain namüin. Eeshii na shapaakana aaʼin sutuma alin shiiʼiree nneerü, mojuin sukuwaʼipa naluwataaya na wayuukana otta aneein nakuwaʼipa na napüshikana. Eeshii nasakirüle jamüshii kataka noʼu, jameerü sukuwaʼipa tü mmakat otta jamüsü nuuʼulaaka Maleiwa eein tü müliaakat. Jülüjüle waaʼin tia, aneerü namüin na wayuukana tü pütchi waküjakat (Col. 4:6).
7. ¿Jamüsü süpüla kapülain nünüiki Maleiwa nümüin wanee aʼwayuusee manoulasai antaka sünain tü outkajawaakat sutuma nakuwaʼipa na wawalayuukana?
7 Tü waaʼinrajatkat süpüla wekirajüin na aʼwayuusee manoujüinkana. Süka anain maʼin nakuwaʼipa na wawalayuu jieyuukana namüin na naʼwayuuse manoujüinkana kapülasü namüin nünüiki Maleiwa, eesü süpüla naainjüin tia napüshuaʼa na wawalayuukana sükajee nakuwaʼipa (1 Ped. 3:1-4). Kapüleerü maʼin namüin wasaküle naya nantapa sünain tü outkajawaakat sümaa naʼwayuuse. Jülüja paaʼin, süka noutkajaain neeʼiyatüin nekirajaweein sünain tü Wiwüliakat otta eesü süpüla nacheküin shia.
8. ¿kasa naaʼinrajatka na wawalayuu tooloyuukana süpüla nakaaliinjüin na aʼwayuusee mamalainkana amüin tü kasa nünainpünaakat Maleiwa?
8 Eeshii na tooloyuu mamalainkana amüin tü kasa nünainpünaakat Maleiwa. Akatsaʼa mapa, nacheküin aashajawaa süchiki tü Wiwüliakat nümaa wanee wawala kamaneeka amüin naya. Suluʼu wanee outkajaalee eesü wanee apüshii eere nnojoluin nünoujüin chi toolokoi makalaka nawaraijaʼawaliin na wawalayuukana süpüla naashajaain nümaa süchiki wanee pütchi anaka nümüin. Mapa aashajaashii süchiki tü kasa nünainpünaakat Maleiwa otta woutiisaichipa nia. Otta wanee wawala nükaaliinjüin suʼwayuuse wanee wawala kamaneeshi sünain akumajaa süpaatiase nipia. Süka kamaneein chi wawalakai nümüin oʼttüshi chi wayuukai sünain ekirajawaa sünain tü Wiwüliakat (Gal. 6:10; Fili. 2:4, 5). Wawalayuu tooloyuukana, ¿eeshii süpüla kamaneein maʼin jia namüin na aʼwayuusee manoujüinkana?
9. Yapale watuma na tooloyuu woutiisakana, ¿kaseerü eeka sutuma?
9 Yapainjana watuma. Yapale watuma na tooloyuu woutiisakana süpüla naʼyataain suluʼu tü outkajaaleekat nümüin Jeowa. Meena naya maʼaka saaʼin wanee ‹asülajalaa› nutuma Maleiwa süpüla laülaainjanain suluʼu tü outkajaaleekat süpüla ekirajaa otta akaaliinjaa na waneeinnua sükajee tü natüjaakat aaʼu (Éfe. 4:8, 11; Sal. 68:18). Talatüinjana sümaa nacheküin aaʼinmajaa na anoujüshiikana (1 Ped. 5:2, 3). ¡Shieerü wanee kasa anasü maʼin namüin na wawalayuukana!
10. ¿Jamüsü anaka sukuwaʼipa wainma wayuu sutuma nükaaliinjünüin Pablo nutuma Ananías?
10 Anüü nukuwaʼipa Saulo, mayaapejeʼe müliain paala na anoujüshiikana nutuma eʼnnaajünüshi nia maʼaka naaʼin chi ‹aluwataaushikai sümüin wayuu sainküin mma› (Rom. 11:13). Müsüjeseʼe nnojoluin nüküjeein pütchi Ananías nümüin wanaa sümaa nuluwataanüin nutuma chi Senyotkai. Mapa nüküjaka pütchi nümüin Saulo, chi eʼnnaajünakai mapa süka tü anülieekat chi aluwataaushikai Pablo. Soʼu kojuya juya wainma maʼin na wayuu anakana akuwaʼipa sutuma nüküjüin pütchi Pablo. Jaʼitakajeʼe wayakana ayatüsü anain wakuwaʼipa sutuma tü karalouktairua nüshajakat Pablo otta süpüshi shia tü nünüikikat Maleiwa (Aluw. 9:3-19; 2 Tim. 3:16, 17).
11. ¿Jamüsü wachajaainjatka sukuwaʼipa süpüla waküjüin pütchi namüin na tooloyuukana?
11 Sutuma tia, wachajaa sukuwaʼipa süpüla wekeraajüin tü aküjaakat pütchi namüin na tooloyuukana. Süpüshuaʼa tü kasa waaʼinrakat süpüla tia, aneerü sukuwaʼipa nutuma Jeowa süka waainjüin tü keeʼireekat naaʼin otta waaʼinmajüin tü kasa sünainpünaakat Nuluwataaya.