Wakaaliinja na wayuu anoujakana aʼwayuuse
1. ¿Jamüshii nnojoliika nayain neʼe na wawalayuu manoujüinkana aʼwayuuse akaaliinjeeka naʼwayuuse süpüla nanoujüin?
1 ¿Jeʼrashii na juwalayuu manoujüinkana aʼwayuuse eere juutkajaain? Shia keeʼireeka jaaʼin nanoujüin wanaajiraa jümaa. Tü keeʼireekat naaʼin na anoujüshiikana shia tü keeʼireekat naaʼin Maleiwa, «suʼtteʼennüinjatüin wayuu süpüshua sümaa sütüjaainjatüin saaʼu tü shiimüinkat» (1 Tim. 2:4). Manoujüinre nuʼwayuuse jee suʼwayuuse wanee wawala, ¿kasa eeka süpüla waainjüin süpüla warütkaain nanainmüin?
2. ¿Jamüsü anaka wayaawatüle saaʼu nakuwaʼipa na wayuukana?
2 Jülüjüinjatü waaʼin tü kasa wanaapünaakat sümaa nukuwaʼipa chi manoujüinsaikai. Wainma na wayuu aikana apüla napüshi, naapüin tü kasa choʼujaakat sümüin naʼwayuuse otta nachonnii, akatsaʼa eesü naatale nanoula woulia. Eesü nnojorüle wainmain tü natüjaakat aaʼu nachiki na aküjüliikana pütchi, shia neʼe natüjaaka aaʼu tü alawaa otta tü kasa mojusü münakat namüin natuma na naʼaleewainkana. Eeshii na mojukana amüin sükatalüin kaʼi naʼwayuuse süpüla oʼunaa suluʼu «tü iküleesiakat» soʼu tü kaʼi makatapuʼukat oʼu shia sümaa süpüshi. Wayaawatüle saaʼu nakuwaʼipa na anoujakana aʼwayuuse sükaaliinjeena waya süpüla waainjüin kasa anasü namüin otta kojutüin wamüin naya jee nnojoleena mmoluin waya neema (Pro. 16:20-23).
3. ¿Kasa waainjüinjatka süpüla kamaneein wamüin wanee wayuu anoujaka aʼwayuuse?
3 Wakaaliinja naya süka süpüshuaʼa waaʼin. Weʼraajaiwaʼaya naya wayuukana, nnojotsü shiainjatüin waashajaain achiki tü Wiwüliakat namüin, shia anaka aluʼu waainjüle kasa anasü noʼupala süpüla kamaneein naya wamüin (1 Ped. 3:1, 2). Analeeka aluʼu wakaaliinjüle naya süka süpüshuaʼa waaʼin. Na wawala jieyuukana eesü süpüla nakaaliinjüin nuʼwayuuse wanee wawala otta na tooloyuukana eeshii süpüla nakaaliinjüin suʼwayuuse wanee wawala. ¿Jamüinjatü sukuwaʼipa?
4. ¿Kasa waainjüinjatka süpüla wakaaliinjüin na wayuukana süka süpüshuaʼa waaʼin?
4 Nnojoyürüle piʼraajüin nuʼwayuuse jee suʼwayuuse wanee wawala, paashajaa palajana nümaa jee sümaa süchiki tü paainjüinjatkat. Jaʼitaichi mamaneein nia pümüin paashajaaiwaʼaya nümaa, nnojo mojuin paaʼin. Kamaneere pia nümüin otta pükaaliinjüle nia süka süpüshuaʼa paaʼin eesü süpüla sünouktaain tü suluʼukat naaʼin nachiki na aküjüliikana pütchi nüchiki Jeowa (Roma 12:20, NM). Eeshii na wawalayuu kakaliainnakana sünain anoujaa, ounejaaka naya sümaa napüshi nepialuʼumüin sünain ekawaa süpüla neʼraajiraainjanain otta nanoukteʼerüin wanee kasa mojusü. Aashajaashii süchiki kasa anaka namüin naya wayuukana, nnojoishii aashajaain süchiki tü kasa sünainpünaakat nanoula. Aashajaashii süchiki tia anapa naaʼin na wayuukana namaa. Süka neʼraajüinnapain noʼutku na wawalayuukana eeshii süpüla noutkajaain soʼu wanee kaʼi süpüla nayaawatüin namüiwaʼa tü ekirajünakat anain naʼwayuuse. Nnojoyürüle nekirajaweein sünain tü Wiwüliakat anashii nepeliisitaajünüle süka nakaaliinjüin naʼwayuuse.
5. ¿Kasa eeka süpüla naainjüin na laülaashiikana?
5 Nayainjana arütkaaka na laülaashiikana nanainmüin na wayuu anoujakana aʼwayuuse otta eejüinjatü naaʼin süpüla naküjüin pütchi namüin. Wanee wayuu eeka nnojoluin jamajatüin sümüin tü sümakat tü Wiwüliakat, eesü aneerüle saaʼin sutuma süküjünüin sümüin tü sümakat tü Wiwüliakat pitaaruluʼupa shia sutuma ayuulii jee mayeinre shia. Eere waneeinnua wayuu nnojoliika wanaawain anoula sümaa napüshi, sülatüle kasa mojusü namüin maʼaka saaʼin ouktüin napüshi, eeshii süpüla nounejaanüin natuma na laülaashiikana na wayuu nnojoliikana wanaawain anoula wamaa süpüla naapajüin tü pütchi sümüinjatkat napüshi.
6. ¿Jamüshii wakaaliinjüinjanaka na wayuu anoujakana aʼwayuuse?
6 ¡Jülüjataa paaʼin talateechin chi wawalakai jee tü wawalakat müleka nacheküle naʼwayuuse tü shiimainkat! Otta sutuma tia, talateechi maʼin Jeowa, na aapieekana otta napüshuaʼa na wawalayuukana (Luc. 15:7, 10, NM). Jaʼitakajeʼe nnojorüle jaa namüin naya wayuukana, ayatüinjana talatüin waya süka talatüin naaʼin Jeowa sutuma tü waainjakat waneepia otta ‹nücheküin shiyaawajaainjatüin wayuu süpüshuaʼa suulia saainjala. Aʼatapajüshi nia süka nnojoluin nücheküin süpüleerua eeinjatüin wayuu eekai amüloulin saaliijee manoujüin› (2 Ped. 3:9).
[Epiikürape suluʼu süpanaka 6]
Weʼraajaiwaʼaya naya wayuukana, nnojotsü shiainjatüin waashajaain achiki tü Wiwüliakat namüin, shia anaka aluʼu waainjüle kasa anasü noʼupala süpüla kamaneein naya wamüin