Yapa waya süpüla aküjaa pütchi eepünaale waya
1. Püküja süchiki wanee wayuu anoujaka sutuma nüküjüin pütchi Jesús eepünaale nia.
1 Eesü süpüla anain maʼin aküjaa pütchi eepünaale waya. Weʼrüin shiyaawase tia suluʼu tü Wiwüliakat natuma na aküjakana pütchi otta anoujüsü wayuu sünainjee (Juan 4:7-15). ¿Kasa waaʼinrajatka süpüla yapain waya süpüla aküjaa pütchi eepünaale waya?
2. ¿Jamüshii waküjeenaka pütchi anale washeʼin otta waʼanaaya?
2 Washeʼin otta waʼanaaya. Nnojorüle anain waaʼin sutuma waʼanaaya, eeshii süpüla nnojoluin waküjüin pütchi sutuma. Akatsaʼa anale washeʼin otta waʼanaaya nnojoleena japülin waya sünain aashajawaa süchiki wanoula (1 Tim. 2:9, 10). Otta müsia, poneena waya naaʼin na wayuukana sutuma wulein washeʼin otta anain waʼanaaya. Alatüsü tia namüin wanee aküjülii pütchi joyotüshii naʼatoʼu wanee musulmán sünain oʼunajawaa. Süka anain naʼanaaya nüsakirüin naya wayuule anoujüshii, sutuma tia aashajaashii naya nümaa soʼu apünüin oora.
3. ¿Oʼttüichi pia sünain aküjaa pütchi süka püshatüin tü naainjapuʼukat Jesús?
3 Woʼttüinjatka aka aashajawaa. Wanaa sümaa naashajaain Jesús sümaa wanee wayuu samariajeʼewat süʼütpaʼa tü ishi nükumajalakat Jacob, mapüleesat suʼttia nünüiki, ojulijashi yootchon wüin saaʼu. Müshiʼiya wayakana, eeshii süpüla woʼttüin sünain aashajawaa süka wanee asakiraa jee waküjüle süchiki wanee kasa. Eeshii mmoluwaire waya, akatsaʼa wanoujüle sünain nükaaliinjeenain waya Jeowa, ‹nüchechereerü waaʼin› süpüla woʼttüin sünain aküjaa pütchi (1 Tes. 2:2).
4. ¿Kasa waaʼinrajatka süpüla yapain waya süpüla aküjaa pütchi eepünaale waya?
4 Wachajaa sukuwaʼipa tü aküjaakat pütchi. Eeshii waneeinnua aküjülii pütchi achajaaka sukuwaʼipa aküjaa pütchi eepünaale naya. Eesü süpüla püinküin tia. Palajana jülüja paaʼin pukuwaʼipa otta süchikijee jülüja paaʼin na wayuu püntiraakana amaa eepünaale puʼunüin. Pülüʼüja karaloukta anaka süpüla aküjaa pütchi otta wanee Wiwülia joʼuuchon. Jülüja paaʼin nakuwaʼipa na wayuu püʼütpaʼakana. Süka jülüjüin paaʼin na wayuu eekana süpüla püküjüin amüin pütchi soʼukai, yapeechi pia süpüla anain süküjia pütchi putuma (Fili. 1:12-14; 1 Ped. 3:15).
5. ¿Jamüshii waküjüinjanaka maʼin pütchi eepünaale waya?
5 Eesü piamasü kasa waküjüinjatka atuma pütchi eepünaale waya: süka alin wapüla Maleiwa otta na wayuukana (Mat. 22:37-39). Süka sülüʼülüin nükalia Maleiwa, choʼujaasü maʼin waküjüin pütchi eepünaale waya, nnojotsü waainjüinjatüin shia eere kaʼi süpüla. Süka eeyülüinya kaʼi süpüla aküjaa pütchi süchiki Nuluwataaya Maleiwa namüin na wayuukana, choʼujaasü yapainjanain waya süpüla tia (Rom. 10:13, 14, NM; 2 Tim. 4:2).