Aküjülii waya Pütchi waneepia
1. ¿Kasa shikirajaka anain waya wanaa sümaa nüküjüin pütchi Jesús sümüin wanee wayuu ajaʼitüsü?
1 Kojuya oora waraittaka oʼu Jesús, mapüsashi otta miyaasüshi nia. Wanaa sümaa noʼunüin na nikirajüinkana sünain apalaalajaa, nüikkalaakalaka sünain eemerawaa süʼütpaʼa wanee mma Sicar sünülia. Nnojoishi oʼunüin sünain aküjaa pütchi Samariamüin, alatapünaashi neʼe, chainjachi aküjüin pütchi Galileamüin. Akaisaʼa, nüküjaka pütchi sümüin wanee wayuu ajaʼitüsü (Juan 4:5-14). ¿Jamüsü naainjaka tia? Shia süka niain «chi lotokai akuaippa sünain aküjaa tü shiimainkat nüchiki Maleiwa» (Alat. Map. 3:14). Washateere nukuwaʼipa Jesús, aküjüliinjana waya pütchi waneepia (1 Ped. 2:21).
2. ¿Kasa waaʼinrajatka süpüla yapain waya süpüla aküjaa pütchi eepünaale waya?
2 Yapa pia. Süpüla yapain waya süpüla aküjaa pütchi eepünaale waya, alüʼüjüinjana karaloukta. Wainma wawalayuu alüʼüjaka tü karalouktachenkat otta naapüin shia namüin na aʼyataakana suluʼu oikkaalee, oikkaaliikana kosoliina otta waneeirua wayuu nantiraaka amaa soʼukai (Ecl. 11:6). Wanee wawala oʼunajaaka weinshi, sülüʼüjüin tü Wiwülia joʼuuchonkat, tü karalouktakat Kasa shikirajaka otta aashajaasü shia namaa na aikkalaakana saʼatoʼu.
3. ¿Jamüsü süpüla woʼttüin sünain aashajawaa süchiki tü Wiwüliakat?
3 Woʼtta sünain aashajawaa. Waküjapa pütchi eepünaale waya, nnojotsü choʼujaain woʼttüinjanain sünain aashajawaa süchiki tü Wiwüliakat. Wanee shiyaawase, wanaa sümaa naashajaain Jesús süʼütpaʼa wanee ishi sümaa tü wayuu samariajeʼewatkat, nnojotsü nüküjamaatüin niain chi Mesíaskai, ojulijashi nia yootchon wüin süpüla nüsüin ponoko saaʼin tü wayuukot tia (Juan 4:7-9). Saainjüin tia wanee wawala wanaa sümaa süsakinnüin anale maʼin sümüin tü kaʼi kojutükat atumawaa, nnojotsü asouktüin neʼe nnojoluin sünainpünaain tia süka süküjülüin pütchi nüchiki Jeowa. Müsü shia: «Taneeküin nnojoluin sünainpünaain taya tia». Süka natüjaweein saaʼu na wayuukana jamüin nnojotka sünainpünaain tia, aküjüsü shia pütchi namüin.
4. ¿Jamüsü sütütüleʼeraka paaʼin tü sümakat Mateo 28:18-20?
4 Mayaapejeʼe nikeraajüin Jesús tü aʼyatawaakat nümüin Maleiwa saaʼu tü mmakat, ayatüsü jülüjüin naaʼin tü aküjaa pütchi nuluwataakat anain waya (Mat. 28:18-20). Washateerü nukuwaʼipa Jesús yapale waya süpüla waküjüin süchiki wanoula namüin na wayuukana eepünaale waya (Heb. 10:23).