Atüjüinjana waya aküjaa pütchi: Wayainjana asouktaka palajana

¿Jamüsü waainjüinjatka shia? Wojuʼitawaipa sünain aküjaa pütchi sainküin piichi, eeshii nnojoliire wapüla na wayuukana nepialuʼu. Makalaka nnojoluin waküjüin tü pütchikat namüin. Eeshiijaʼa süpüla wantiraain namaa naya wayuukana woʼotoopa suluʼu eʼejetuu, chale pitaaruluʼu waya, weemeraapa sünain aʼyatawaa jee koleejiaa. Tü keeʼireekat naaʼin Jeʼwaa napüleerua na wayuukana shia natüjaainjatüin saaʼu süchiki nukuwaʼipa sünain aluwatawaa (1 Tim. 2:3, 4). Wayainjana asouktaka palajana nanainmüin na wayuukana süpüla waküjüinjanain pütchi namüin.

Anuu tü paaʼinrajatkat:

Jülüja paaʼin jaraliinjanain paashajaain amaa. Piʼrüle kamaneein wanee wayuu sümaa nnojoluin süshapajaain maʼin, püchajaa sukuwaʼipa süpüla paashajaain sümaa. Eeshii wawalayuu eirakaaka sümüin suʼupünaa wayuu palajana sümaa nakulemeraain sümüin. Sükulemeraale tü wayuukot neʼipajee, nasakirüin sünain wanee kasa süpüla yootuin naya sümaa.
Puʼuraaja nümüin Maleiwa suluʼu paaʼin müleka piimolojoole seema aküjaa pütchi (Neh. 2:4; Aluw. 4:29).
Püsakira wayuu süchiki wanee kasa otta kamanee pia sümüin. Jamüshijaʼa Jesuu wamaa sümaa naashajaain sümaa wanee wayuu chejeʼewat Samaria, nnojotsü nüsakirüin uatuwoʼushi süchiki tü sünainpünaakat nukuwaʼipa Maleiwa sünain aluwatawaa (Juan 4:7). Eesüjaʼa süpüla müin pünüiki sümüin wanee wayuu: «Kamaneeshii maʼin na püchonniikana». Jee anasü püsakirüle shia sünain tüü: «¿Paapüin süchiki tü aküjünakat suluʼu telewisoot aipaʼamüinka?».
Paashajaapa sümaa wanee wayuu, püchajaa sukuwaʼipa süpüla püküjüin sümüin tü pütchi anasükat. Nnojo püshapajaain aaʼin shiiʼiree püküjamaatüin nüchiki Maleiwa. Paashajaa süchiki tü kasa sünainpünaakat sukuwaʼipa süpüla süsakirüinjachin pia sünain wanee kasa eekai sütüjaweein aaʼu. Paashajaale süchiki tü naainjüinjatkat wanee wayuu süpüla anain nukuwaʼipa sümaa nüpüshi, maa pünüiki: «Eesü wanee karaloukta aashajaaka süchiki tü naainjüinjatkat wanee wayuu süpüla anainjatüin shipijia nüchonnii nutuma». Müleka paashajaale sümaa wanee wayuu süchiki wanee kasachiki alataka, maa pünüiki sümüin: «Taashajeʼerüin jekenainka wanee kasa anashaatasü maʼin, aküjüsü süchiki kasa anasü alatüinjatka». Nnojo piyüülajaain müleka suʼunüle tü wayuukot süpülapünaa püküjüin sümüin tü pütchikat.
Pülüʼüjawai karalouktairua süpüla paapüin sümüin wayuu eekai kapülain saaʼin tü pütchikat.

Puuʼulaka süpüla wanee kashi:

Puuʼulaka semaanawai paashajaain sümaa wanee wayuu süpüla püküjüin pütchi sümüin.