Waküja pütchi süka süpüshuaʼa waaʼin
1. ¿Kasa jaʼyainjatka sünain tü aküjaakat pütchi?
1 Süpüshuaʼa tü aʼyatawaakat nümüin Maleiwa nnojotsü waainjüin süka aleinjatüinya neʼe shia, waainjüin shia süka süpüshuaʼa waaʼin. Makalaka wamünüin: «Anakaja jiʼyataale nümüin chi Senyotkai [Jeowa, NM] süka süpüshua jaaʼin» (Rom. 12:11). Akatsaʼa eesü tü kasa amalajeʼereekat waaʼin sünain tü aküjaakat pütchi. ¿Kasa waaʼinrajatka süpüla waküjüin maʼin pütchi süchiki Nuluwataaya Maleiwa? (2 Tim. 1:6, 7.)
2. ¿Jamüsü sünainpünaaka tü aküjaakat maʼin pütchi wekirajaale wamüiwaʼa?
2 Wekirajaa wamüiwaʼa sünain tü Wiwüliakat. Chi aküjüi pütchi atüjakai maʼin nia chi kojutükai amüin tü nünüikikat Maleiwa otta talatüsü naaʼin sutuma tü shiimain nuusütakat anain suluʼu (Sal. 119:97). Watüjaapa saaʼu wanee pütchi jeketü suluʼujee tü Wiwüliakat süka wekirajaain wamüiwaʼa, talatüsü maʼin waaʼin, ¿aashimüin? Makalaka keeʼireein waaʼin waʼwaajüin Maleiwa otta waküjüin pütchi nüchiki süka alin nia wapüla otta keeʼireein waaʼin waküjüin namüin na waneeinnua tü watüjaakat aaʼu (Heb. 13:15, NM). Shiimain tia, wanaa sümaa waküjüin pütchi süka süpüshuaʼa waaʼin weeʼiyatüin kojutüin maʼin shia wamüin.
3. ¿Jamüsü wakuwaʼipa sünain aküjaa pütchi nutuma chi naaʼinkai Maleiwa?
3 Wachunta nümüin Maleiwa chi naaʼinkai. Nnojotsü wainküin neʼe wamüiwaʼa anain sukuwaʼipa watuma tü aküjaakat pütchi (1 Ped. 4:11). Warütkaale nünainmüin chi ‹pülashikai maʼin› katchinjeena waya süpüla ayatüin waküjüin pütchi (Isa. 40:26, 29-31, NM). Wanaa sümaa sülatüin kasa mojusü nümüin chi aluwataaushikai Pablo sünain aküjaa pütchi, müsü nünüiki: «nükaaliijüin taya Maleiwakai» (Aluw. 26:21, 22). Müshiʼiya wayakana, eeshii süpüla nükaaliinjüin waya chi naaʼinkai Maleiwa süpüla waküjüin pütchi süka süpüshuaʼa waaʼin. Makalaka wachuntüinjachin nia nümüin Maleiwa (Luc. 11:9-13).
4. ¿Kasa eeka sutuma waküjüin pütchi süka süpüshuaʼa waaʼin? ¿Kasa jülüjüinjatka waaʼin?
4 Waküjüle pütchi süka süpüshuaʼa waaʼin, nashateerü shia na waneeinnua (2 Cor. 9:2). Otta taasia keeʼireejeerü naaʼin naapajüin wanüiki na wayuu waküjakana amüin pütchi süka anain süküjia watuma otta talatüin waya sünain waainjüin shia. Akatsaʼa wanaa sümaa waainjüin tia anainjatü wanüiki otta nnojoluinjana jashichijaain waya (Tito 3:2). Keeʼireesü waaʼin weeʼiyatüin eepünaale waya kojutüin wamüin na wayuukana otta tü naneekakat.
5. ¿Jarat tü pütchi woonooinjatkat amaa?
5 Waküja pütchi waneepia süka süpüshuaʼa waaʼin, wekirajaa wamüiwaʼa sünain tü Wiwüliakat otta woʼuraaja maʼin nümüin Jeowa chi aapakai chi naaʼinkai süpüla talatüin waya sünain aküjaa pütchi. Müle shia watuma, eeshii süpüla waküjüin pütchi nutuma ‹chi Naaʼinkai Maleiwa sümaa watüjaain saaʼu shiimüin tü wekirajakat anain› (1 Tes. 1:5).