Waʼyataa maʼin süka süpüshuaʼa waaʼin maatsoʼu otta aaʼuriiroʼu
1. ¿Kasa waʼyataaka maʼin anain soʼutpünaa sükalia eere Sotuin Waaʼin ouktüin Jesuu waaʼu?
1 Keeʼireesü maʼin naaʼin Jeʼwaa nikeraajüin tü nümakat. Atüjaana aaʼulu meerüin shia nutuma saaʼujee tü sümakat Isaías 9:7, tü makat: «Shiimain nikeraajeerüin Jeʼwaa tü keeʼireekat maʼin naaʼin». Müshia Jesuu, keeʼireesü maʼin naaʼin nuʼwaajünüinjachin chi Maleiwakai (Juan 2:13-17; 4:34). Aküjüshii maʼin waya pütchi soʼutpünaa sükalia tü outkajawaakat eere Sotuin Waaʼin ouktüin Jesuu waaʼu. Mayaa, washatüin tü nukuwaʼipakat Jeʼwaa otta Jesuu sünain keeʼireein maʼin waaʼin aʼyatawaa süka süpüshuaʼa waaʼin. Anashi piʼyataale maʼin nümüin Maleiwa soʼutpünaa sükalia tia outkajawaakat.
2. ¿Kasa waʼyataainjatka anain soʼujee maatsoʼu 7? ¿Kaseerü wounteetka waʼyataale maʼin soʼutpünaa sükalia tia outkajawaakat?
2 Wounejaa wayuu sünain tü outkajawaakat. Oʼtteena waya sünain ounejawaa wayuu maatsoʼu 7. Wachajaa maʼin sukuwaʼipa süpüla wounejaain wayuu suʼunnaa tia. Yapa waya süpüla waapüin sümüin wayuu tü karaloukta ounejaayakat jee shiale weeʼiyatüin namüin suluʼujee jw.org. Anasü waapüle tia karalouktakat namüin na wayuukana eepünaale waküjüin pütchi, namüin na ekirajaakana wamaa sünain tü Wiwüliakat, na aʼyataajiraakana wamaa, na koleejiajiraakana wamaa otta namüin na kasayuukana wanain.
3. ¿Kasa waainjüinjatka maatsoʼu otta aaʼuriiroʼu süpüla kooʼomüin waʼyataain nümüin Maleiwa?
3 Anashii pürekutsoorüle jia. Waʼyataale süka süpüshuaʼa waaʼin nümüin Maleiwa, aküjeena maʼin waya pütchi. Watteena naalii na pürekutsooleenakana aaʼusiliaat suʼunnaa maatsoʼu jee aaʼuriiroʼu. Süka jamüin, eein süpüla nalatirüin 30 oora sünain aküjaa pütchi. Jikirajaapeena sümaa jüpüshi soʼu tü Ai Juʼwaajakalü oʼu Maleiwa jee shiale jikirajaapeena jümüiwaʼa, eesü süpüla jaashajaajiraain süchiki tü jaainjüinjatkat süpüla jiʼyataain maʼin suʼunnaa tia (Prov. 15:22). Waʼyataale maʼin süka süpüshuaʼa waaʼin sünain ounejawaa wayuu sünain tü outkajawaakat eere Sotuin Waaʼin ouktüin Jesuu waaʼu, keeʼireejeeria naaʼin na wawalayuukana naʼyataajiraain maʼin wamaa soʼu tia. Wachajaale maʼin sukuwaʼipa süpüla waküjüinjanain maʼin pütchi, washateerü nukuwaʼipa Jesuu sünain keeʼireein maʼin waaʼin waʼwaajeein chi Maleiwakai (Mar. 6:31-34).
4. ¿Kaseerü weʼreetka suluʼujee washatüin nukuwaʼipa Jeʼwaa otta Jesuu sünain keeʼireein maʼin waaʼin aʼyatawaa süka süpüshuaʼa waaʼin?
4 Washatüle tü nukuwaʼipakat Jeʼwaa otta Jesuu sünain keeʼireein maʼin waaʼin aʼyatawaa süka süpüshuaʼa waaʼin, wainmeerü kasa anasü weʼreetka. Süka jamüin, waküjeenain maʼin pütchi soʼutpünaa sükalia tü outkajawaakat eere Sotuin Waaʼin ouktüin Jesuu waaʼu. Otta talateerü maʼin waaʼin sünain aʼyatawaa nümüin Jeʼwaa otta sünain akaaliinjaa wayuu (Aluw. 20:35). Jee müsia, talateechi maʼin Jeʼwaa otta Jesuu wamaa saaʼujee waaʼinrüin kasa anasü noʼupala.