Pürekutsoot aaʼusiliaat pia
1. ¿Jamüsü anaka süpüla wakooʼomüinjüin waʼyataain suʼunnaa tü kashikalüirua eere sotuinjachin waaʼin ouktüin Jesuu?
1 Suʼunnaa tü kashikalüirua eere Sotuinjachin Waaʼin ouktüin Jesuu waaʼu, anasü süpüla wakooʼomüinjüin waʼyataain nümüin Maleiwa. Suʼunnaa tia kashikalüirua, sotusü waaʼin alin waya nüpüla Jeʼwaa süka nuluwataain chi nüchonkai süpüla ouktüinjachin nia wooʼopünaa (Juan 3:16). Süka talatüin waaʼin sutuma tia naainjakat Maleiwa wapüleerua, aküjüshii waya süchiki tü kasa anasü naainjakat Jeʼwaa napüleerua na wayuukana napüshuaʼa (Is. 12:4, 5; Luc. 6:45). ¡Talatüsü maʼin waaʼin suʼunnaa waapirüin na wayuukana, na wapüshikana jee müshia na wayuu weʼraajakana süpüla noʼunüinjanain sünain tü outkajawaakat eere Sotuin Waaʼin ouktüin Jesuu! Noʼunapa mapa na wayuukana sünain tü outkajawaakat, ayatüinjana piyaatüin aaʼu süpüla pikirajüin naya. Tü kashikat maatsoʼu, awüriiroʼu jee müsia maayoʼu anasü süpüla pürekutsoolüin aaʼusiliaat pia.
2. Müleka pürekutsooleere aaʼusiliaat waya ¿jamüsü anaka müleka pürekutsoorüle waya maatsoʼu?
2 Aneerü wakuwaʼipa waküjüle pütchi maatsoʼu. Anasü süpüla pürekutsoolüin aaʼusiliaat waya maatsoʼu süka eein süpüla waneeküin 30 jee shiale 50 oora. Müleka nülapalaale chi wawala alapalaakai waaʼu suʼunnaa tü kashikat maatsoʼu, na pürekutsootkana aaʼusiliaat, chainjana sünain süpüshuaʼa tü outkajawaa napülajatkat na pürekutsootkana rekulaat jee na pürekutsootkana pesiaat. Oʼtteena waya sünain waapirüin na wayuukana maatsoʼu 1 süpüla noʼunüin sünain tü outkajawaakat eere sotuin waaʼin ouktüin Jesuu waaʼu, kakalialeejeeria suulia tü juya alatsüinkakat. Aainjüneerü tü outkajawaakat eere sotuin waaʼin ouktüin Jesuu waaʼu maatteoʼu 26 soʼu tü juyakat 2013. Alüʼüjüsü jaʼraisü semaana tü kashikat maatsoʼu. Aneerü maʼin wakuwaʼipa waküjüle pütchi suʼunnaa tü kashikat maatsoʼu.
3. ¿Kasa paaʼinrüinjatka süpüla püküjüin sooʼomüin pütchi nüchiki Maleiwa?
3 Pukumaja sukuwaʼipa. Anasü müleka pukumajüle sukuwaʼipa tü kaʼi pujuʼitüinjatkat oʼu süpüla pürekutsoolüin pia. Kaaliinjachi pia napüla na püpüshikana sünain tia, müsüjeseʼe anain müleka jaashajaajiraale shia suʼunnaa tü ai juʼwaajakalü oʼu Maleiwa jee müsia na püpüshikana naküjüinjatü tü nasaʼwateekat. (Prov. 15:22.) Nnojo mojuin paaʼin müleka nnojoleerüle puuntüin pürekutsoolüin aaʼusiliaat pia. Eeshi süpüla püküjüin sooʼomüin pütchi süchikijee tü aküjaakat pütchi, aneerü müleka pujuʼitüle wanee kaʼi sooʼomüin sünain aküjaa pütchi soʼu tü semaanakat.
4. ¿Kasa anasü weʼreetka müleka wakooʼomüinjüle waʼyataain nümüin Jeʼwaa soʼu tü kashikat maatsoʼu, awüriiroʼu jee maayoʼu?
4 Talatashaateena waya müleka waʼyataale nümüin Maleiwa jee waküjüle pütchi nüchiki Maleiwa namüin na wayuukana suʼunnaa tü kashikat maatsoʼu, awüriiroʼu jee maayoʼu (Juan 4:34; Aluw. 20:35). Talataleejeetpajaʼa naaʼin Jeʼwaa müleka niʼrüle waya sünain wachajaain maʼin sukuwaʼipa süpüla waʼyataain nümüin.