Talateerü maʼin waaʼin maatsoʼu otta aaʼuriiroʼu
1. ¿Kasa paaʼinrajatka süpüla talatüin maʼin paaʼin maatsoʼu otta aaʼuriiroʼu?
1 ¿Kasa paaʼinrajatka süpüla talatüin maʼin paaʼin maatsoʼu, aaʼuriiroʼu otta maayoʼu? Kooʼomüinjatü maʼin putuma piʼyataain sünain aküjaa pütchi otta pürekutsoolinjachi aaʼusiliaat pia. ¿Jamüsü talateetka maʼin paaʼin sutuma tia?
2. ¿Jamüsü talateetka waaʼin waküjüle maʼin pütchi?
2 Talateechi maʼin pia. Talatüsü maʼin waaʼin waʼyataale nümüin Jeʼwaa otta waʼwaajüle nia. Tia, niʼitaatüjülia shia suluʼu waaʼin (Mat. 5:3). Jee müsia talatüsü waaʼin wamaa sümaa wakaaliinjüin wayuu (Aluw. 20:35). Wamaa sümaa waküjüin tü pütchikat, waʼwaajüin Maleiwa otta wakaaliinjüin na wayuukana. Waküjüle maʼin pütchi, atüjeena waya ekirajaa otta yalayaleerü waaʼin sünain aashajawaa sümaa wayuu. Weʼraajireerü maʼin tü nünüliakat Maleiwa otta wekirajeerü wainma wayuu sünain tü Wiwüliakat. Müsüjeseʼe talateerüin maʼin waaʼin sünain aküjaa pütchi.
3. ¿Jamüsü anaka maʼin maatsoʼu otta aaʼuriiroʼu süpüla pürekutsooliin waya?
3 Anasü maʼin süpüla pürekutsooliin aaʼusiliaat waya maatsoʼu otta aaʼuriiroʼu. Süka jamüin, eein süpüla waneeküin 30 jee 50 oora sünain aküjaa pütchi. Talataleejeeria maʼin waaʼin sünain eitajaa tü karaloukta wounejaainjatkalü aka wayuu sünain tü outkajawaakat eere Sotuin Waaʼin ouktüin Jesuu waaʼu. Oʼtteena waya sünain eitajaa tia karalouktakat maatsoʼu 22 sünainmüin aaʼuriiroʼu 14. Aʼyataajeena maʼin na wawalayuukana napüshuaʼa sünain eitajaa tia karalouktakat sümüin tü wayuukalüirua (Sof. 3:9).
4. ¿Kasa paaʼinrajatka pürekutsooleere pia?
4 Yapa pia süpüla. Püchajaa maʼin sukuwaʼipa süpüla kooʼomüin putuma piʼyataain sünain aküjaa pütchi soʼu wanee kashi jee soʼu kojuya kashi. Puchunta kaaliinwaa nümüin Jeʼwaa (Sant. 1:5). Püküja namüin na püpüshikana jee namüin na wawalayuukana keeʼireere paaʼin pürekutsoolin pia (Prov. 15:22). Jaʼitaichi ayuulin pia jee siraale kaʼi putuma sünain aʼyatawaa, talateerü maʼin paaʼin pürekutsoorüle aaʼusiliaat pia.
5. ¿Kaseerü weʼraka kooʼomüinre watuma waʼyataain sünain aküjaa pütchi maatsoʼu otta aaʼuriiroʼu?
5 Keeʼireesü maʼin naaʼin Jeʼwaa talatüinjatüin naaʼin na aʼyataakana nümüin (Sal. 32:11). Kooʼomüinre watuma waʼyataain sünain aküjaa pütchi soʼutpünaa sükalia tü outkajawaakat eere Sotuin Waaʼin ouktüin Jesuu, talateerü maʼin waaʼin otta talateechi maʼin Jeʼwaa watuma (Prov. 23:24; 27:11).