Wouyanta wachikuaʼa eemüin na achekakana tü pütchikat
1. ¿Jamüshii wouyantüinjanaka wachikuaʼa eemüin na waküjakana amüin pütchi?
1 Wapünajüle wanee waüyee choʼujaasü woʼyotuin wüin saaʼu süpüla süsotüin. Waainjüinjatü tia naka na wayuukana waküjapa pütchi (1 Cor. 3:6). Müshiijeseʼe wouyantüinjanain wachikuaʼa süpüla waküjüin sooʼomüin pütchi namüin sükajee tü nünüikikat Maleiwa. Waainjüle tia, kooʼomüinjeerü nanoula.
2. ¿Kasa waaʼinrajatka süpüla eein tü waashajaainjatkat achiki wanee wakueena?
2 Püsakira pümaʼichiki. Yapapa putuma tü pünüikinjatkat, jülüja paaʼin wanee asakiraa kamalainjeetka namüin na wayuukana süpüla püsouktüin shia wanee pukueena. Püküja shia keraainjatpa pünüiki otta püküja joujeechin püleʼejüin süpüla püsouktüin shia. Eeshii na anakana amüin nasakirüin sükajee karalouktaka Kasa shikirajaka süka noʼtteenain sünain ekirajaa sutuma.
3. ¿Kasa eeka süpüla washajüin nachiki na wayuu kamalainkana amüin tü pütchikat?
3 Karalouktaluʼu putuma. Püshaja soʼu tü palajatkat pukua nanülia na wayuukana otta jalain kepiain naya, tü kaʼi otta tü oora chajatkat oʼu pia, tü paashajaakat achiki otta sünülia tü paapakat namüin müleka paainjüle tia. Anasü püshajüle noʼunüle suluʼu wanee iküleesia, kapüshire naya otta natüjaweere saaʼu wanee kasa. Yapeechi pia sutuma tia süpüla puuyantüin püchikuaʼa. Püshajüinjatü tü kaʼi puuyantüinjatkat oʼu otta tü püsakirakat anain pümaʼichiki.
4. ¿Jamüshii keʼepüliinjanaka waya müleka kooʼomüinweere nanoula na wayuukana?
4 Keʼepülinjachi pia. Nüchajaweerü akuwaʼipa Satanaa süpüla ‹nüsütüin suulia wayuu› tü pütchi waküjakat (Mar. 4:14, 15). Müsüjeseʼe keʼepülinjachin pia nnojoliire püpüla na wayuukana. Püshaja wanee karaloukta namüin. Oʼttüsü wanee pürekutsoot sünain ekirajaa wanee wayuu soʼuluʼu shipia, mapa nnojoluwaisü süpüla makalaka süshajüin wanee karaloukta sümüin. Shiʼrapa shia tü wawalakat, süküjüin tü wayuukot anain maʼin tia saaʼinrakat. Wouyantüle wachikuaʼa eemüin na wayuukana, weʼreerü kooʼomüin tü nanoulakat ‹maʼaka tü pünajüt eekai sujuittirüin apünüin shikii süchon sünainjee waneesia, eekai sujuittirüin aippirua shikii jee eekai sujuittirüin poloo shikii› (Mar. 4:20).