¿Joujainjana wouyantaka eemüin na ekirajaweekana?
1. ¿Kasa sünainpünaaka ekirajaa wayuu?
1 Ekirajaa wayuu sünainpünaasü wouyantüin wachikuaʼa eemüin na wayuu jaʼyakana aaʼu nekirajaweein süchiki nuluwataaya Jeowa (Mat. 28:19, 20). Tü kaʼi anakat süpüla wouyantüin wachikuaʼa sünainjeesü tü wakaliakat otta nükalia chi wayuukai, akatsaʼa nnojoluinjana kamaʼain waya süpüla wouyantüin wachikuaʼa. ¿Jamüsü?
2, 3. ¿Jamüshii wouyantüinjanaka maalü eemüin na wayuukana?
2 ¿Jamüshii wouyantüinjanaka maalü? Aküjünüsü maaʼulu sainküin mma ‹süchiki nuluwataaya Maleiwa› otta alüʼütsü süpüla sajaʼlajaain tü kasakalüirua (Mat. 24:14; 1 Ped. 4:7). Akatsaʼa, ayatüsia eein ‹tü kaʼi oʼtteʼennüinjatkat oʼu› na ekirajaweekana sünain tü Wiwüliakat. Makalaka, choʼujaain maʼin ‹süküjünüin tü nünüikikat Maleiwa› tia sünainpünaasü wouyantüin maalü süpüla ayatüin nekirajaweein na wayuu waküjakana amüin pütchi (2 Cor. 6:1, 2; 2 Tim. 4:2).
3 Nnojoishi kamaʼain Satanás süpüla nümalajeʼerüin suluʼujee naaʼin na wayuukana tü pütchi waküjakat namüin süchiki Nuluwataaya Maleiwa (Mar. 4:14, 15). Eeshii na wayuu ekirajaweekana sünain tü Wiwüliakat akatsaʼa, amalajaasü tia sutuma meʼerapalain naya natuma na napüshikana, na naʼyataakana amaa otta waneeinnua wayuu. Wouyantüle maalü eemüin na wayuukana, mapüleejeerü wamüin aashajawaa süchiki tü waashajaakat achiki soʼu tü palajatkat wakua süka ayatüin jülüjüin naaʼin shia.
4. ¿Kasa waaʼinrajatka soʼu tü palajatkat wakua süpüla wouyantüin wachikuaʼa?
4 Waneeka tü kaʼikat otta tü oorakat. Tü anakat maʼin süpüla waainjüin soʼu tü palajatkat wakua shia waneeküin tü kaʼi otta oora wouyantüinjatkat oʼu otta waainja wanee asakiraa süpüla wasouktüin shia wouyantapa. Eere kaʼi püpüla eesü süpüla püküjüin nümüin chi wayuukai ayateein paashajaweein nümaa waneemüin kaʼi jee shiale süchikijee kaʼikat tia. Paashajaale nümaa saawanoʼu jee shiale rimiinkoʼu süka niʼyataain soʼu tü wanee kaʼikalüirua eesü nücheküle puuyantüin soʼu tü wanee semaanakat. Waküjüle wouyatüinjanain wachikuaʼa, wekeraaja tü wamakat. Süpüla wainküin tia, choʼujaasü anainjatüin süshajia nanülia otta eere nepia (Mat. 5:37).
5. ¿Jamüsü wekeraajaka tü ekirajaakat wayuu wouyantüle maalü eemüin na waküjakana amüin pütchi?
5 Wainma tü kasa wouyantüinjatkat atuma maalü eemüin na wayuu ekirajaweekana sünain tü Wiwüliakat. «Palitchon tü kaʼi apütaakat», makalaka weʼitaainjatüin wanee kaʼi otta wanee oora wouyantüinjatkat oʼu maalü (1 Cor. 7:29, NM). Wouyantüle maalü eemüin na wayuu ekirajaweekana süchiki Nuluwataaya Maleiwa, eesü süpüla nanoujüin nünain Maleiwa.