Apünüinsü kasa aneetka atuma wekirajia
1. ¿Jamüsü wanoukteʼerüinjatka sukuwaʼipa wekirajia?
1 Eʼikülii napüshuaʼa na aküjüliikana pütchi. Waküjüle pütchi, wouyantüle wachikuaʼa jee shiale sünain weʼiküin wayuu shia waküjaka achiki tü kasa nanainpünaakat. Weʼikapa naya sünain «tü karaloukta nüchikimaajatkat Maleiwa,» ‹kekiishii sutuma süpüla oʼtteʼennaa› (2 Tim. 3:15). ¡Anasü maʼin tia! Müsüjeseʼe anain maʼin ayatüle wanoʼukteʼerüin sukuwaʼipa wekirajia. Wekirajaa sünain apünüinsü kasa waaʼinrajatka süpüla tia.
2. ¿Kasa waaʼinrajatka süpüla mapüleein wekirajia?
2 Mapüleeinjatü wekirajia. Waashajaale süchiki wanee kasa watüjaka apüleerua, eesü motule waaʼin shiiwaʼalüinya naapa achiki na wayuukana otta kapüleein shia namüin. Weʼikapa wanee wayuu, nnojotsü wainmainjatüin tü pütchi wekirajakat anain shia. Waküja neʼe tü saashajaakalü maʼin achiki tü wekirajakat anain. Nnojotsü wainmainjatüin nünüiki wanee wayuu süpüla nütüjüin maʼin ekirajaa (Pro. 10:19). Nnojotsü waashajeʼerüinjatüin süpüshuaʼa tü wersiikulo ashajünakat, kettaajeerü neʼe süka tü sünainpünaakat tü ekirajaayakat. Waashajeʼerapa shia, shiainjatü waaʼinmaaka tü pütchi sünainpünaakat tü ekirajaayakat. Mayaainjeʼe nikirajüin Jesuu sünain kasa kapüleesü suluʼu Mateo kapiitulo 5-7, soto waaʼin mapüleein shia nutuma otta motsoʼoin nümaʼa.
3. ¿Jamüsü anaka kayaawasere wekirajia? ¿Jara anaka maʼin?
3 Kayaawaseinjatü wekirajia. Kayaawasere wekirajia, antajaasü wanee kasa suluʼumüin naaʼin wanee wayuu otta sotojoosü naaʼin wanee kasa. Nnojoishii kekiinjanain maʼin waya süpüla wekirajüin süka sukuwaʼipa tü kasa eʼraajünakat sainküin mma. Motsoʼopuʼu sümaʼa nutuma Jesuu jee mapüleepuʼusü (Mat. 7:3-5; 18:2-4). Wanee kasa eeka süpüla waainjüin shia wepintajüin shiyaakua wanee kasa. Wachajaale sukuwaʼipa palajana, watüjaajeerü aaʼu tü waainjüinjatkat.
4. ¿Kaseerü anaka atuma wasakiria?
4 Anainjatü wasakiria. Wasakirüle na wekirajüinkana eesü süpüla suwataain nekiiruʼumüin tü waashajaakat achiki. Waʼatapajüinjatüjeseʼe tü namakat. Wasouktamaatüle, nnojoleerü watüjaain aaʼu nayaawatüle tü wasakirakat anain naya. Noʼtchejaale sümaa tü wasakirakat anain naya, «nnojotsü shiain tia» nnojoishii mamaatüinjanain waya. Shia anaka aluʼu ayatüle wasakirüin naya (Mat. 17:24-27). Shiimain nnojolin eein wanee eʼiküi matüjüinkai oʼtchejawaa. Müsüjeseʼe jülüjüinjatüin waaʼin waneepia tü wekirajiakat saashin tü Wiwüliakat süpüla anain wakuwaʼipa otta nakuwaʼipa na wekirajüinkana (1 Tim. 4:16, NM).