Tü kasa anasü eekat sünainjee waapirüin wayuu
Waapirüinjana na wayuukana süchiki tü outkajawaa miyoʼu apünüinkat kaʼi, waaʼinrüinjatü tia apünüin semaana süpülapünaa suʼttüin tü outkajawaakat. Wainma kasa anasü weʼreetka waʼyataale maʼin sünain tia. Na wayuu oʼunakana sünain tü outkajawaakat miyoʼu soʼu tü juya alatüitpakalüirua, kamalainsü namüin tü pütchi aküjünakat sünain, ponusü naaʼin neʼrapa nnojoluin walakaain na wawalayuukana sünain tü naʼyataainkat, anain nakuwaʼipa otta paaʼinwain na wayuu antakana sünain tü outkajawaakat (Sal. 110:3; 133:1; Is. 65:13, 14). Eesü kasa anasü sünainjee waapirüin na wayuukana sünain tü outkajawaa miyoʼu apünüinkat kaʼi, jaʼitairü wattain nepia.
Suluwataain wanee wayuu wanee karaloukta Weteetmüin süchikijee tü outkajawaa miyoʼu aainjünakat soʼu 2011, tia wayuukot ounjulaawaʼaisü shia noulia na aküjüliikana pütchi, süntaka sünain wanee karaloukta apütünüsü süpüla shipialuʼu. Müsü tü pütchi süshajakat sünain tü karaloukta suluwataakat: «Anashaatasü tepia, anasü nukuwaʼipa chi taʼwayuusekai tamaa, anashaatayaasü takuwaʼipa taaʼinruʼu. Nnojottaapasaʼa müin shia, ayatüsia müin choʼujaakai saaʼin wanee kasa süpüla talataleein taya. Müsüjeseʼe suʼuneejaʼalaa sümüin tü taaʼinkat saawanoʼu sünain tü outkajawaakat miyoʼu, mayaainjeʼe toʼunajatüin maʼaka 320 kiloometüro sünain». Talatashaatasü maʼin saaʼin tia wayuukot sutuma chain shia sünain tü outkajawaakat miyoʼu, suunejüinjeseʼe chi suʼwayuusekai süpüla süküjüin nümüin nnojoleerüin süleʼejüin soʼu aikat tia, süka saapajeein tü pütchi aküjünajatkat rimiinkoʼu. Müsü shia: «Isasü maʼin taaʼin süchiirua sajaʼttamaatüin tü outkajawaakat, taapajüin süpüshuaʼa tü pütchi aküjünakat sünain otta wainma na aküjüliikana pütchi nüchiki Jeʼwaa teʼraajakana sünain». Ekirajaasü shia sünain tü Wiwüliakat süleʼejapa sünainjee tü outkajawaakat miyoʼu, pienchi kashi süchikijee, aküjütsü pütchi nüchiki Jeʼwaa. «¡Akalajasaʼa süpütünüin tapüla tü karaloukta aapinnakat aka na wayuukana! Talataleesia maʼin taaʼin maaʼulu yaa suulia sümaiwa paala.» Müsü sünüiki tü wayuukot.
Oʼuneena sünain tü outkajawaakat miyoʼu na wayuu aapinnakana sünain. Müsüjeseʼe choʼujaain maʼin waapirüinjanain na wayuukana. Süpütaale püpüla tü karaloukta paapirüinjatkat aka wayuu, pülüʼüja shia sünain tü outkajawaakat miyoʼu süpüla püküjüin pütchi süka suluʼu tü mmakat eere saainjünüinjatüin tü outkajawaakat.
[Pütchi süttaka suluʼu süpana 4]
Müinjatü pünüiki paapirapa na wayuukana
Motsoʼoinjatü wamaʼa süpüla waapirüin wayuu süpüshuaʼa. Eesü süpüla müin wanüiki: «Jamayaa. Aapinnüshii na wayuukana sainküinpünaa mmaka süpüshuaʼa sükajee karalouktakat tüü. Anuu tü pümüinjatkat. Puusüteerü anain sooʼomüin pütchi suluʼu türa karalouktakat». Talata paaʼin sünain tü eitajaakat. Piitaja rimiinkoʼu jee saawanoʼu tü rewiisütakalüirua müleka anashiire shia.