Puunejaa na wayuukana

1. ¿Joujeena woʼttaka sünain aapiraa na wayuukana süpüla narütkaainjanain sünain tü outkajawaakat?

¹ Müleka eeinjatüle putuma wanee ekawaa napüla na püpüshikana otta na paʼaleewainyuukana, puunejaain naya sümaa talatüin paaʼin. Süka jamüin, wainmain piʼyataain sünain otta wainmain tü nneerü pükataajakat sünain tü eküütkat. Müsia sukuwaʼipa tü aainjünakat sünain tü outkajawaakat miyoʼu, wainma aʼyatawaa otta wainma nneerü akataajünaka sünain. Maʼaka apünüin semaana süpülapünaa tü outkajawaakat, naapeerü wamüin Jeʼwaa wanee aʼyatawaa: waapirüinjana na wayuukana süpüla narütkaainjanain sünain tia outkajawaakat. ¿Kasa akaaliinjeenaka waya süpüla waainjain tia sümaa talatüin waaʼin?

2. ¿Jamüshii waʼyataainjanaka sünain aapiraa na wayuukana?

² Aʼyataajeena maʼin waya sünain aapiraa na wayuukana müleka kojutüle maʼin wamüin süpüshuaʼa tü kasa naapakat wamüin Jeʼwaa waneʼewai wakua sünain tü outkajawaakat miyoʼu (Is. 65:13, 14). Jülüjainjatü waaʼin eein na wayuu oʼunakana sünain sutuma waapirüin naya (paashajeʼera tü pütchi «Oʼuneerü wayuu sunain»). Nnaʼaya na wayuu oʼuneenakana, nnaʼaya na nnojoleenaka oʼunüin. Shia jülüjüinjatka waaʼin nuʼwaajüneechin Jeʼwaa süka shiʼreerüin wainma wayuu anamiain nia (Sal. 145:3, 7; Alat. Map. 22:17).

3. ¿Jamüinjatü sukuwaʼipa shiitajia tü karalouktakat?

³ Naküjeerü na laülaashiikana tü sukuwaʼipainjatkat shiitajia tü karalouktakat. Nayeena aküjaka müleka süpütünüinjatüle tü karalouktakat suluʼu piichi eeka yüütüülin jee shiitajünüinjatüle eere jouluin maʼin wayuu. Aküjüneerü aka pütchi tü rewiisütakalüirua sümaʼaleʼeya tü karaloukta waapirakalü aka na wayuukana müleka anashiire shia. Talateerü maʼin waaʼin süchikijee waapirüin na wayuukana. Süka jamüin, wounejaain wainma wayuu süpüla narütkaainjanain sünain tü outkajawaa nukumajakalü akuwaʼipa Jeʼwaa.

Oʼuneerü wayuu sünain

Eesü wanee wawala aapiraka juyawai na wayuukana sünain tü outkajawaakat, «amüla neʼe taapirüin wayuu sünain», maa müsü saaʼin. Soʼu wanee kaʼi, soʼu chajatüin shia sünain tü outkajawaakat miyoʼu, eejachi wanee wayuu eiwaʼaikai arütkaain sünain tü outkajawaakat, nia wanee wayuu anoujakai namaa na Sij münakana. Süsaküin tü wawalakat chi wayuukai süka nüikkalaain peje sünain, naashin wayuukai chia, aapinnüshi nia süchiki tü outkajawaakat miyoʼu, makaʼa nürütkaain sünain. Anasü maʼin nümüin tü outkajawaakat, ponusü maʼin naaʼin anain maʼin naʼanaaya na wawalayuukana otta anain maʼin tü nakuwaʼipakat. Watta saalii kasa nüsakiraka anain chia wayuukai, shiasaʼa tü wawalakat asouktüsü shia nümüin. Eejachi wanee wayuu sümaa nuʼwayuuse aikkalaakana saʼatoʼu tü wawalakat. Aashajaasü maʼin tü wawalakat namaa, naküjüin sümüin nounejaanüin sünain tü outkajawaakat, nantaka wuusüluʼu. Kamalainsü namüin tü pütchikalüirua, «anteena waya rimiinkoʼu», namaka. Soʼujeʼereʼeya kaʼika tia, shiʼrüin tü wawalakat anain maʼin aʼyatawaa sünain aapiraa wayuu sünain tü outkajawaakat miyoʼu.
Müsia sukuwaʼipa wanee kasa alataka jekenainka. Sünain wanee outkajawaa miyoʼu, asakünüshi wanee wayuu ataralaaichi sümaa tü nuʼwayuusekat. Na asakakana naya nia wanee wawala pürekutsootkai sümaa tü nuʼwayuusekat. Naashajaanapa ama, naküjüin eiwaʼalüin neʼrüin wanee outkajawaa makalü aka saaʼin tia. Nasakitka naya na wawalayuukana sünain jaraliin aküjaka namüin süchiki tü outkajawaakat, «soʼu wanee kaʼi wantaka oʼu wepialuʼu, weʼrüin wanee karaloukta ojutuushi suupünaa soʼu tü piichikat, shia wanee karaloukta aküjaka süchiki tü outkajawaakat miyoʼu. Waleejüin shia sümaa wepirajüin tü pütchi ashajünakat süsapoʼujee», namaka. Shiasaʼa nantapa sünain tü outkajawaakat, kamaneeshii maʼin na wawalayuukana namüin otta nekiraaka neküin na wawalayuukana namaa. Kamalainsü maʼin namüin tü outkajawaakat, aleʼeja müshiʼiya naya waneemüin kaʼikat. Maaʼulu yaa, achajaana akuwaʼipat süpüla nakaaliinjünüin naya wayuukana otta nekirajünüin sünain tü Wiwüliakat.