Weitajeerü awüriiroʼulüjee 2
1. ¿Joujeerü weitajüin tü ounejaayakat soʼu juyakat tüü? ¿Kasa eeka sutuma waainjüin tia juyawai?
1 Soʼujee awüriiroʼu 2 sünainmüin 17 waapireerü wayuu eere waküjüin pütchi süpüla Sotuin Naaʼin ouktüin Kürisüto, outkajawaakat tia aainjünüsü juyawai. Alatüirü kojuya juya sünain wainmain na wayuu outkajaakana wamaa juyawai. Eesüinka wanee wayuu ounejaka Weteetmüin soʼuleʼeya tü kaʼi eeinjatkat oʼu tia outkajawaakat otta sümaka: «Eiwaʼalia taya antaa miichipaʼamüin, tantaka sünain wanee karaloukta ounejaaya yaa soʼuluʼu. Oʼuneesü taya akatsaʼa nnojotsü tatüjaain aaʼu jalapüshinjatüin shia». Chi asouktakai sümüin suluʼu teleepono nüküjüin jaleerüin suusütüin anain tü oorakat sünain tü ounejaayakat, sümaka tü wayuukot: «¡Oʼuneerüjaʼa taya sünain tia outkajawaakat!».
2. ¿Jamüinjatü wanüiki weitajapa tü ounejaayakat?
2 ¿Jamüinjatü sukuwaʼipa? Süka paliʼirüin tü kaʼi weitajüinjatkat oʼu tü ounejaayakat anakajaʼa motsoʼowaire wamaa. Maa pünüiki: «¿Jamayaa pia? Tounejaweein pia sümaa püpüshi süka karalouktakat tüü sünain wanee outkajawaa kojutüsü maʼin aainjünawaika juyawai sainküinpünaa tü mmakat, eejeerü tia awüriiroʼu 17 [Paapa tü ounejaayakat]. Tia shia tü kaʼi ouktakat oʼu Jesuu otta aküjüneerü chayaa kasain waainjüinjatüin süpüla anain wakuwaʼipa sutuma naakajirüin waya Kürisüto. Machuntujusat nneerü sünain. Sünain tü karalouktakat aküjünüsü jalainjatüin otta jalapüshinjatüin shia».
3. ¿Kaseerü waainjaka süpüla waapirüin maʼin wainma wayuu?
3 Wainmale maʼin na wayuu waküjakana amüin pütchi, eesü süpüla nachuntüin na laülaashiikana süpütünüin wanee ounejaaya suluʼu tü piichi yüütüükat. Paapira na puuyantakana anainmüin, na püpüshikana, na aʼyataajiraakana pümaa, na koleejiakana pümaa otta na piʼraajakana. Saawanoʼu otta rimiinkoʼu eesü süpüla paapüin tü rewiisütakat sümaʼayaleʼeya tü ounejaayakat müleka anale shia. ¿Eeshiche süpüla pürekutsoolüin aaʼusiliaat pia suʼunnaa sükalia eitajaa tü ounejaayakat?
4. ¿Jamüsü keeʼireeka waaʼin noutkajaain wanaa wamaa na wayuukana?
4 ¡Wainmeerü kasa natüjaaka aaʼu na outkajaweenakana! Naapeerü achiki alin maʼin waya nüpüla Jeowa sükajee naakajirüin waya (Juan 3:16). Natüjaajeerü aaʼu kasain aneerüin aluʼu sukuwaʼipa wayuu sutuma Nuluwataaya Maleiwa (Isa. 65: 21-23). Aküjüneerü namüin eein süpüla nachuntüin namüin na jülüjakana aaʼin na antüshiikana nekirajünüin sünain tü Wiwüliakat süpüla kooʼomüin tü natüjaakat aaʼu. Oʼuraajüshii maʼin waya süpüla noutkajaain wamaa na wayuu atüjeekana nüchiki Jeowa.