Oʼtteena waya sünain aapiraa wayuu maatsoʼu 22

Soʼu juyakat tüü, oʼtteena waya maatsoʼu 22 sünain ounejaa wayuu sünain tü outkajawaakat eere Sotuin Waaʼin ouktüin Jesuu waaʼu. Anashii waʼyataale wapüshuaʼa sünain eitajaa tia karalouktakat. Ayateeria weitajüin tü rewiisütakalüirua müleka anashiire shia. Aaʼuriiroʼu, soʼu tü palajatkat saawanoʼu, shiainjatü weitajaka maʼin tü karalouktakat suulia wachajaain na wayuu ekirajaweekana sünain tü Wiwüliakat. Aluʼujasaʼa waashajaale sümaa wayuu eeka shikirajaweein sünain tü Wiwüliakat. Chi wawala jülüjakai aaʼin tü aküjaakat pütchi, nüküjeerü wamüin müleka anashiire süpüla weitajüin tia karalouktakat eere jouluin wayuu. Eesü süpüla washajüin suluʼu karaloukta nanülia na wayuu wounejaweekana amüin sünain tia outkajawaakat. Maʼaka naaʼin na wapüshikana, na aʼyataajiraakana wamaa, na koleejiajiraakana wamaa otta na wayuu weʼreekana amüin sünain tü outkajawaakat. Keeʼireesü maʼin waaʼin süntajatüin watta saalin wayuu sünain tü outkajawaakat otta sotuin naaʼin wamaa alin maʼin waya nüpüla Jeʼwaa otta Jesuu (Juan 3:​16, NM; 15:13).