Oʼtteena waya sünain aapiraa wayuu maatsoʼu 1
1. ¿Joujainjana waapiraka na wayuukana süpüla tü outkajawaakat eere sotuin waaʼin ouktüin Jesuu? ¿Jamüsü kakalialeejeetka shia suulia tü juya alatsüinkakat?
1 Oʼtteena waya maatsoʼu 1 sünain waapirüin na wayuukana süpüla noʼunüin sünain tü outkajawaakat eere sotuin waaʼin ouktüin Jesuu. Tü outkajawaakat aainjüneerü maatsoʼu 26. Kakalialeejeeria suulia tü juya alatsüinkakat sünain waapirüin na wayuukana süpüla tia outkajawaakat. Müsüjeseʼe kojuyaleeinjanain na wayuu waapirüinjanakana eere waküjüin pütchi yaaʼaleekajaʼa wainmale maʼin naya.
2. ¿Kasa wayuu tü waaʼinrüinjatkat waapüinjatpa tü karalouktakat namüin napüshuaʼa na wayuu kepiakana eere waküjüin pütchi? ¿Jamüinjatü sukuwaʼipa süpüla saapünüin wamüin tü karaloukta waapirüinjatkat aka wayuu?
2 Sukuwaʼipainjatka watuma. Naküjeerü na laülaashiikana jarüleerüin sukuwaʼipaka süpüla waapüinjatüin tü karalouktakat namüin napüshuaʼa na wayuu kepiakana eere waküjüin pütchi jee müleka wapütüinjatüle tü karalouktakat suluʼu wanee miichi eekai yüütüüin. Müleka süpütaale tü karaloukta waapirüinjatkat aka wayuu, anasü müleka weitajüle shia eere kojuyain wayuu. Chi wawala jülüjakai aaʼin tü aküjaakat pütchi niʼitaainjatü tü karaloukta waapirüinjatkat aka wayuu saaʼu tü süpüleekat tü rewiisütakalüirua, ashajünüinjatü sünain tia karalouktakat jalainjatüin aainjünüin tü outkajawaakat eere sotuin waaʼin ouktüin Jesuu waaʼu jee müsia tü oora aainjünüinjatkat oʼu shia. Nnojotsü eʼitaanüinjatüin uatuwoʼushi süpüshuaʼa tü karalouktakalüirua saaʼu tü süpüleekat tü rewiisütakat. Na wawalayuukana nalüʼüjüinjatü neʼe tü karaloukta kettaajeetkat süpüla neitajüin suluʼu wanee semaana.
3. ¿Kasa wayuu sotuinjatka waaʼin waapirüinjanapa na wayuukana sünain tü outkajawaakat eere sotuin waaʼin ouktüin Jesuu?
3 Tü sukuwaʼipainjatkat watuma. Anasü motsoʼole wamaʼa waashajaapa namaa na wayuukana süpüla wainmainjanain na wayuu waapirakana. Suluʼu süpanaka 4 ashajünüsü yala jamüinjatüin sukuwaʼipa wanüiki waashajaainjanapa namaa na wayuukana. Eeshii süpüla kamaʼain waya sünain aashajawaa namaa na wayuukana müleka naashajaweere wamaa jee nasakirüle waya sünain wanee kasa. Suʼunnaa waapirüin na wayuukana, eeshii süpüla waapüin tü rewiisütakalüirua namüin na wayuukana müleka anashiire shia weʼrüin. Soʼu tü kashikat maatsoʼu 2, nnojoishii wachajaainjanain na wayuu ekirajaweekana sünain tü Wiwüliakat, tü waaʼinrüinjatkat shia waapirüinjanain na wayuukana süpüla noʼunüin sünain tü outkajawaakat eere sotuin waaʼin ouktüin Jesuu waaʼu.
4. Waapirüinjanapa na wayuukana, ¿jamüsü waaʼinmaainjatka maʼin tia aʼyatawaakat?
4 Keeʼireesü maʼin waaʼin noʼunüinjanain na wayuukana sünain tü outkajawaakat eere sotuin waaʼin ouktüin Jesuu waaʼu. Nüküjeerü chi wawala ekirajüinjachikai sünain tia outkajawaakat kasapülajachin ouktaka Jesuu waaʼu (1 Cor. 11:26). Watüjaajeerü aaʼu sünain tia outkajawaakat kasain anasü weʼraka sünainjee ouktüin Jesuu waaʼu (Roma 6:23). Aküjüneerü wamüin chaʼayaa choʼujaashaatain maʼin sotuinjachin waaʼin weinshi Jesuu (Juan 17:3). ¡Oʼunüinjana wapüshuaʼa sünain waapirüin na wayuukana sünain tü outkajawaakat eere sotuin waaʼin ouktüin Jesuu!