Wouneja wayuu süpüla Sotuin Waaʼin ouktüin Jesuu
1. ¿Kasa waainjüinjatka sainküin mmaka süpülapünaa tü outkajawaakat eere Sotuin Waaʼin ouktüin Jesuu?
1 «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya.» (Luc. 22:19.) Süka woonooin sümüin tü nuluwataakat anain Jesuu, outkajaweena waya namaa wainma wayuu maatsoʼu 30 soʼu 2010 süpüla sotuin waaʼin ouktüin Kürisüto. Akatsaʼa süpülapünaa tia, weitajeerü waneeirua ounejaaya sainküin mmaka soʼujee maatsoʼu 13 sünainmüin 30.
2. ¿Jamüinjatü wanüiki süpüla wounejaain na wayuukana?
2 ¿Jamüinjatü saainjia? Paapapa tü ounejaayakat nümüin wanee wayuu, jaʼyainjatü tü ayaakuaa sünainkat süpana 1 otta püma nümüin: «Outkajaweena waya maatsoʼu 30 süpüla sotuin waaʼin ouktüin Jesuu, waainjeerü tia aipaʼa. Karalouktakat tüü, süpülajatü tounejaain pia sümaa püpüshi. Eeshi süpüla puʼunüin namaa paʼaleewainyuu, aküjünüsü yaʼayaa jalapüshinjatüin otta jalainjatüin saainjünüin [piiʼiyata jalain shia]». Eere süpüla, paashajeʼera tü pütchi nuluwataakat anain jesuu suluʼu Lucas 22:19. Soto paaʼin palitchoin tü kaʼi weitajüinjatkat oʼu tü karalouktakat, müsüjeseʼe motsomüinjatüin pünüiki.
3. ¿Jaralii na wounejaainjanakana?
3 Wainmale maʼin na wayuu waküjakana amüin pütchi, eesü süpüla nachuntüin na laülaashiikana süpütünüin wanee ounejaaya suluʼu tü piichi yüütüükat. Püküja pütchi süka tü rewiisütakalüirua otta tü ounejaayakat. Puunejaa na wayuu puuyantakana anainmüin, na pikirajakana, na piʼyataajiraakana amaa, na koleejiakana pümaa, na püpüshikana, na kepiakana püʼütpaʼa otta na piʼraajakana.
4. ¿Kaseerü waainjaka kojutüle wamüin tü naainjakat Jeowa wapüleerua?
4 Yapa pia süpüla ounejawaa wayuu. Anasü maʼin süpüla kooʼomüin piʼyataain nümüin Maleiwa wanaapünaa sümaa tü kaʼi ouktakat oʼu Jesuu. Pünoukta sukuwaʼipa tü paainjakat süpüla pürekutsoolüin aaʼusiliaat pia. Eere wanee püchon jee niale wanee pikirajüin aainjakai tü sümakat tü Wiwüliakat, paashajaa namaa na laülaashiikana süpüla nanaʼlüin keraale nia süpüla nüküjüin pütchi sümaa nnojolin woutiisain nia. Kojutüle wamüin tü naainjakat Jeowa wanaa sümaa naapüin chi nüchonkai süpüla ouktüin nia waaʼu, cheena waya sünain tü outkajawaakat süpüla sotuin waaʼin tia otta wounejeerü wainma wayuu (Juan 3:16).