Aküjaa pütchi süpüla sotuin waaʼin tü kaʼi ouktakat oʼu Jesús
1. ¿Kasa waaʼinrajatka wayakana na aküjüliikana pütchi sainküin tü mmakat soʼujee maatsoʼu 21? ¿Jamüsü waaʼinrajatka shia?
1 Wayakana aʼyataaka nümüin Jeowa outkajaainjana apüriit 9 soʼu 2009 sainküin tü mmakat süpüla sotuin waaʼin tü eeʼiyatünakat aka naalii na wayuukana (Rom. 5:6-8). Waʼatapajüin wainmeerüin wayuu choʼujaaka amüin Maleiwa outkajaweetka wamaa soʼu tü kaʼi ouktakat oʼuu Jesús. Süpüla tia, eitajüneerü soʼujee maatsoʼu 21 wanee karaloukta süpüla ounejaa na wayuukana sainküin tü mmakat.
2. ¿Kasa sotuinjatka waaʼin wanaa sümaa weitajüin tü karaloukta ounejaayakat?
2 Soto paaʼin. Piiʼiyata tü ayaakuaakat, tü asakiraakat otta tü pütchi suluʼujeejatkat tü Wiwüliakat suluʼuka tü ounejaayakat. Eesü süpüla piiʼiyatüin tü palajatkat süpana tü ounejaayakat sümaa müin pünüiki: «Tounejaweein pia süpüla sotuin waaʼin tü kaʼi ouktakat oʼu Jesús aainjüneerü jueewoʼu 9 soʼu kashika apüriit». Süchikijee paashajeʼera sünülia tü ounejaayakat otta tü asakiraa wünaapünaakat. Püma namüin na wayuukana eein süpüla nounejüin napüshi otta waneeirua wayuu sünain outkajawaakat tia.
3. ¿Jamüsü süpüla jülüjüin paaʼin na wayuu paapakana amüin tü karaloukta ounejaayakat puʼttaiwaʼaya sünain eitajaa shia?
3 Wainmale maʼin na wayuu waküjüinjanakana amüin pütchi, na laülaashiikana eesü süpüla nachuntuin namüin na aküjüliikana pütchi napütüin wanee karaloukta suluʼu tü piichi yüütüükat napüla. Wojuʼitapa sünain aküjaa pütchi süka tü rewiisütakalüirua eesü süpüla wapütüin tü ounejaayakat sümaa. Puunejaa na pikirajüinkana, na kepiakana püʼütpaʼa, na püpüshikana, na koleejiakana pümaa, na piʼyataajiraakana amaa, na piʼraajakana otta waneeinnua. Soʼu tü juya alatakat eesü wanee wawala ounejaka 30 süpüshi, süsoʼirawalin naaʼin sünain tia outkajawaakat. ¡Talatüsü maʼin shia wanaa sümaa nantüin 25 süpüshi! Otta süchikijee nekirajaaka 4 sünain tü Wiwüliakat.
4. ¿Kasa waaʼinrajatka maaʼulu? ¿Jamüsü waaʼinrajatka shia?
4 Yapa pia maaʼulu. Wainma na aküjüliikana pütchi akooʼomüinjeenaka naʼyataain nümüin Maleiwa soʼu kashika maatsoʼu otta apüriit. Eere wanee püchon jee wanee pikirajüin aainjaka tü sümakat tü Wiwüliakat, eeshi süpüla nujuʼitüin sünain aküjaa pütchi. Yapeeshii waya maaʼulu süpüla ounejaa na wayuukana sünain sotoo aaʼin tü piamasü kasa eeʼiyatünakat aka naalii na wayuukana (Juan 3:16; 15:13).