¿Jara jalouijeetka amüin pütchikat tüü?

1. ¿Kasa jülüjüinjatka waaʼin waashajeʼerapa tü rewiisütakalüirua?

¹ Tü karalouktakat Aapiria wayuu otta ¡Despertad! akumajünüsü shia napüla napüshuaʼa na wayuukana sainküin tü mmakat. Müsüjeseʼe wainmain pütchi saashajaaka achiki tia karalouktakat. Waashajeʼerapa shia, jülüjeesü waaʼin jaralüin jaloulin amüin waneʼewai sukua tü pütchikat otta weʼitaa wapüleerua waküjüinjatüin pütchi süka.

2. ¿Kasa pütchi anasü suluʼujeejatka tü rewiisütakalüirua jalouijeetka namüin na wayuukana?

² Wainma tü pütchi saashajaakat achiki tü karalouktakat Aapiria Wayuu otta ¡Despertad! Maʼaka saaʼin pütchi suluʼujeejatka tü Wiwüliakat, pütchi namüinjatka na wayuukana sümaa napüshi. Eesü saashajaale süchiki wanee mma wattapünaa maʼaka tü aküjünawaikat suluʼu ¡Despertad! Anasü jülüjüle waaʼin jaralüin na wayuu jalouijeenakana amüin tia pütchikalüirua. Waashajaa süchiki tia pütchikat namaa na wayuu waʼyataajiraakana amaa, wapüshi, wayuu eeka suʼunajaainjatüin wattapünaa otta weitajaa eere suikkaalee wayuu jee shiale eere sükaaliinjünüin wayuu natuma na sülaülashiikana mma. Saashajaale tü rewiisütakalüirua süchiki kasa nanainpünaaka na laülaayuukana, wapüta shia eere nakaaliinjünüin na laülaacheinkana, shiale saashajaain achiki jouluin wayuu mojulaasü, wapüta tü rewiisütakalüirua laülaapialuʼu otta napüla na pulusiiakana.

3. Püküja süchiki wanee akuwaʼipa alataka namüin wanee wawalayuu aküjakana pütchi süka tü rewiisüta jalouikat namüin na wayuukana.

³ Kasa anasü eeka sünainjee. Eeshi wanee wawala sümaa nuʼwayuuse kepiaka chaa África, chaa eere naküjüin pütchi, oʼttüshii naya sünain nayamaajüin suluʼu 25 koleejia, aküjüshii pütchi süka tü karalouktakat ¡Despertad! antaka soʼu tü kashikat oʼutuupüroʼu 2011, tü makat anülia «Cómo criar hijos responsables». Sükajee naainjüin tia, eesü maʼaka 22 koleejia aapaaka tia rewiisütakalüirua otta neitajüin shia namüin na koleejiakana. Naainjüinya shia wanee wawalayuu paʼwayuuseewashiikana kepiakana suluʼu tia mmakat, eesia neitajüin rewiisüta suluʼu tü koleejiakat chaa eere naküjüin pütchi. Wanaa sümaa nekirajüin na eʼiküliikana süchiki akuwaʼipa anasü jee sünain aashajeʼeraa karaloukta, naashajeʼerawalin tü rewiisütakalüirua namüin na koleejiakana. Naya wawalayuukana, naküjüin tü naainjakat nümüin chi wawala alapalaakai naaʼu otta chi wawalakai nütütüleʼerüin naaʼin na waneeinnua süpüla naainjüin tü naainjakat na wawalayuukana. Achuntünüsü sooʼomüin tia rewiisütakat sümüin Weteet, makalaka shiʼinprimiijünüin sooʼomüin.

4. ¿Jamüsü weitajaweeka amüin tü rewiisütakat namüin napüshuaʼa na wayuukana?

⁴ Tü rewiisütakalüirua aküjüsü süchiki jamüin sülataka kasa mojusü yaa saaʼu tü mmakat, süküjüin süchiki tü Wiwüliakat otta süchiki tü Nuluwataayakat Maleiwa. Shia neʼe tü rewiisüta aküjakat süchiki suʼttaainjatüin wayuu (Is. 52:⁠7). Keeʼireesü waaʼin naashajeʼerüinjatüin napüshuaʼa na wayuukana tü rewiisütakalüirua. Süpüla waaʼinrüin tia, waashajaa suluʼu waaʼin palajana: «¿Jara jalouijeetka amüin pütchikat tüü?».