Asakinnaka Anain

◼ Süpüla nütüjaanüin aaʼu sünain keraain wanee wayuu süpüla woutiisaa, ¿kasa jaʼyainjatka naaʼu sünain aküjaa pütchi otta sünain tü outkajawaakat?

Woutiisainjachire wanee wayuu, nnojotsü nüneeküinjatüin tia süpaʼa mmaka. Süpülapünaa woutiisain wanee wayuu, nütüjaainjatü aaʼu otta niyaawatüinjatü aaʼu tü nuchuntakat Maleiwa nümüin. Jaʼyainjatü naaʼu keeʼireein naaʼin oonowaa sümaa tü sümakat tü Wiwüliakat.

Achuntünüsü namüin na anoujüshiikana noutkajaainjanain weinshi. Keeʼireere naaʼin wanee wayuu woutiisain nia, naainjüinjatü tia (Heb. 10:24, 25). Niyalerüinjatü najapü sünain tü outkajawaakat. Otta nüshajirüinjatü nünülia süpüla ekirajaa sünain tü Ekirajawaakat süpüla Aküjaa Pütchi, mayaainjeʼe nnojoluin choʼujaain maʼin tia süpüla woutiisain wanee wayuu.

Aluwataanüshii na anoujüshiikana sünain aküjaa pütchi otta ekirajaa wayuu. Keeʼireere naaʼin wanee wayuu woutiisain nia, naainjüinjatü tia weinshi (Mat. 24:14; 28:19, 20). ¿Jeʼrainjachi kashi nüküjülin pütchi wanee wayuu sümaa nnojolin woutiisain nia? Süpüla jaʼyain naaʼu wanee wayuu keeʼireein naaʼin aküjaa pütchi kashiwai, alatüinjatü maʼaka jeʼra kashi (Sal. 78:37). Nnojotpejeʼe choʼujaain maʼin sülatüinjatüin wainma kashi. ¿Jeʼrainjatü oora nülatiraka kashiwai? Nnojotsü eein wanee pütchi aküjaka wamüin jeʼrainjatüin oora nülatiraka. Shia jülüjüinjatka naaʼin na laülaashiikana nukuwaʼipa chi aküjüi pütchi woutiiseekai (Luc. 21:1-4).

Noutkajaapa na laülaashiikana nümaa wanee wayuu woutiiseekai, jülüjüinjatü naaʼin naatawalin nukuwaʼipa wanee wayuu otta nayaawatüinjatü aaʼu keraale nia süpüla woutiisaa. Aire neeʼiree na laülaashiikana eeshii süpüla nayain outkajaain na aʼyataakana neʼipajee. Jaʼyainjatü naaʼu chi woutisainjachikai keeʼireein naaʼin nüküjülinjachin pütchi nüchiki Jeʼwaa, kojutüin nümüin tü outkajawaakat otta tü aküjaakat pütchi. Nnojotsü naʼatapüin na laülaashiikana müinjachin nia maʼaka naaʼin na kakaliainnakana woutiisain. Nnojoire keraain wanee wayuu süpüla woutiisaa, naküjüinjatü na laülaashiikana süka anakalü akuwaʼipa jamüin nnojoika süpüla woutiisain nia. Nachajaainjatü akuwaʼipa na laülaashiikana süpüla nükaaliinjünüin süpüla woutiisain nia mapa.