Washata nakuwaʼipa na nünüikimaajanakana Maleiwa: Amós
1. ¿Jamüsü sükatchinraaka waaʼin sutuma nukuwaʼipa Amós?
1 «Wayuu mojushi taya otta matüjüinsai taya karaloukta süpüla taküjüinjachin pütchi», eesü maa müle pünüiki püleʼeruʼu. Mülejeʼeya pukuwaʼipa, akatchinraajeerü paaʼin sutuma nukuwaʼipa Amós. Arüleejüi anneerü wayuukai chia otta aʼyataʼawaishi nia sünain akotchojaa süchon pünajüt. Aneekünüshi Amós nutuma Maleiwa süpüla nüküjüinjatüin süchiki tü naaʼinrajatkat sümüin tü nupueulosekat (Amós 1:1; 7:14, 15). Akaʼaya maaʼutpünaa, nnojoishii nüneeküin Jeʼwaa na wayuu atüjakana maʼin (1 Cor. 1:27-29). ¿Kasa amaa shikirajaka anain waya nukuwaʼipa Amós?
2. ¿Jamüshii ayateenakaʼaya waya sünain aküjaa pütchi maʼaka naaʼin Amós?
2 Nüchecherüin naaʼin suʼunnaa müliaa. Wanaa sümaa nüküjüin Amós tü naaʼinrajatkat Maleiwa sümüin tü polookot eʼirukuu, achiajaanüshi nia nutuma Amasías chi sacerdootekai naaʼu na aʼwaajakana shiyaakua paaʼa. «Nnojo pikeʼejüin saaʼin tü wayuukalüirua. Wayuu anoujüshii waya», majaashi nümüin Amós (Amós 7:12, 13). Otta süpüla nüpülajüinjatüin Amasías nuulia Amós tü naaʼinrakat, nnojotsü lotuin nünüiki nümüin chi aluwataaikai Jeroboán süchiki tü nümakat paala Amós nümüin (Amós 7:7-11). Akaisaʼa Amós nnojoishi eimmolojooin nia. Akaʼaya maaʼulu, wainma na shikiipüʼükana tü iküleesiakalüirua mojuka anüiki wachiki namüin na sülaülashiikana mma süpüla müliainjanain waya natuma. Jaʼitairü jamatataalain wakuwaʼipa natuma, ayateenaʼaya wakanajüin naya süka eein Jeʼwaa wamaa (Is. 54:17).
3. ¿Kasa waküjaka maʼin achiki maaʼulu sümüin tü wayuukalüirua?
3 Nüküjüin tü naaʼinrajatkat Maleiwa. Mayaapejeʼe nüküjüin Amós sajaʼttinnüinjatüin tü poloosükat eʼirukuu chaka Israel, naashajaa achikit niiteʼereenain naya Jeʼwaa nachikuaʼa (Amós 9:13-15). Müshiʼiya wayakana, shia maʼin waküja achiki tü naaʼinrajatkat Maleiwa nayaaluʼu na wayuukana sükajee tü Nuluwataayakat (2 Ped. 3:7; Mat. 24:14). Najaʼlajeʼerapa Jeʼwaa na wayuu mojulaashiikana soʼu Armagedón, paʼaraiiseerü nutuma tü Mmakat (Sal. 37:34).
4. ¿Jamüsü watüjaaka saaʼu wekettaajeerüin tü keeʼireekat naaʼin Maleiwa?
4 Ayatüle waküjüin pütchi suʼunnaa tü kasa mojusü alatakat wamüin, weeʼiyatüin shiimain waapüin waaʼin nümüin Maleiwa otta waainjeein tü nüchekakat wapüleerua (Juan 15:19). Ayateenapajaʼa nükaaliinjüin waya Jeʼwaa süpüla wekettaajüin tü keeʼireekat naaʼin maʼaka nükaaliinjüin Amós (2 Cor. 3:5).