Asakinnaka Anain
◼ ¿Kasa nekirajaainjatka anain na tepichikana süpüla laülaain naaʼin sünain anoujaa?
Nunoujüle wanee wayuu, nüchajaain sukuwaʼipa süpüla nikirajüin na nüchonniikana sünain tü nuluwataakalü anain Jeʼwaa (Éf. 6:4). Naashajeʼerawalin watta maalü tü pütchi aashajeʼennajatkat weinshi. Eeshii na wawalayuu anajakana video soʼu tü ai naʼwaajakalü oʼu Maleiwa otta eeshii na ekirajaakana sünain tü karalouktakat Los jóvenes preguntan, nalaʼaya na ashatakana tü sümakat wanee aküjalaa suluʼukat tü Wiwüliakat. Süpüla laülaainjatüin naaʼin wanee jintüi sünain anoujaa, ekirajünüinjachi nia sünain tü kasa kapüleesü shikirajakalü anain tü Wiwüliakat (Heb. 6:1).
Wekirajüle wanee wayuu sünain tü Wiwüliakat, wekirajüin naya süka tü karalouktakat ¿Kasa shikirajaka maʼin tü Wiwüliakat? Kettaapa natuma tia karalouktakat, wekirajüin joo naya süka tü karalouktakat «Ayata alin jüpüla Maleiwa». ¿Pütüjaa aaʼu jamüin saainjünüinjatka tia? Sükajee tü karalouktakat Kasa shikirajaka, natüjaa aaʼu tü kasa mapüleesat shikirajakalü anain tü Wiwüliakat. Sükajee tü karalouktakat «Ayata alin jüpüla Maleiwa», natüjaa aaʼu tü naaʼinrajatkat süpüla pansaainjatüin nakuwaʼipa sümaa tü pütchi suluʼukat tü Wiwüliakat. Sükajee tia piamasükat karaloukta ichesü nunoula wanee wayuu nünain Kürisüto otta katsüinsü naaʼin waneepia sünain tü ekirajünakalü anain naya (Col. 2:6, 7). Pikirajaainjatü anain tia piamasükat karaloukta namaa na püchonniikana. Natüjaainjatü jamüin waakajinnaka nutuma Maleiwa, kasain wayuu tü Nuluwataayakat Maleiwa otta kasain alatüin namüin na wayuukana ouktapa naya. Natüjaainjatü aaʼu jamüin nuuʼulaaka Maleiwa eein müliaa otta jamüin wanoujaka sünain sülüʼülüin süpüla sajaʼttüin tü kasakalüirua. Nanoujüinjatü anain jamüin nayaka ekirajüin tü shiimainkat na aküjüliikana pütchi nüchiki Jeʼwaa. Natüjaainjatü aaʼu kasain mojuin otta kasain anain (Heb. 5:14, NM). Soto jaaʼin naatain nakuwaʼipa na tepichikana; eeshii na jüüjüükana ekii sümüin wanee pütchi otta eeshii na ichekana ekii sümüin wanee pütchi. Wainmapejeʼe na tepichi ayaawatakana saaʼu tü shikirajakalü anain tü Wiwüliakat, jaʼitainna joʼuuyuuin naya (Luc. 2:42, 46, 47).
Süpüla jikirajüinjanain na jüchonniikana, eʼitaaneerü suluʼu jw.org waneeirua pütchi suluʼujeejatü tü karalouktakat Kasa shikirajaka. Juusüteerü anain tia suluʼu jw.org sükajee tü pütchikat ENSEÑANZAS BÍBLICAS > JÓVENES. Mapeena puusüteerü anain yala waneeirua pütchi suluʼujeejatü tü karalouktakat «Ayata alin jüpüla Maleiwa». Eepajaʼa süpüla pikirajüin na püchonniikana sükajee tia karalouktakalüirua. Nnaajaʼa jutuma tü jaaʼinrajatkat sükajee tü suluʼukat jw.org. Eeshii süpüla jikirajaain sünain juʼwaajapa Maleiwa sümaa jüpüshi, jikirajapa na jüchonniikana jee jiʼikeere na jüchonniikana sünain ekirajawaa namüiwaʼa.