Wainmeerü aʼyatawaa akoosütoʼu

1. ¿Kasa aainjünajatka akoosütoʼu sainküinpünaa mmaka?

¹ Choʼujaasü palitchon kaʼi süpüla shikeraajüin poloo shikii juya süchikijee süikkalaain Nuluwataaya Maleiwa chaa iipünaa. Makalaka shiitajüneerüin akoosütoʼu sainküinpünaa Mmaka süpüshuaʼa wanee karalouktachon jeketü. Müsü sünülia: ¿Jaraiche chi anakai süpüla oʼuniraa wakuwaʼipa? Süküjüin karalouktakat tüü namüin na wayuukana nachajaainjatüin suluʼu tü Wiwüliakat susouktia tü nasakirakalü anain. Otta süküjüin namüin sükaaliinjeenain naya jw.org süpüla natüjaamaatüin saaʼu tü nasakirakalü anain.

2. ¿Kasa waaʼinrajatka waneʼewai wakua süpüla waʼwaajüin Jeʼwaa akoosütoʼu?

² Wainmeena na aʼwaajakana Maleiwa. Süpüla sükooʼomüinraain jiʼyataain nümüin Maleiwa, waküjeein jümüin eein süpüla pürekutsoolüin aaʼusiliaat jia akoosütoʼu sümaa jülatirüin apünüin shikii oora sünain aküjaa pütchi. Na wawalayuu aʼyataakana otta na koleejiakana, eeshii süpüla pürekutsoolüin naya süka eein jaʼraisü piennoʼu, saawanoʼu otta rimiinkoʼu. Eere wanee pikirajüin keraakai süpüla aküjaa pütchi jee niale wanee püchon, püküjamaata shia nümüin chi wawala akumajakai sukuwaʼipa naʼyataain na laülaashiikana. Anashanteerü namüin naküjüliin pütchi soʼu kashikat tia. Eeshii na pürekutsoot rekulaat eemeraakana akoosütoʼu süka kettaain natuma tü oora nalatirawaikat. Anashii jüchajaale sukuwaʼipa süpüla jiʼyataain maʼin sünain eitajaa tü karalouktachonkot. Jiakana kachonniikana, anasü eejüle jaaʼin sünain tü jaaʼinrajatkat süpüla juʼwaajüin Maleiwa akoosütoʼu (Esd. 3:​11; Prov. 15:22).

3. ¿Kasa waʼatapajaka kooʼomüin watuma akoosütoʼu?

³ Nnojoishii eiwaʼaliin waya sünain eitajaa karaloukta. Shiasaʼa müin waʼatapajüin wainmain aʼyatawaa sünain tüü. Waʼatapajüin sükooʼomüinraain tü oora walatirakat sünain aküjaa pütchi, nakooʼomüinraain na aküjüliikana pütchi otta nakooʼomüinraain na pürekutsootkana aaʼusiliaat akoosütoʼu. Kasataalejeseʼe anain wakuwaʼipa nutuma Jeʼwaa süpüla süküjünüinjatüin pütchi sainküinpünaa mmaka süpüshuaʼa akoosütoʼu (Mat. 24:14.)