Washata nakuwaʼipa na nünüikimaajanakana Maleiwa: Sofonías
1. ¿Kasa alataka soʼutpünaa nüneekünüin Sofonías nutuma Maleiwa? ¿Jamüsü anaka washatüle nukuwaʼipa?
1 Soʼutpünaa juyaka 650 süpülapünaa wakalia, nia aʼwaajünaka Baal nuulia Maleiwa chaa Judá. Jee müshia Amón, chi aluwataai eʼrüikai maʼin wayumüin oʼutüna aaʼinchi nia suʼunnaa juyakat tia. Niakalaka aikkalaain Josías sünain aluwatawaa nüchikumüin Amón (2 Crón. 33:21–34:1). Soʼu juyakat tia, nüneekaka Jeʼwaa wanee wayuu kanüliakai Sofonías süpüla nüküjüin sümüin tü wayuukalüirua süsalainjatüin saainjala. Mayaainjeʼe eein süpüla nooʼuliwoʼuin Sofonías na aluwataaliikana saaʼu Israel, ayatüsia nüküjüin süpüshuaʼa tü naainjüinjatkat Jeʼwaa naka na aluwataashiikana saaʼu Judá (Sof. 1:1; 3:1-4). Müshiʼiya wayakana, yalayalasü waaʼin sünain aküjaa pütchi maʼaka naainjüin shia Sofonías otta nnojotsü wooʼulaain sumojujaain wakuwaʼipa nümaa Jeʼwaa natuma na wapüshikana (Mat. 10:34-37). ¿Kasa nüküjaka achiki Sofonías? ¿Kasa eeka sünainjee tü nüküjakat?
2. ¿Kasa waainjüinjatka süpüla nuʼtteʼerüinjanain waya Jeʼwaa suʼunnaa tü nükaliakat?
2 «Jüchajaa nüchiki Jeʼwaa». Nia Jeʼwaa chi eekai süpüla oʼtteʼerüin wayuu suʼunnaa tü nükaliakat. Müsüjeseʼe nüküjüin Sofonías namüin na judíokana nachajaainjachin achiki Jeʼwaa, tü lotookalü akuwaʼipaa jee müsia tü anamiaakat süpülapünaa süntüin tü nükaliakat (Sof. 2:2, 3). Müsia sukuwaʼipa wayuu maaʼutpünaa. Otta waainjüin tü naainjakat Sofonías: waküjüin sümüin tü wayuukalüirua nachajaainjachin nüchiki Jeʼwaa. Jaʼitakajeʼe wayakana waainjüinjatü tia otta nnojoliinjana akayalaain nuulia Jeʼwaa (Sof. 1:6). Wachajaa achikichi Jeʼwaa wanaa sümaa wekirajaain sünain tü Nünüikikat otta wanaa sümaa wachuntüin nümüin nuʼunirai tü wakuwaʼipakat. Wachajaa achikirü tü lotookalü akuwaʼipa wanaa sümaa nnojoliin sünainpünaain waya kasa mojusü. Jee müsia wachajaa achikirü tü anamiaakat wamaa sümaa jüüjüüin waya sümüin tü nümakat Jeʼwaa sükajee tü nupueulosekat.
3. ¿Jamüshii ayatüinjanaka waküjüin pütchi?
3 Eesia kasa anasü. Eeshii na wayuu aapaakana sümaa tü pütchi nüküjakat Sofonías chaa Judá. Wanee wayuu aapaakai sümaa tia pütchikat nia Josías otta nüchajaa achikichi Jeʼwaa jintüliiwaʼaya nia. Makalaka nüsolojirüin Josías süpüshuaʼa tü maleiwayaasükalüirua aʼwaajünaka chaa Judá (2 Crón. 34:2-5). Maaʼutpünaa yaa, eesia türa waüyee ejituukat eepünaale süliikatünüin aaʼu sutuma wayuu, türa ejituukat eere arülain mma saaʼu ipa, türa ejituukat saʼaka mojuui eekai keimsein otta türa waüyee ejituukat saaʼu mma anasü sümaa kachoin shia (Mat. 13:18-23). Watüjaa aaʼulu ayateenain nükaaliinjüin waya Jeʼwaa süpüla wapünajüin tü waüyeekat suluʼu naaʼin na wayuukana (Sal. 126:6).
4. ¿Jamüsü eeinjatka waaʼin sünain aʼatapajaa tü nükaliakat Jeʼwaa?
4 Eeshii na judío nnojoliikana anoujüin sünain süntajatüin tü nükaliakat Jeʼwaa. Akatsaʼa nüküjüin Jeʼwaa sünain sülüʼülaain maʼin tü nükaliakat (Sof. 1:12, 14). Nayainjana neʼe oʼttaaka na wayuu eʼitaakana naaʼin nünain Jeʼwaa (Sof. 3:12, 17). Sümaʼinruʼu waʼatapajüin tü nükaliakat Jeʼwaa, ayata talatüin waaʼin sünain aʼyatawaa nümüin namaa na wawalayuukana (Sof. 3:8, 9).