¿Anasüche pukuwaʼipa noʼuluʼu Jeʼwaa?
1. ¿Jamüsü maka aka saaʼin wanee rouya tü Wiwüliakat?
1 ¿Jeʼratua jiirakaain suluʼu rouya kaʼiwai? Kojuyatuawai weirakaain suluʼu rouya. Waainjüin tia süpüla wanouktüin washeʼin otta waʼwala. Müsü tü Wiwüliakat maʼaka saaʼin wanee rouya. Wanaa sümaa waashajeʼerüin shia, wayaawata aaʼu tü kasa suluʼukat waaʼin müleka anale noʼuluʼu Jeʼwaa jee müleka mojule shia (1 Sam. 16:7; Sant. 1:22-24). Sükaaliinjüin waya tü Nünüikikat Maleiwa süpüla watüjaain saaʼu tü anasükat süpüla waaʼinrüin shia jee tü mojusükat süpüla wayouktüin shia (Heb. 4:12). Waashajeʼerüle tü Wiwüliakat soʼukaiwai sümaa jülüjüin waaʼin tü sümakat, sükaaliinjeena waya süpüla wanoukteʼerüin wakuwaʼipa jee süpüla anain wakuwaʼipa sünain aʼyatawaa nümüin Maleiwa. ¿Jamüsü watüjaaka saaʼu tia? (Sal. 1:1-3.)
2. ¿Jamüsü watüjaaka saaʼu sükaaliinjeenain waya tü Wiwüliakat süpüla wanoukteʼerüin tü wakuwaʼipakat?
2 Sükaaliinjüin waya tü Wiwüliakat. Wekirajaale süchiirua nakuwaʼipa na wayuu aküjünakana achiki suluʼu tü Wiwüliakat, sükaaliinjeena waya süpüla watüjaain saaʼu jaralüin tü akuwaʼipaa anakat maʼin noʼuluʼu Jeʼwaa. Jamüshijaʼa David kojutüsü maʼin nümüin tü nünüliakat Maleiwa (1 Sam. 17:45, 46). Jee müshia Isaías, yalayala aaʼinchi nia sünain aküjaa pütchi nüchiki Maleiwa sümüin wayuu mojulaasü (Is. 6:8, 9). Süka miyoʼuin naalii Jeʼwaa nüpüla Jesuu, talatüsü maʼin naaʼin sünain aküjaa pütchi otta nnojotsü akulajaain naaʼin sünain aainjaa tia (Juan 4:34). Na anoujüshii eejanakana nükalioʼu Jesuu aküjüshii maʼin pütchi, neʼitaain naaʼin nünain Jeʼwaa otta nnojoishii ooʼulaain suulia aainjaa kasa anasü (Aluw. 5:41, 42; 2 Cor. 4:1; 2 Tim. 4:17). Jülüjüle waaʼin tü naainjapuʼukat wayuukana naainnua, watüjaweerü aaʼu müleka anale tü suluʼukat waaʼin jee mojule shia otta wanoukteʼereerü wakuwaʼipa süpüla anain maʼin waʼyataain nümüin Maleiwa.
3. ¿Jamüsü wanoukteʼeramaatüinjatka tü kasa mojukat sünain wakuwaʼipa?
3 Wanoukteʼerüinjatü wakuwaʼipa. Nnojotsü kasain saamüin wamüin weirakaale suluʼu wanee rouya müleka nnojorüle wanouktüin tü kasa mojukat wanain maʼaka saaʼin washeʼin otta waʼwala. Eesü süpüla wachuntüin kaaliinwaa nümüin Jeʼwaa süpüla wayaawatüin saaʼu tü kasa mojukat sünain wakuwaʼipa süpüla wanoukteʼerüin shia (Sal. 139:23, 24; Luc. 11:13). Süka sülüʼülaain maʼin tü nükaliakat Maleiwa süpüla najaʼlajeʼerüin na mojulaashiikana, acheküsü wanoukteʼeramaatüinjatüin tü kasa mojukat sünain wakuwaʼipa (1 Cor. 7:29; 1 Tim. 4:16).
4. ¿Jameetche nukuwaʼipa chi wayuu eekai jülüjüin naaʼin nünüiki Maleiwa süpüla nunoukteʼerüinjatüin tü nukuwaʼipakat?
4 Kojutüleesia maʼin nümüin Jeʼwaa anale nukuwaʼipa wanee wayuu nümaa suulialeʼeya anain neʼe niyolojo (1 Ped. 3:3, 4). ¿Jameetche nukuwaʼipa chi wayuu eekai jülüjüin naaʼin nünüiki Maleiwa süpüla nunoukteʼerüinjatüin tü kasa mojukat sünain nukuwaʼipa? Müsü tü Wiwüliakat: «Chi eekai jülüjüin naaʼin nünüiki Maleiwa süpüla naaʼinrüinjatüin waneepia tü suluwataakat anain, sümaa nnojolüin motüin naaʼin shia, alanaʼaleejeeria maʼi sünain talatüin naaʼin sünain süpüshua tü naaʼinrakat» (Sant. 1:25). Makalaka talateerüin maʼin waaʼin sünain aʼyatawaa nümüin Maleiwa otta jaʼyeerü waaʼu washatüin tü nukuwaʼipakat (2 Cor. 3:18, NM).