Müsü tü Bibliakat maʼaka saaʼin wanee rouya

Nüküjain Santiago müin tü Bibliakat maʼaka saaʼin wanee rouya, weʼrüin tü suluʼukat waaʼin sükajee (Sant. 1:22-25). ¿Kasa waaʼinrajatka süpüla watüjain saaʼu tü suluʼukat waaʼin sükajee tü Bibliakat?

Waashajeʼera tü Bibliakat sümaa jülüjain waaʼin tü sümakat. Wanaʼlaale suluʼu rouya sümaa washapajaain aaʼin nnojoleerü watüjain saaʼu jamüin maʼin wayolojo. Müsia neʼe wakuwaʼipa waashajeʼerüle tü Bibliakat sümaa washapajaain aaʼin nnojoleerü wayaawatüin saaʼu tü wanouteʼerüinjatkat sünain wakuwaʼipa. Anasü waashajeʼerüle tü Bibliakat sümaa jülüjain waaʼin tü sümakat.

Jülüja waaʼin tü wanouteʼerüinjatka sünain wakuwaʼipa suulia tü nanouteʼerüinjatkat na waneinnua. Wanaʼlaapa suluʼu rouya weʼrüin nayolojo na wayuu pejekana wanain otta eesüjaʼa jülüjale neʼe waaʼin nayolojo. Müsia neʼe wakuwaʼipa waashajeʼerapa tü Bibliakat eesüjaʼa jülüjale neʼe waaʼin tü nanouteʼerüinjatkat na waneinnua sünain nakuwaʼipa. Waaʼinrüle tia nnojoleerü wayaawatüin saaʼu tü wanouteʼerüinjatkat sünain wakuwaʼipa.

Nnojo jülüjain neʼe waaʼin tü mojukat sünain wakuwaʼipa. Wanaʼlapa suluʼu rouya sümaa jülüjain neʼe waaʼin tü mojukat sünain wayolojo, mojeerü waaʼin. Müsüjeseʼe nnojoluin anain jülüjale neʼe waaʼin tü mojukat sünain wakuwaʼipa waashajeʼerapa tü Bibliakat wayaawatüinjatü saaʼu eejeerüin tü mojukat watuma jee nnojoleerüin nuchuntuin wamüin Jehová waaʼinrüin wanee kasa iseetka wachiki (Sant. 3:17).