Poloo shikii juya sünain aküjaa pütchi süchiki Nuluwataaya Maleiwa
1. ¿Kasa nüküjaka chi wawalakai Rutherford sünain wanee outkajawaa miyoʼu?
1 Nüküjüin chi wawalakai Rutherford sünain wanee outkajawaa miyoʼu süküjünüinjatüin maʼin pütchi süchiki Nuluwataaya Maleiwa sainküin mmaka süpüshuaʼa. Eetaairüjaʼa maʼaka 90 juya alatüitpaka süchikijee nüküjüin tia pütchikat. Otta ayatüshiʼiya waya sünain aküjaa pütchi. Na anoujüshii eejanakana nükalioʼu Jesuu, aküjüshii naya pütchi sümüin wayuu «sainküin mmakat süpüshua». Müsia shia watuma maaʼulu (Col. 1:23). ¿Kasa aainjünüitka süpüla shiʼikajünüin pütchi sümüin wayuu süchiki Nuluwataaya Maleiwa? ¿Kasa waaʼinrajatka süpüla ayatüinjanain waküjüin pütchi süchiki Nuluwataaya Maleiwa?
2. ¿Kasa aküjünaka achiki suluʼu tü karalouktairua weitajakat?
2 Tü kasa aainjünapuʼukat. Wainmairü juya alataka sünain süküjünüin süchiki Nuluwataaya Maleiwa suluʼu tü karaloukta weitajakat. Tü rewiisüta weitajakat soʼujee 1939 shia Aapiria Wayuu. Aküjüsü süchiki Nuluwataaya Jeʼwaa. Rewiisütakat tüü, aashajaasü süchiki Nuluwataaya Maleiwa otta süchiki tü kasa eeinjateetkat sutuma. Tü rewiisütakat ¡Despertad!, süküja achikirü shiain neʼe aneerüin atuma wayuu tü Nuluwataayakat Maleiwa. Talatüsü maʼin waaʼin sutuma shiitajünüin tia rewiisütakalüirua sainküin mmaka süpüshuaʼa otta süshajünüin suluʼu wainma anüikii (Alat. Map. 14:6).
3. ¿Jamapuʼusü sukuwaʼipa süküjia pütchi?
3 Wainmairü sukuwaʼipa süküjia pütchi natuma na aküjüliikana pütchi. Aküjünapuʼusü pütchi namüin na wayuukana suluʼupünaa raawia. Eepuʼusü kemion eʼitaanaka anain wainma emiyoʼujia pütchi. Otta alüʼüjapuʼushii wanee raawiachon na wawalayuukana süpüla naapajüin wanee pütchi na wayuukana. Mayaainjeʼe paliʼirüin na wawalayuukana suʼunnaa tia, wattakuatsü tü pütchikat nüchiki Maleiwa sutuma tü naainjakat (Sal. 19:4). Jekenainka, wainma tü pütchi eʼitaanakat suluʼu jw.org. Wattakuatsü tü pütchikat sutuma, antüsü shia suluʼumüin waneeirua mma eere süpülajünüin woulia tü aküjaakat pütchi.
4. ¿Kasa akumajünaka akuwaʼipa süpüla aküjaa pütchi?
4 Na wayuu aʼyataakana nümüin Jeʼwaa nakumaja akuwaʼipat süpüla süküjünüin pütchi. Kakaliainna waya aküjüin pütchi sainküin piichi, shiasaʼa müin soʼujee juyaka 1990, aküjüshii joo waya pütchi sainküin parque, eere süshaʼwajüle kemion otta sainküin oikkaalee. Akumajünüsü sukuwaʼipa jekenainka süpüla süküjünüin pütchi eere jouluin wayuu. Wainma na wawalayuu eʼitaakana wanee meesa sümaa wainma karaloukta otta eeshii na aküjakana pütchi süka wanee kareetachon. Nnojotpejeʼe motuinjatüin waaʼin aküjaa pütchi sainküin piichi (Aluw. 20:20).
5. ¿Kasa eeka süpüla waneeküin soʼujee settienpüroʼu?
5 Tü kasa eeinjateetkat mapeena. Soʼujee settienpüroʼu, wainmeena na wawalayuu oʼtteenakana sünain pürekutsooliin rekulaat naya. ¿Pürekutsooleechi piakai? Isalejeʼeya shia püchiki, eeshi süpüla pürekutsoolin pia aaʼusiliaat maʼaka jeʼratua süpüla juyaka. Isalejeʼeya püchiki pürekutsoolin pia, aneerü pukuwaʼipa nutuma Jeʼwaa sünain süpüshuaʼa tü kasa paainjakat süpüla püküjüin maʼin pütchi (Mal. 3:10).
6. ¿Kasa eejeetka oʼutuupüroʼu 2014?
6 Ekeraajeerü 100 juya oʼutuupüroʼu 2014 sünain nüikkalaain Jesuu sünain aluwatawaa chaa iipünaa. Makalaka saashajaweerüin maʼin tü rewiisütakat Aapiria Wayuu süchiki Nuluwataaya Maleiwa soʼu kashikat tia. Acheküshii waʼyataainjanain maʼin sünain eitajaa tia rewiisütakat. Anakajaʼa mata ayatüle waküjüin pütchi süchiki Nuluwataaya Maleiwa namüin na wayuu aapajeekana tü pütchi waküjakat (Aluw. 8:12).