Waküja pütchi süka jw.org

Anasü maʼin aküjaa pütchi sümüin wayuu «suluʼupünaa süpüshuaʼa mma wattapünaa» süka jw.org (Aluw. 1:8). Wainmapejeʼe na nnojoliikana atüjaain saaʼu kasain wayuu tü kanüliakat jw.org. Natüjaaleʼeya aaʼu shiiʼiyatünapa namüin jee saashajaanapa achiki namüin.

Jamüshijaʼa wanee wawala alapalaakai naaʼu na anoujüshiikana nüdescargaajüin suluʼu nüserulaatse tü videokot ¿Jamüshii wekirajaainjanaka sünain tü Wiwüliakat? otta niiʼiyatüin shia sümüin wayuu eepünaale nia. Müshi nia nüküjapa pütchi sainküin piichi: «Yootushi taya namaa na wayuukana süchiki apünüinsü pütchi: ¿Jamüin sülataka kasa mojusü? ¿Kaseerüin naainjüin Maleiwa süpüla najaʼttirüin shia? ¿Kasainjatüin waainjüin sümaʼinruʼu tia? Asouktünüsü eʼipajee tia suluʼu videokot tüü». Süchikijee tia, niiʼiyatamaatüin tü videokot namüin otta nüsakirüin naya süpüla nütüjaain aaʼu jamüin nanüiki süchiki tü nanajakat. Chüntüsü noʼu na wayuukana sünain tü videokot süka kamalain shia namüin. Shiasaʼa mapa, müshi chi wawalakai namüin: «Aküjünüsü suluʼu tü videokot eein süpüla puchuntüin ekirajawaa sünain tü Wiwüliakat suluʼujee jw.org. Eepajaʼa süpüla taküjüin pümüin kasain sünainpünaain tia ekirajawaakat». «Anakajaʼa», nümüle wanee wayuu nümüin chi wawalakai, nüküjüin nümüin jamüin shikirajaaya sünain tü Wiwüliakat sükajee tü poyeetokot Pütchi anasü. Kupaale chi wayuukai, nüküjüin nümüin nünteechin wanee nukueena. Neemeraapünaale suluʼu wanee tientachon, nüchajaain sukuwaʼipa süpüla yootuin nia nümaa chira eekai nüʼütpaʼain. ¿Eeshia pia aküjüin pütchi süka jw.org?