Jayeechi jekennuu süpüla waʼwaajüin Jeʼwaa
1 Sünain tü outkajawaa eejatkat sutuma Watch Tower Bible and Tract Society of Pennsylvania, oʼutuupüroʼu 4, 2014, aküjünüsü sunoukteʼennüinjatüin waneeirua jayeechi suluʼuka tü weeʼirajiakat. Talatüsü maʼin naaʼin na wawalayuukana sutuma naapüin tia pütchikat. Aküjünüsü chayaa kojutüinjatüin wamüin tü jayeechi waʼwaajakalü aka Maleiwa (Sal. 96:2).
2 Eeshijaʼa pümüle: «¿Jamüsüche sunoukteʼennajatka tü jayeechikalüirua?». Shia süka süpansaajinnüin tü watüjaakalü aaʼu süchiki tü sümakat tü Wiwüliakat otta eʼitaanajatü tia suluʼu tü eeʼirajiakat (Prov. 4:18). Tü wanee shia süka sunoukteʼennüin suluʼu wainma anüikii tü pütchi suluʼukat Traducción del Nuevo Mundo jeketka. Makalaka shiʼitaanüinjatüin jooluʼu sünüiki tü Wiwülia jeketkat suluʼu tü karaloukta weeʼirajiakat. Süka wainmainjatüin tü jayeechi anoukteʼennajatkat, eʼitaanaleeinjatia waneeirua jayeechi jekennuu.
3 ¿Waʼatapajüinjatche sujuʼitüin wanee eeʼirajia jeketü süpüla weeʼirajüinjatüin tü jayeechikalüirua? Nnojo, waküjeein jümüin sujuʼiteerüin kashiwai suluʼu jw.org tü jayeechi jekennuukalüirua. Sujuʼitapa wanee jayeechi jeketü, eeʼirajünüinjatü sajaʼttiamüin tü Outkajawaakat süpüla Aʼyatawaa nümüin Maleiwa. Ashajüneerü sünain Waʼyataain Nümüin Maleiwa sünülia tü jayeechi jeketkat. «Jayeechi jeketka», meerü sünain.
4 Watüjüinjatü weeʼirajüin tü jayeechikalüirua. Eesü kapüleejeerüle wamüin watüjüinjatüin tü jayeechikat. Mayaainjeʼe müin shia, eeʼirajüinjana waya sünain tü outkajawaakat maʼaka naainjüin shia chi salmistakai. Nnojoliishii yüütüinjanain waya (Sal. 30:12). Anuu tü paainjüinjatkat süpüla pütüjüinjachin eeʼirajaa wanee jayeechi otta piiʼirajüin süka süpüshuaʼa paaʼin:
Paapajüinjatü kojuyatua tü muusikakat, pünteerü anain shia suluʼu jw.org. Müle shia putuma, pütüjamaateerü apüleerua.
Püleeja süleetürain tü jayeechikat süpüla makatüinjatüin shia suluʼu pikii.
Piiʼiraja tü jayeechikat kojuyatua. Puuʼulaka shia pütüjaleepa süpüleerua.
Süpüla natüjüinjanain na wapüshikana süpüleerua tü jayeechikalüirua, wekirajaa sünain soʼu tü Ai Waʼwaajakalü oʼu Maleiwa sümaa Wapüshi.
5 Shiiʼirajünüinjatpa wanee jayeechi sajaʼttiamüin tü Outkajawaakat süpüla Aʼyatawaa nümüin Maleiwa, naapajüinjatü palajana na wawalayuukana tü muusikakat. Süchikijee, neeʼirajeerü sümaa tü muusikakat maʼaka saaʼin tü wanee jayeechikalüirua.
6 Waʼwaajüin Jeʼwaa wanaa sümaa weeʼirajüin sünain tü outkajawaakat. Makalaka nnojoluin anain müleka waainjüle waneeirua kasa suʼunnaa shiiʼirajünüin wanee jayeechi.
7 Eesü wanee kasa weeʼiyataka aka kojutüin wamüin tü muusikakat. Sünain tü outkajawaakat miyoʼu, eʼitaanawaisü muusika süpülapünaa suʼttüin tü ekirajaanajatkalü anain. Eeshii wawalayuu oʼunakana piantua juyawai wattajee chamüin Patterson, Nueva York sünain akürawaajaa tü muusika waʼwaajakalü aka Maleiwa. Nawalaajüin tü nasapiakat. Makalaka waikkalaamaatüinjanain wanaa sümaa süküjünüin wamüin waapajüinjatüin wanee muusika sünain tü outkajawaakat miyoʼu. Waainjüle tia, yapajüshii waya süpüla aapajaa tü pütchi ekirajünajatkalü anain (Esd. 7:10).
8 Sujutaapa tü outkajawaakat, weeʼirajeerü wanee jayeechi jeketü, müsü sünülia alijunaikiruʼu: «¡Que venga el Reino establecido por Dios!». Jayeechikat tüü, eeʼirajünüsü sünain tü outkajawaa eejatkat oʼutuupüroʼu 4, 2014. Akumajuushi tia süka shikeraajüin 100 juya süchikijee nüikkalaain Jesuu sünain aluwatawaa.
9 Tü jayeechi jekennuukat, shia wanee «kasa anasü» naapajala wamüin Jeʼwaa (Mat. 12:351). Wekirajaa sünain tia jayeechikalüirua süpüla weeʼirajüin süka süpüshuaʼa waaʼin. Müle shia watuma, waʼwaajeechi Maleiwa otta kojuteechi nia watuma (Sal. 147:1).