WAKUWAʼIPA SÜNAIN ANOUJAA

Kojuta wamüin tü akuwaʼipaa wulesü niʼitaakat Jeʼwaa

Niʼitaain wapüleerua Jeʼwaa tü waaʼinrajatkat süpüla wulein wakuwaʼipa. Nüküjain kasaalüinjachin wanee wayuu sümaa wanee jierü jee nnojoishii naya ooʼulaajiraainjanain (Mt 19:4-6, 9). Mojusü nümüin Jeʼwaa tü amaʼüjirawaakalü akuwaʼipaa (1Co 6:9, 10). Müsüjeseʼe nüküjain jamüinjatüin sukuwaʼipa nasheʼin otta naʼanaaya na anoujashiikana jee naatainjatü noulia na manoujainsaliikana (Dt 22:5; 1Ti 2:9, 10).

Wainma wayuu maaʼulu yaa, ayoutaka tü nuluwataakalü anain Jeʼwaa (Ro 1:18-32). Nashatüin sukuwaʼipa nasheʼin, naʼanaaya otta nakuwaʼipa na waneinnua. Wainma na aʼwaataakana suluʼu yarüttüin nakuwaʼipa otta mojusü nanüiki nachiki na anakana akuwaʼipa (1Pe 4:3, 4).

Yalayalainjatü naaʼin na aküjaliikana pütchi nüchiki Jeʼwaa süpüla kojutuin namüin tü akuwaʼipaa wulesükat (Ro 12:9). Waaʼinrüin tia waküjale sümüin wayuu tü pütchi anasükat sümaa weeʼiyatüin nojutu namüin jee weʼitaale suluʼu wakuwaʼipa tü nüchekakat Jeʼwaa. Jamüsüjaʼa wamaa sümaa waneeküin tü washeʼinkat jee tü waʼanaayakat, wasakirüinjatü waaʼin sünain tüü: «¿Jara kakuwaʼipaka tü toʼunakalü achiirua? ¿Nayache na manoujainsaliikana? ¿Niataapa Jeʼwaa? ¿Jaʼyasüche saaʼu taʼanaaya taʼyataain nümüin Maleiwa?». Wanajüinjatpa wanee peliikula, wasakirüinjatü waaʼin anashiijeerüle nümüin Jeʼwaa tü kasa eeʼiyatünakat, jaralüin tü akuwaʼipaa waaʼinreetkat sutuma otta ayateenale eejiraain waya sümaa tü kasa mojusü niʼitaakalü Satanaa (Sl 101:3). ¿Jameetche sukuwaʼipa tapüshi jee waneirua wayuu sutuma tü taneekakat? (1Co 10:31-33).

¿Jamüsüche choʼujaaka kojutuin wamüin tü akuwaʼipaa wulesü niʼitaakat Jeʼwaa? Shia süka najaʼttireenain Jesuu soʼu palitchon kaʼi na manoujainsaliikana sümaʼaleʼeya tü kasa mojusü naaʼinrakat (Eze 9:4-7). Nayeena neʼe katakana oʼu na oonookana sümaa nünüiki Maleiwa (1Jn 2:15-17). Müsüjeseʼe kojutuinjatüin wamüin tü akuwaʼipaa wulesü niʼitaakat Jeʼwaa, süka jamüin, nuʼwaajüneechin natuma na eʼrakana tü wakuwaʼipakat (1Pe 2:11, 12).

Wanee wayuu aneeküsü süsheʼin — ¿Jaʼyasüche saaʼu tasheʼin otta taʼanaaya kojutuin tamüin tü akuwaʼipaa wulesü niʼitaakat Jeʼwaa?

SÜCHIKIJEE JÜNAJÜIN TÜ VIDEOKOT ALEEWA PIA NÜMAA JEʼWAA: WANEE TOOLO, WANEE JIERÜ, JUSOUTA SHIʼIPAJEE TÜÜ:

¿Jamüsü anaka woonoole sümaa tü akuwaʼipaa wulesü niʼitaakat Jeʼwaa?
Joʼuuiwaʼaya nachonnii na anoujashiikana, ¿jamüshii nekirajüinjanaka naya sünain tü akuwaʼipaa wulesü niʼitaakat Jeʼwaa?
¿Kasa naaʼinrajatka na tepichikana jee na miyoʼuyuukana süpüla neʼraajirüin wayuu tü nümaneekat Jeʼwaa?