Kasa eekai anain suulia kasa eekai mojuin: Tü waneeküinjatkat
Eesü anale jee mojule wakuwaʼipa sünainjee tü waneekakat. Nütüjaa aaʼulu Jehová tia, müsüjeseʼe keeʼireein naaʼin wayaawatüin saaʼu tü kasa eekai anain nümüin otta tü kasa eekai mojuin nümüin.
Nücheka achiki Jehová anainjatüin wakuwaʼipa jee talatüinjanain waya.
«Tayakai Jehová, taya chi Pümaleiwasekai, chi ekirajakai pia süpüla anainjatüin pukuwaʼipa, chi oʼunirakai pia suluʼupünaa tü wopu puʼunuinjatkalü aluʼu. Poonoole sümaa tü taluwataakalü anain, jimateerü paaʼin maʼaka saaʼin wanee süchi otta loteerü pukuwaʼipa maʼaka saaʼin sümüna tü palaakat» (Isaías 48:17, 18).
Nütüjaa aaʼulu chi Maleiwa Kakumalakai waya tü anainjatkalü atuma wakuwaʼipa. Nuchuntuin wamüin woonooinjanain sümaa tü nuluwataakalü anain süpüla anain wakuwaʼipa. Waaʼinrüle tia aneerü tü kasa waneekakat otta eʼreena waya kasa anasü.
Nnojotsü nuchuntuin wamüin Jehová kasa eekai isain wachiki.
«Tü taluwataakalü anain pia soʼukai nnojotsü kapüleein süpüla paaʼinrüin jee puunteerü shia» (Deuteronomio 30:11).
Eesüjaʼa weeʼiratüinjatüle tü jülüjakat waaʼin süchiki wanee kasa jee shiale wanouteʼerüinjatüin wakuwaʼipa süpüla pansaain sümaa tü nümakat Maleiwa süchiki kasa eekai anain otta eekai mojuin. Nnojotpejeʼe kapüleein süpüla waaʼinrüin tü nuchuntakat wamüin Jehová. Süka niain kakumalain waya nütüjaa aaʼulu tü kasa isakat wachiki jee tü wountakat. Weʼraajapa shiʼipaʼaya nukuwaʼipa Jehová wayaawateerü aaʼulu nnojoluin kapüleein süpüla waaʼinrüin tü nuluwataakalü anain (1 Juan 5:3).
Nüküjain Jehová nükaalinjeenain na wayuu oonookana sümaa tü nuluwataakalü anain.
«Tayakai Jehová, taya chi Pümaleiwasekai, taya ajapuluʼujakai pia süka tü pajapü pikiakat, anuu tanüiki pümüin: ‹Nnojo mmoluin pia. Shiimain takaalinjeechin maʼin pia›» (Isaías 41:13).
Eesü süpüla wountuin waaʼinrüin tü nümakat Jehová süchiki kasa eekai anain otta eekai mojuin, jama nükaalinjeenain waya. Naaʼinrüin tia sükajee tü Bibliakat, tü amülialakat waaʼin jee tü aküjakat wamüin tü kasa anasü waʼatapajakat.
Watta naalii na wayuu ayaawatakana saaʼu anain nakuwaʼipa sutuma naaʼinrüin tü sümakat tü Bibliakat. Anasü püchajaale sukuwaʼipa süpüla pütüjain sooʼomüin süchiki tü sümakat tü Bibliakat. Anashi pikirajaale sükajee tü poyeetokot Anainjatka atuma pukuwaʼipa waneepia, eesü süpüla püdescargaajüin shia suluʼu jw.org. Anuu tü pütchi eekat suluʼu:
«¿Aneetche pukuwaʼipa sutuma tü sümakat tü Bibliakat?».
«Süküjain tü Bibliakat süchiki tü kasa anasü eeinjatkat mapeena».
«¿Punoujeetche sünain tü sümakat tü Bibliakat?».
Pikirajaapa shiʼipaʼaya sünain tü Bibliakat piyaawateerü aaʼu ayatayülüin jaloulin shia jee jalouijeerüin shia süpüla kaʼikat süpüshuaʼa (Salmo 111:8). Aneerü wakuwaʼipa waaʼinrüle tü sümakat tü Bibliakat süchiki tü kasa eekai anain jee tü eekai mojuin. Nnojoleetpejeʼe nüpüleeruain waaʼin Maleiwa süpüla waaʼinrüin tü nuluwataakalü anain (Deuteronomio 30:19, 20; Josué 24:15). Waneeküinjatü wamüiwaʼa tia.